Bus ਟਰਾਲੇ ਵਿੱਚ ਵੱਜੀ, ਡਰਾਈਵਰ ਸਣੇ ਦਸ ਸਵਾਰੀਆਂ ਜ਼ਖ਼ਮੀ

ਇੱਥੇ ਤਲਵਾੜਾ ਮੁਕੇਰੀਆਂ ਮਾਰਗ ’ਤੇ ਪੈਂਦੇ ਅੱਡਾ ਝੀਰ ਦਾ ਖੂਹ ਨੇੜਲੇ ਚੌਧਰੀ ਦਾ ਬਾਗ ਕੋਲ ਨਿੱਜੀ ਬੱਸ ਖੜ੍ਹੇ ਟਰਾਲੇ ਨਾਲ ਟਕਰਾ ਗਈ। ਇਸ ਕਾਰਨ ਕਰੀਬ 10 ਸਵਾਰੀਆਂ ਜ਼ਖ਼ਮੀ ਹੋ ਗਈਆਂ। ਪੁਲੀਸ ਨੇ ਜ਼ਖਮੀਆਂ ਨੂੰ ਮੁਕੇਰੀਆਂ, ਤਲਵਾੜਾ ਅਤੇ ਹਾਜੀਪੁਰ ਦੇ ਸਿਵਲ ਹਸਪਤਾਲ ਲਿਆਂਦਾ, ਜਿੱਥੋਂ ਕੁਝ ਨੂੰ ਮੁੱਢਲੀ ਸਹਾਇਤਾ ਦੇਣ ਉਪਰੰਤ ਘਰ ਭੇਜ ਦਿੱਤਾ ਗਿਆ। ਜਾਣਕਾਰੀ ਅੱਜ ਸਵੇਰੇ ਕਰੀਬ 11 ਵਜੇ ਨਿੱਜੀ ਬੱਸ ਕੰਪਨੀ ਦੀ ਬੱਸ (ਪੀ ਬੀ 07 ਬੀਜੀ 0833) ਤਲਵਾੜਾ ਤੋਂ ਸਵਾਰੀਆਂ ਲੈ ਕੇ ਮੁਕੇਰੀਆਂ ਨੂੰ ਆ ਰਹੀ ਸੀ। ਜਦੋਂ ਇਹ ਬੱਸ ਝੀਰ ਦਾ ਖੂਹ ਕੋਲ ਪੈਂਦੇ ਚੌਧਰੀ ਦਾ ਬਾਗ ਕੋਲ ਪੁੱਜੀ ਤਾਂ ਕਥਿਤ ਸੜਕ ਕਿਨਾਰੇ ਖੜ੍ਹੇ ਟਰਾਲੇ (ਆਰ ਜੇ 23-ਜੀਬੀ 7851) ਨਾਲ ਪਿੱਛੋਂ ਟਕਰਾ ਗਈ। ਹਾਦਸੇ ਵਿੱਚ ਬੱਸ ਡਰਾਈਵਰ ਗਗਨਦੀਪ ਸਿੰਘ ਵਾਸੀ ਬੁੱਲੋਵਾਲ, ਕੰਡਕਟਰ ਅਤੇ ਇੱਕ ਛੋਟੀ ਬੱਚੀ ਸਣੇ ਕਰੀਬ 10 ਸਵਾਰੀਆਂ ਜ਼ਖਮੀ ਹੋ ਗਈਆਂ। ਐੱਸ ਐੱਚ ਓ ਸੱਤਪਾਲ ਸਿੰਘ ਨੇ ਕਿਹਾ ਕਿ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਜਾਂਚ ਉਪਰੰਤ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।