ਐਨ.ਪੀ. ਧਵਨ
ਪਠਾਨਕੋਟ, 15 ਜੁਲਾਈ
ਫੂਡ ਸਪਲਾਈ ਵਿਭਾਗ ਨੇ ਪੁਲੀਸ ਪ੍ਰਸ਼ਾਸਨ ਦੇ ਸਹਿਯੋਗ ਨਾਲ ਅੱਜ ਬਾਹਰਲੇ ਜ਼ਿਲ੍ਹਿਆਂ ਵਿੱਚੋਂ ਇੱਟਾਂ ਲਿਆ ਕੇ ਸਸਤੇ ਭਾਅ ਵੇਚਣ ਵਾਲੇ ਮਾਫੀਆ ਉੱਪਰ ਕਾਰਵਾਈ ਕਰਦੇ ਹੋਏ ਅਕਾਲਗੜ੍ਹ, ਸਰਨਾ, ਸੁਜਾਨਪੁਰ ਰੋਡ, ਜੁਗਿਆਲ ਰੋਡ, ਹਰਿਆਲ ਅਤੇ ਬਘਾਰ ਖੱਡ ਵਿੱਚ ਛਾਪੇ ਮਾਰ ਕੇ ਉੱਥੇ ਜਮ੍ਹਾਂ ਕਰ ਰੱਖੀਆਂ ਲੱਖਾਂ ਇੱਟਾਂ ਦੇ ਡੰਪਾਂ ਨੂੰ ਸੀਲ ਕਰ ਦਿੱਤਾ। ਪੁਲੀਸ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਦੇਖ ਕੇ ਡੰਪ ਮਾਲਕ ਫ਼ਰਾਰ ਹੋ ਗਏ। ਇਸ ਮੌਕੇ ਭੱਠਾ ਸਨਅਤ ਦੀ ਯੂਨੀਅਨ ਦੇ ਆਗੂਆਂ ਸੰਜੇ ਆਨੰਦ, ਅਨਿਲ ਅਗਰਵਾਲ, ਸੰਜੀਵ ਅਗਰਵਾਲ, ਰੋਹਿਤ ਮਹਾਜਨ, ਬਲਵੀਰ ਮਹਾਜਨ, ਕਨਵ ਮਹਾਜਨ ਅਤੇ ਜੈ ਮਹਾਜਨ ਨੇ ਪੁਲੀਸ ਅਤੇ ਫੂਡ ਸਪਲਾਈ ਵਿਭਾਗ ਦਾ ਸਹਿਯੋਗ ਜ਼ਿਲ੍ਹਾ ਪਠਾਨਕੋਟ ਦੀ ਦਿੱਤਾ।
ਯੂਨੀਅਨ ਦੇ ਆਗੂ ਸੰਜੇ ਆਨੰਦ ਨੇ ਦੱਸਿਆ ਕਿ ਜ਼ਿਲ੍ਹਾ ਪਠਾਨਕੋਟ ਅੰਦਰ ਬਾਹਰਲੇ ਜ਼ਿਲ੍ਹਿਆਂ ਤੋਂ ਘਟੀਆ ਇੱਟ ਲਿਆ ਕੇ ਸਸਤੇ ਭਾਅ ਵੇਚਣ ਦਾ ਮਾਫ਼ੀਆ ਕਾਫ਼ੀ ਦੇਰ ਤੋਂ ਸਰਗਰਮ ਹੈ। ਇਸ ਨਾਲ ਪਠਾਨਕੋਟ ਜ਼ਿਲ੍ਹੇ ਦੇ ਭੱਠਾ ਮਾਲਕਾਂ ਨੂੰ ਨੁਕਸਾਨ ਹੋ ਰਿਹਾ ਸੀ। ਇਸ ਗ਼ੈਰਕਾਨੂੰਨੀ ਧੰਦੇ ਨੂੰ ਬੰਦ ਕਰਵਾਉਣ ਲਈ ਯੂਨੀਅਨ ਦਾ ਵਫ਼ਦ ਡਿਪਟੀ ਕਮਿਸ਼ਨਰ ਨੂੰ ਮਿਲਿਆ ਅਤੇ ਉਨ੍ਹਾਂ ਨੇ ਤੁਰੰਤ ਕਾਰਵਾਈ ਦੇ ਆਦੇਸ਼ ਦਿੱਤੇ। ਉਨ੍ਹਾਂ ਦੱਸਿਆ ਕਿ ਅੱਜ ਛਾਪੇ ਦੌਰਾਨ ਲੱਖਾਂ ਦੀ ਗਿਣਤੀ ਵਿੱਚ ਇੱਟ ਬਰਾਮਦ ਹੋਈ।
ਸਹਾਇਕ ਜ਼ਿਲ੍ਹਾ ਫੂਡ ਸਪਲਾਈ ਅਫ਼ਸਰ ਸੁਖਵਿੰਦਰ ਸਿੰਘ ਨੇ ਦੱਸਿਆ ਕਿ ਅਲੱਗ-ਅਲੱਗ ਸਥਾਨਾਂ ’ਤੇ ਛਾਪੇ ਮਾਰੇ ਗਏ ਅਤੇ ਗ਼ੈਰਕਾਨੂੰਨੀ ਵੇਚੀਆਂ ਜਾਣ ਵਾਲੀਆਂ ਇੱਟਾਂ ਨੂੰ ਸੀਲ ਕਰ ਦਿੱਤਾ ਹੈ। ਉਨ੍ਹਾਂ ਸਪੱਸ਼ਟ ਕਿਹਾ ਕਿ ਜ਼ਿਲ੍ਹੇ ਅੰਦਰ ਗ਼ੈਰਕਾਨੂੰਨੀ ਕਾਰੋਬਾਰ ਕਿਸੇ ਹਾਲਤ ਵਿੱਚ ਨਹੀਂ ਹੋਣ ਦਿੱਤਾ ਜਾਵੇਗਾ।