ਪਿੱਲੀਆਂ ਇੱਟਾਂ ਨਾਲ ਬਣਾਇਆ ਖਾਲ਼

ਇੱਥੋਂ ਨੇੜਲੇ ਪਿੰਡ ਭੰਗਾਲਾ ਵਿੱਚ ਨਹਿਰੀ ਖਾਲ਼਼ ’ਚ ਠੇਕੇਦਾਰ ਵੱਲੋਂ ਲਗਾਤਾਰ ਵਰਤੀਆਂ ਜਾ ਰਹੀਆਂ ਪਿੱਲੀਆਂ ਇੱਟਾਂ ਦੀਆਂ ਸ਼ਿਕਾਇਤਾਂ ਮਿਲਣ ’ਤੇ ਵਿਭਾਗੀ ਅਧਿਕਾਰੀਆਂ ਨੇ ਇੱਟਾਂ ਵਾਪਸ ਚੁੱਕਵਾ ਦਿੱਤੀਆਂ ਹਨ। ਅਧਿਕਾਰੀਆਂ ਨੇ ਠੇਕੇਦਾਰ ਨੂੰ ਹਦਾਇਤ ਕੀਤੀ ਹੈ ਕਿ ਉਸਾਰੀ ’ਚ ਅੱਵਲ ਇੱਟਾਂ ਅਤੇ ਸਹੀ ਸਮੱਗਰੀ ਦੀ ਵਰਤੋਂ ਕੀਤੀ ਜਾਵੇ।

ਕਿਸਾਨ ਮਜ਼ਦੂਰ ਹਿੱਤਕਾਰੀ ਸਭਾ ਦੇ ਜਨਰਲ ਸਕੱਤਰ ਉਂਕਾਰ ਸਿੰਘ ਪੁਰਾਣਾ ਭੰਗਾਲਾ ਨੇ ਦੱਸਿਆ ਕਿ ਨਹਿਰੀ ਵਿਭਾਗ ਵੱਲੋਂ ਭੰਗਾਲਾ ਮਾਈਨਰ ’ਤੇ ਉਸਾਰੇ ਜਾ ਰਹੇ ਨਹਿਰੀ ਖਾਲ਼ ਵਿੱਚ ਠੇਕੇਦਾਰ ਵੱਲੋਂ ਕਥਿਤ ਗ਼ੈਰਮਿਆਰੀ ਸਮੱਗਰੀ ਵਰਤੀ ਜਾ ਰਹੀ ਹੈ। ਉਨ੍ਹਾਂ ਹਲਕੇ ਦੇ ਸੱਤਾਧਾਰੀਆਂ ਸਣੇ ਵਿਭਾਗੀ ਅਧਿਕਾਰੀਆਂ ਨੂੰ ਵੀ ਸ਼ਿਕਾਇਤ ਕੀਤੀ ਸੀ ਪਰ ਠੇਕੇਦਾਰ ਪਿੱਲੀਆਂ ਇੱਟਾਂ ਦੀ ਵਰਤੋਂ ਕਰਦਾ ਰਿਹਾ। ਨਹਿਰੀ ਖਾਲ਼ ਵਿੱਚ ਹਾਲੇ ਪਹਿਲਾ ਪਾਣੀ ਹੀ ਛੱਡਿਆ ਸੀ ਕਿ ਕਈ ਥਾਂ ਤਰੇੜਾਂ ਆ ਗਈਆਂ। ਉਨ੍ਹਾਂ ਦੋਸ਼ ਲਗਾਇਆ ਕਿ ਠੇਕੇਦਾਰ ਨੂੰ ਕਥਿਤ ਸਿਆਸੀ ਸ਼ਹਿ ਪ੍ਰਾਪਤ ਹੈ। ਉਨ੍ਹਾਂ ਠੇਕੇਦਾਰ ਖ਼ਿਲਾਫ਼ ਸਖ਼ਤ ਕਾਰਵਾਈ ਦੀ ਮੰਗ ਕਰਦਿਆਂ ਅੱਵਲ ਦਰਜੇ ਦੀ ਸਮੱਗਰੀ ਨਾਲ ਖਾਲ਼ ਬਣਾਉਣ ਦੀ ਮੰਗ ਕੀਤੀ ਹੈ।

ਭੱਠਾ ਮਾਲਕ ਨੇ ਗ਼ਲਤ ਇੱਟਾਂ ਭੇਜੀਆਂ: ਠੇਕੇਦਾਰ

ਉਸਾਰੀ ਠੇਕੇਦਾਰ ਰਾਜੇਸ਼ ਕੁਮਾਰ ਨੇ ਦਾਅਵਾ ਕੀਤਾ ਕਿ ਭੱਠਾ ਮਾਲਕ ਨੇ ਪਿੱਲੀਆਂ ਇੱਟਾਂ ਗ਼ਲਤੀ ਨਾਲ ਭੇਜ ਦਿੱਤੀਆਂ ਸਨ, ਉਹ ਵਾਪਸ ਕਰਵਾ ਦਿੱਤੀਆਂ ਗਈਆਂ ਹਨ। ਵਾਰ ਵਾਰ ਵਿਭਾਗੀ ਪੱਤਰਾਂ ਦੇ ਬਾਵਜੂਦ ਪਿੱਲੀਆਂ ਇੱਟਾਂ ਵਰਤਣ ਬਾਰੇ ਉਹ ਕੋਈ ਸਪੱਸ਼ਟ ਜਵਾਬ ਨਾ ਦੇ ਸਕੇ।

ਕੰਮ ਦੁਬਾਰਾ ਕਰਨ ਦੀ ਹਦਾਇਤ ਕੀਤੀ: ਐੱਸ ਡੀ ਓ

ਐੱਸ ਡੀ ਓ ਸੱਤਪਾਲ ਸਿੰਘ ਨੇ ਕਿਹਾ ਕਿ ਠੇਕੇਦਾਰ ਨੇ ਉਨ੍ਹਾਂ ਦੇ ਮਾਧੋਪੁਰ ਵਿੱਚ ਵਿਭਾਗੀ ਪ੍ਰਾਜੈਕਟ ਵਿੱਚ ਵਧੇ ਰੁਝੇਵਿਆਂ ਦਾ ਨਾਜਾਇਜ਼ ਫ਼ਾਇਦਾ ਗਿਆ ਹੈ। ਵਿਭਾਗ ਦੇ ਨਹਿਰੀ ਪਟਵਾਰੀ ਨੇ ਠੇਕੇਦਾਰ ਵੱਲੋਂ ਉਸਾਰੀ ਵਿੱਚ ਗ਼ੈਰਮਿਆਰੀ ਸਮੱਗਰੀ ਵਰਤਣ ਦੀ ਕੀਤੀ ਸ਼ਿਕਾਇਤ ’ਤੇ ਉਨ੍ਹਾਂ 17 ਨਵੰਬਰ ਨੂੰ ਠੇਕੇਦਾਰ ਨੂੰ ਸਹੀ ਸਮੱਗਰੀ ਵਰਤਣ ਦੀ ਲਿਖਤੀ ਹਦਾਇਤ ਕੀਤੀ ਸੀ ਪਰ ਠੇਕੇਦਾਰ ਵੱਲੋਂ ਮੁੜ ਪਿੱਲੀਆਂ ਇੱਟਾਂ ਵਰਤਣ ਦੀ ਸ਼ਿਕਾਇਤ ਮਿਲੀ। ਇਸ ’ਤੇ 20 ਨਵੰਬਰ ਨੂੰ ਮੁੜ ਪੱਤਰ ਲਿਖਿਆ ਗਿਆ ਸੀ। ਠੇਕੇਦਾਰ ਨੂੰ ਪਿੱਲੀਆਂ ਇੱਟਾਂ ਨਾਲ ਬਣਾਇਆ ਖਾਲ਼ ਪੁੱਟ ਕੇ ਸਹੀ ਸਮੱਗਰੀ ਨਾਲ ਬਣਾਉਣ ਦੀ ਹਦਾਇਤ ਕਰਦਿਆਂ ਕੰਮ ਤੁਰੰਤ ਬੰਦ ਕਰਨ ਦੀ ਹਦਾਇਤ ਕੀਤੀ ਸੀ। ਇਸ ਦੇ ਬਾਵਜੂਦ ਠੇਕੇਦਾਰ ਨੇ ਕੋਈ ਸੁਧਾਰ ਨਾ ਕੀਤਾ। ਉਨ੍ਹਾਂ ਅੱਜ ਗ਼ੈਰਮਿਆਰੀ ਇੱਟਾਂ ਚੁਕਵਾ ਦਿੱਤੀਆਂ ਹਨ ਤੇ ਪਹਿਲਾਂ ਕੀਤਾ ਕੰਮ ਦੁਬਾਰਾ ਸਹੀ ਸਮੱਗਰੀ ਨਾਲ ਕਰਨ ਦੀ ਹਦਾਇਤ ਕੀਤੀ ਹੈ।