ਵਿੱਕੀ ਬਟਾਲਾ
ਰੋਮ (ਇਟਲੀ), 13 ਸਤੰਬਰ
ਇਟਲੀ ਵਿੱਚ ਅੱਜ ਜ਼ਿਲ੍ਹਾ ਆਰੇਸੋ ਅਤੇ ਲਾਤੀਨਾ ਵਿੱਚ ਦੋ ਭਾਰਤੀਆਂ ਨੇ ਖ਼ੁਦਕੁਸ਼ੀ ਕਰ ਲਈ। ਮਿਲੀ ਜਾਣਕਾਰੀ ਅਨੁਸਾਰ ਆਰੇਸੋ ਜ਼ਿਲ੍ਹੇ ਦੇ ਬਬਿਆਨਾ ਇਲਾਕੇ ਵਿੱਚ ਰਹਿ ਰਹੇ ਇਕ ਭਾਰਤੀ ਨੇ ਆਪਣੇ ਸ਼ਹਿਰ ਦੇ ਇੱਕ ਚੌਕ ਵਿੱਚ 15 ਫੁੱਟ ਦੀ ਉਚਾਈ ਤੋ ਛਾਲ ਮਾਰ ਕੇ ਖ਼ੁਦਕੁਸ਼ੀ ਕਰ ਲਈ। ਮ੍ਰਿਤਕ ਦੀ ਪਛਾਣ ਮਨਦੀਪ ਸਿੰਘ (23) ਵਜੋਂ ਹੋਈ ਹੈ ਜੋ ਪੰਜਾਬ ਦੇ ਸ਼ਹੀਦ ਭਗਤ ਸਿੰਘ ਨਗਰ ਨਾਲ ਸਬੰਧਤ ਸੀ। ਪੁਲੀਸ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੀ ਹੈ ਪਰ ਹਾਲੇ ਤੱਕ ਇਹ ਗੱਲ ਸਾਫ਼ ਨਹੀਂ ਹੋ ਸਕੀ ਹੈ ਕਿ ਮਨਦੀਪ ਨੇ ਉਚਾਈ ਤੋਂ ਛਾਲ ਖ਼ੁਦ ਮਾਰੀ ਸੀ ਜਾਂ ਕਿਸੇ ਨੇ ਉਸ ਨੂੰ ਧੱਕਾ ਦਿੱਤਾ ਸੀ। ਦੂਜੇ ਪਾਸੇ ਲਾਤੀਨਾ ਦੇ ਸੇਸੇ ਸਕਾਲੋ ਨੇੜੇ ਸਵਰਨ ਸਿੰਘ (60) ਨਾਂ ਦੇ ਇੱਕ ਹੋਰ ਭਾਰਤੀ ਨੇ ਫਾਹਾ ਲੈ ਕੇ ਖ਼ੁਦਕੁਸ਼ੀ ਕਰ ਲਈ। ਮ੍ਰਿਤਕ ਪੰਜਾਬ ਦੇ ਲੁਧਿਆਣਾ ਜ਼ਿਲ੍ਹੇ ਨਾਲ ਸਬੰਧਤ ਸੀ।