Canada Airline Strike: ਕੈਨੇਡਾ ਦੀ ਏਅਰਲਾਈਨ WestJet ਦੇ ਮੁਲਾਜ਼ਮਾਂ ਵੱਲੋਂ ਹੜਤਾਲ ਸ਼ੁਰੂ; ਮੁਸਾਫ਼ਰ ਪਰੇਸ਼ਾਨ

ਕੈਨੇਡਾ ਦੀ ਦੂਜੇ ਨੰਬਰ ਦੀ ਵੱਡੀ ਏਅਰਲਾਈਨ ‘ਵੈਸਟਜੈੱਟ’ (WestJet) ਦੇ ਚਾਰ ਹਜ਼ਾਰ ਕਾਮਿਆਂ ਨੇ ਦੋ ਅਗਸਤ ਦੀ ਅੱਧੀ ਰਾਤ ਹੁੰਦਿਆਂ ਹੀ ਆਪਣਾ ਕੰਮ ਬੰਦ ਕਰ ਦਿੱਤਾ ਹੈ, ਜਿਸ ਕਾਰਨ ਆਪਣੀਆਂ ਬੁੱਕ ਕੀਤੀਆਂ ਉਡਾਣਾਂ ਲੈਣ ਲਈ ਹਵਾਈ ਅੱਡਿਆਂ ’ਤੇ ਪਹੁੰਚੇ ਜਾਂ ਅਗਲੇ ਦਿਨਾਂ ਵਿੱਚ ਉਡਾਣ ਲੈਣ ਵਾਲੇ ਯਾਤਰੀਆਂ ਦੀ ਪਰੇਸ਼ਾਨੀ ਸ਼ੁਰੂ ਹੋ ਗਈ ਹੈ।

ਆਪਣੀਆਂ ਮੰਗਾਂ ਮਨਵਾਉਣ ਲਈ ਕਾਮਿਆਂ ਨੇ 72 ਘੰਟੇ ਪਹਿਲਾਂ ਨੋਟਿਸ ਦੇ ਦਿੱਤਾ ਸੀ। ਹੜਤਾਲ ਟਾਲਣ ਲਈ ਕੰਪਨੀ ਨੁਮਾਇੰਦਿਆਂ ਦੀ ਕਾਮਿਆਂ ਦੇ ਆਗੂਆਂ ਨਾਲ ਗੱਲਬਾਤ ਚੱਲਦੀ ਰਹੀ ਸੀ, ਪਰ ਦੋਵੇਂ ਧਿਰਾਂ ਆਪਣੀ ਥਾਂ ’ਤੇ ਅੜੀਆਂ ਰਹਿਣ ਕਾਰਨ ਉਸ ਦਾ ਕੋਈ ਸਿੱਟਾ ਨਹੀਂ ਨਿਕਲਿਆ।

ਕਾਮਿਆਂ ਦੀ ਮੁੱਖ ਮੰਗ ਹੈ ਕਿ ਗਰਾਊਂਡ ਡਿਊਟੀ ਸੰਭਾਲਦੇ ਹੀ ਉਨ੍ਹਾਂ ਦੇ ਕੰਮ ਦਾ ਸਮਾਂ ਸ਼ੁਰੂ ਕੀਤਾ ਜਾਵੇ, ਜਦੋਂਕਿ ਹੁਣ ਤੱਕ ਉਨ੍ਹਾਂ ਦੇ ਕੰਮ ਦਾ ਸਮਾਂ ਜਹਾਜ਼ ਦੇ ਉਡਾਣ ਭਰਨ ਵੇਲੇ ਸ਼ੁਰੂ ਹੁੰਦਾ ਹੈ। ਇਸ ਤੋਂ ਇਲਾਵਾ ਕੁੱਝ ਮੰਗਾਂ ਤਨਖਾਹ ਵਾਧੇ ਨਾਲ ਵੀ ਸਬੰਧਤ ਹਨ।