ਪੱੱਤਰ ਪ੍ਰੇਰਕ
ਨਵੀਂ ਦਿੱਲੀ, 7 ਮਈ
ਦੇਸ਼ ਵਿੱਚ ਕਰੋਨਾ ਦੀ ਆਈ ਦੂਜੀ ਵੱਡੀ ਲਹਿਰ ਦਿੱਲੀ ਵਾਸੀਆਂ ਲਈ ਇਹ ਚੌਥੀ ਲਹਿਰ ਹੈ। ਰੋਜ਼ਾਨਾ ਸਾਢੇ 3 ਸੌ ਤੋਂ ਵੱਧ ਮੌਤਾਂ ਕਰੋਨਾ ਮਰੀਜ਼ਾਂ ਦੀਆਂ ਹੋ ਰਹੀਆਂ ਹਨ। ਦਿੱਲੀ ਵਿੱਚ ਪਹਿਲਾਂ ਹੀ ਕਬਰਿਸਤਾਨਾਂ ਵਿੱਚ ਮ੍ਰਿਤਕਾਂ ਨੂੰ ਦੱਬਣ ਲਈ ਥਾਂ ਦੀ ਕਮੀ ਸੀ ਪਰ ਹੁਣ ਕਰੋਨਾ ਕਾਲ ਦੌਰਾਨ ਵੱਡੀ ਗਿਣਤੀ ਵਿੱਚ ਲੋਕਾਂ ਦੇ ਮਾਰੇ ਜਾਣ ਕਰਕੇ ਕਬਰਿਸਤਾਨਾਂ ਵਿੱਚ ਮੁਰਦੇ ਦੱਬਣ ਲਈ ਥਾਂ ਨਹੀਂ ਬਚੀ। ਇਵੇਂ ਹੀ ਦਿੱਲੀ ਦੇ ਵੱਖ-ਵੱਖ ਇਲਾਕਿਆਂ ਦੇ ਸਿਵਿਆਂ ਵਿੱਚ ਮੁਰਦੇ ਫੂਕਣ ਲਈ ਥਾਂ ਦੀ ਕਮੀ ਹੈ। ਦਿੱਲੀ ਵਿੱਚ ਕੋਵਿਡ ਮ੍ਰਿਤਕਾਂ ਲਈ ਕੁੱਝ ਕੁ ਕਬਰਾਂ ਵਾਲੀ ਥਾਂ ਤੈਅ ਕੀਤੀ ਹੋਈ ਸੀ ਕਿਉਂਕਿ ਕਰੋਨਾ ਕਾਰਨ ਮਰਨ ਵਾਲਿਆਂ ਦਾ ਸਸਕਾਰ ਵੀ ਖਾਸ ਨੇਮਾਂ ਨਾਲ ਸਾਵਧਾਨੀ ਹੇਠ ਕੀਤਾ ਜਾਂਦਾ ਹੈ। ਆਈਟੀਓ ਦੇ ਕਬਰਿਸਥਾਨ ਵਿੱਚ ਬਹੁਤ ਥੋੜੀ ਥਾਂ ਬਚੀ ਹੈ ਹਾਲਾਂਕਿ ਇਹ ਦਿੱਲੀ ਦਾ ਵੱਡਾ ਕਬਰਿਸਤਾਨ ਹੈ। ਮੁੱਲਕਾ ਕਲੋਨੀ, ਸ਼ਾਸਤਰੀ ਪਾਰਕ ਤੇ ਆਈਟੀਓ ਦੇ ਕਬਰਿਸਥਾਨਾਂ ਵਿੱਚੋਂ ਪਹਿਲੇ ਦੋਨਾਂ ਵਿੱਚ ਥਾਂ ਭਰ ਚੁੱਕੀ ਹੈ। ਨਗਰ ਨਿਗਮ ਵੱਲੋਂ 5 ਕਬਰਿਸਥਾਨ ਕਰੋਨਾ ਮ੍ਰਿਤਕਾਂ ਲਈ ਤੈਅ ਕੀਤੇ ਹੋਏ ਹਨ।
‘ਆਪ’ ਵਿਧਾਇਕ ਤੇ ਦਿੱਲੀ ਵਕਫ਼ ਬੋਰਡ ਦੇ ਚੇਅਰਮੈਨ ਅਮਾਨਤਉੱਲ੍ਹਾ ਨੇ ਕਿਹਾ ਕਿ ਦਿੱਲੀ ਵਿੱਚ ਕੁੱਲ 45 ਕਬਰਿਸਤਾਨ ਹਨ ਤੇ 5 ਕਰੋਨਾ ਮ੍ਰਿਤਕਾਂ ਲਈ ਤੈਅ ਕੀਤੇ ਗਏ ਹਨ।
ਦਿੱਲੀ ਘੱਟ ਗਿਣਤੀ ਕਮਿਸ਼ਨ ਦੇ ਸਾਬਕਾ ਚੇਅਰਮੈਨ ਡਾ. ਜਫ਼ਰੂਲ ਇਸਲਾਮ ਖ਼ਾਂ ਵੱਲੋਂ ਆਪਣੇ ਕਾਰਜਕਾਲ ਦੌਰਾਨ ਇੱਕ ਰਿਪੋਰਟ ਤਿਆਰ ਕੀਤੀ ਗਈ ਸੀ, ਜਿਸ ਵਿੱਚ ਕਿਹਾ ਗਿਆ ਸੀ ਕਿ ਦਿੱਲੀ ਅੰਦਰ ਅਗਲੇ ਸਾਲਾਂ ਦੌਰਾਨ ਮੁਸਲਮਾਨਾਂ ਲਈ ਕਬਰਾਂ ਦੀ ਥਾਂ ਘੱਟ ਜਾਵੇਗੀ। ਰਿਪੋਰਟ ਮੁਤਾਬਕ ਵਕਫ਼ ਬੋਰਡ ਦੀ ਸੂਚੀ ਵਿੱਚ 624 ਕਬਰਿਸਤਾਨਾਂ ਦਾ ਜ਼ਿਕਰ ਹੈ ਪਰ 45-46 ਕਬਰਿਸਤਾਨ ਹੀ ਮੌਜੂਦ ਹਨ। ਰਿਪੋਰਟ ਵੱਲੋਂ ਕਬਰਾਂ ਦੀ ਥਾਂ ਦੀ ਨਿਸ਼ਾਨਦੇਹੀ ਕਰਕੇ ਉਨ੍ਹਾਂ ਤੋਂ ਕਬਜ਼ੇ ਹਟਾਉਣ ਅਤੇ ਪ੍ਰਬੰਧ ਹੱਥਾਂ ਵਿੱਚ ਲੈਣ ਦੀ ਸਿਫ਼ਾਰਸ਼ ਕੀਤੀ ਸੀ। ਉੱਤਰ-ਪੂਰਬੀ ਦਿੱਲੀ, ਸ਼ਾਹਦਰਾ, ਦੱਖਣੀ ਤੇ ਦੱਖਣੀ-ਪੂਰਬੀ ਇਲਾਕਿਆਂ ਵਿੱਚ ਨਵੀਆਂ ਕਬਰਾਂ ਲਈ ਥਾਂ ਬਣਾਉਣ ਲਈ ਵੀ ਸਿਫ਼ਾਰਸ਼ ਕੀਤੀ ਗਈ ਸੀ।