ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 10 ਜੂਨ
ਭਾਰਤ ਦੇ ਮੌਸਮ ਵਿਭਾਗ (ਆਈ.ਐੱਮ.ਡੀ.) ਨੇ ਕਿਹਾ ਕਿ ਲਗਾਤਾਰ ਦੂਜੇ ਦਿਨ ਕੌਮੀ ਰਾਜਧਾਨੀ ਵਿੱਚ ਪਾਰਾ 40 ਡਿਗਰੀ ਪਾਰ ਕਰ ਗਿਆ, ਜੋ ਕਿ 41 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਹੈ। ਘੱਟੋ-ਘੱਟ ਤਾਪਮਾਨ ਔਸਤਨ 29 ਡਿਗਰੀ ਸੈਲਸੀਅਸ ਤੋਂ ਇਕ ਡਿਗਰੀ ਵੱਧ ਦਰਜ ਕੀਤਾ ਗਿਆ। ਆਮ ਲੋਕਾਂ ਨੇ ਇਸ ਤਾਪਮਾਨ ਨੂੰ 46 ਡਿਗਰੀ ਮਹਿਸੂਸ ਕੀਤਾ ਹਾਲਾਂਕਿ, ਮੌਸਮ ਵਿਭਾਗ ਨੇ ਕਿਹਾ ਹੈ ਕਿ ਸ਼ਹਿਰ ਵਿਚ ਖੁਸ਼ਕ ਮੌਸਮ ਤਾਪਮਾਨ ਦੇ ਵਾਧੇ ਵਿਚ ਇਕ ਅਹਿਮ ਭੂਮਿਕਾ ਅਦਾ ਕਰ ਰਿਹਾ ਹੈ ਜੋ ਆਉਣ ਵਾਲੇ ਦਿਨਾਂ ਵਿਚ ਹੋਰ ਵਧਣ ਦੀ ਉਮੀਦ ਹੈ। ਉਧਰ ਸਿੰਘੂ, ਟਿਕਰੀ ਤੇ ਗਾਜ਼ੀਪੁਰ ਸਮੇਤ ਪਲਵਲ ਦੇ ਮੋਰਚਿਆਂ ਉਪਰ ਬੈਠੇ ਕਿਸਾਨਾਂ ਨੇ ਕਿਹਾ ਕਿ ਇਸ ਗਰਮੀ ਤੋਂ ਉਹ ਬੇਡਰ ਹਨ। ਕਿਸਾਨਾਂ ਨੇ ਕਿਹਾ ਕਿ ਮੌਸਮ ਦੇ ਕਹਿਰ ਦੀ ਕੋਈ ਪ੍ਰਵਾਹ ਨਹੀਂ, ਤੱਤੀਆਂ ਲੂਆਂ ਸਾਡਾ ਕੁੱਝ ਨਹੀਂ ਵਿਗਾੜ ਸਕਦੀਆਂ ਤੇ ਕੁਦਰਤ ਕਿਸਾਨਾਂ ਉਪਰ ਦੋਖੀ ਬਣੀ ਹੀ ਰਹਿੰਦੀ ਹੈ, ਕੁਦਰਤ ਦੇ ਗੇੜ ਨਾਲ ਕਦੇ ਫਸਲਾਂ ਦਾ ਨੁਕਸਾਨ ਤੇ ਹੁਣ ਮੋਰਚਿਆਂ ਉਪਰ ਬੈਠੇ ਕਿਸਾਨਾਂ ਨੂੰ ਗਰਮੀ ਕਾਰਨ ਪ੍ਰੇਸ਼ਾਨੀ। ਕਿਸਾਨਾਂ ਨੇ ਦ੍ਰਿੜਤਾ ਨਾਲ ਕਿ ਤਿੱਖੜ ਦੁਪਹਿਰੇ ਉਹ ਖੇਤੀ ਕੰਮਾਂ ਨੂੰ ਕਰਦੇ-ਕਰਦੇ ਪੱਕ ਚੁੱਕੇ ਹਨ। ਬੁੱਧਵਾਰ ਨੂੰ ਰਾਸ਼ਟਰੀ ਰਾਜਧਾਨੀ 42.2 ਡਿਗਰੀ ਸੈਲਸੀਅਸ ’ਤੇ ਆ ਗਈ ਜੋ ਮੌਸਮ ਦੇ ਔਸਤਨ ਨਾਲੋਂ ਤਿੰਨ ਡਿਗਰੀ ਵੱਧ ਸੀ, ਜਦੋਂ ਕਿ ਘੱਟੋ ਘੱਟ ਤਾਪਮਾਨ 31.4 ਡਿਗਰੀ ਸੈਲਸੀਅਸ ਸੀ ਜੋ ਮੌਸਮ ਦੇ ਔਸਤਨ ਤੋਂ ਚਾਰ ਡਿਗਰੀ ਵੱਧ ਹੈ। ਵੀਰਵਾਰ ਸਵੇਰੇ ਦਿੱਲੀ ਦਾ ਏਅਰ ਕੁਆਲਟੀ ਇੰਡੈਕਸ (ਏਕਿਯੂਆਈ) 165 ਦੇ ਦਰਮਿਆਨ ਰਿਹਾ।