SpiceJet ਨੇ Mumbai ਦੀਆਂ ਤਿੰਨ ਉਡਾਣਾਂ ਕੀਤੀਆਂ ਰੱਦ; ਖੱਜਲ-ਖੁਆਰ ਹੋਏ ਯਾਤਰੀ

ਸਪਾਈਸਜੈੱਟ (SpiceJet) ਨੇ ਬੁੱਧਵਾਰ ਦੇਰ ਸ਼ਾਮ ਮੁੰਬਈ ਤੋਂ ਆਪਣੀਆਂ ਤਿੰਨ ਉਡਾਣਾਂ ਰੱਦ ਕਰ ਦਿੱਤੀਆਂ, ਜਿਸ ਦਾ ਕਾਰਨ ਜਹਾਜ਼ਾਂ ਦੀ ਉਪਲੱਬਧਤਾ ਵਿੱਚ ਕਮੀ, ਖਰਾਬ ਮੌਸਮ ਅਤੇ ਚਾਲਕ ਦਲ (crew) ਦੀ ਡਿਊਟੀ ਦੇ ਸਮੇਂ ਦੀਆਂ ਸੀਮਾਵਾਂ (FDTL) ਨੂੰ ਦੱਸਿਆ ਗਿਆ ਹੈ। ਵੀਰਵਾਰ ਨੂੰ ਇੱਕ ਅਧਿਕਾਰੀ ਨੇ ਇਸ ਦੀ ਪੁਸ਼ਟੀ ਕੀਤੀ।

ਰੱਦ ਕੀਤੀਆਂ ਗਈਆਂ ਉਡਾਣਾਂ ਵਿੱਚ SG 631 (ਮੁੰਬਈ-ਦਿੱਲੀ), SG 553 (ਮੁੰਬਈ-ਗੋਰਖਪੁਰ) ਅਤੇ SG 669 (ਮੁੰਬਈ-ਬੈਂਗਲੁਰੂ) ਸ਼ਾਮਲ ਹਨ। ਇਸ ਕਾਰਨ ਮੁੰਬਈ ਹਵਾਈ ਅੱਡੇ ਦੇ ਟਰਮੀਨਲ 1 'ਤੇ ਕਾਫੀ ਹੰਗਾਮਾ ਦੇਖਣ ਨੂੰ ਮਿਲਿਆ।

ਏਅਰਲਾਈਨ ਅਨੁਸਾਰ, ਬਾਗਡੋਗਰਾ ਵਿੱਚ ਖਰਾਬ ਮੌਸਮ ਕਾਰਨ ਜਹਾਜ਼ਾਂ ਦੀ ਆਵਾਜਾਈ ਪ੍ਰਭਾਵਿਤ ਹੋਈ ਸੀ, ਜਿਸ ਦਾ ਅਸਰ ਅਗਲੀਆਂ ਉਡਾਣਾਂ 'ਤੇ ਪਿਆ। ਇਸ ਦੇ ਨਾਲ ਹੀ ਕਰੂ ਮੈਂਬਰਾਂ ਦੇ ਡਿਊਟੀ ਘੰਟੇ ਖਤਮ ਹੋਣ ਕਾਰਨ ਉਡਾਣਾਂ ਨੂੰ ਰੱਦ ਕਰਨਾ ਪਿਆ। ਮੁੰਬਈ-ਅਹਿਮਦਾਬਾਦ ਦੀਆਂ ਦੋ ਉਡਾਣਾਂ ਵਿੱਚ ਵੀ ਵਾਰਾਣਸੀ ਅਤੇ ਬਾਗਡੋਗਰਾ ਵਿੱਚ ਖਰਾਬ ਮੌਸਮ ਕਾਰਨ ਦੇਰੀ ਹੋਈ। ਹਾਲਾਂਕਿ, ਇਹ ਉਡਾਣਾਂ ਬਾਅਦ ਵਿੱਚ ਰਵਾਨਾ ਹੋ ਗਈਆਂ।

ਸਪਾਈਸਜੈੱਟ ਨੇ ਮੁਸਾਫਰਾਂ ਨੂੰ ਹੋਈ ਅਸੁਵਿਧਾ ਲਈ ਅਫਸੋਸ ਪ੍ਰਗਟਾਇਆ ਹੈ। ਕੰਪਨੀ ਨੇ ਕਿਹਾ ਕਿ ਪ੍ਰਭਾਵਿਤ ਯਾਤਰੀਆਂ ਦੀ ਸਹੂਲਤ ਲਈ ਵਾਧੂ ਉਡਾਣਾਂ ਚਲਾਈਆਂ ਜਾ ਰਹੀਆਂ ਹਨ ਅਤੇ ਜਲਦੀ ਹੀ ਸਥਿਤੀ ਨੂੰ ਆਮ ਵਾਂਗ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।