ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 19 ਅਕਤੂਬਰ
ਦਿੱਲੀ ਦੇ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਕਿਹਾ ਕਿ ਕਲਾ ਅਤੇ ਸੱਭਿਆਚਾਰ ਨੂੰ ਸਮਾਜ ਵਿੱਚ ਫੈਲ ਰਹੀ ਨਫ਼ਰਤ ਤੇ ਚਰਿੱਤਰਹੀਣਤਾ ਦੇ ਵਿਰੁੱਧ ਸਮਾਜ ਨੂੰ ਖੜ੍ਹਾ ਕਰਨ ਲਈ ਆਪਣੀ ਭੂਮਿਕਾ ਨਿਭਾਉਣੀ ਪਏਗੀ, ਕਿਉਂਕਿ ਹਿੰਸਾ ਅਤੇ ਨਫ਼ਰਤ ਵਧਦੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਕਲਾ ਸੱਭਿਆਚਾਰ ’ਚ ਸਾਰਥਕ ਯੋਗਦਾਨ ਪਾਉਣ ਲਈ ਦਿੱਲੀ ਸਰਕਾਰ ਇਕ ਵਿਆਪਕ ਸੱਭਿਆਚਾਰਕ ਨੀਤੀ ਤਿਆਰ ਕਰ ਰਹੀ ਹੈ। ਸ੍ਰੀ ਸਿਸੋਦੀਆ ਨੇ ਅੱਜ ਦਿੱਲੀ ਸੱਭਿਆਚਾਰਕ ਨੀਤੀ ਸਲਾਹਕਾਰ ਕਮੇਟੀ ਦੀ ਪਹਿਲੀ ਆਨਲਾਈਨ ਬੈਠਕ ਵਿੱਚ ਕਿਹਾ ਕਿ ਸੱਚ ਬੋਲਣ ਦੀ ਸਭ ਤੋਂ ਵੱਡੀ ਤਾਕਤ ਖੁਦ ਕਲਾ ਸੱਭਿਆਚਾਰ ਵਿੱਚ ਹੈ ਤੇ ਇਸ ਸਭਿਆਚਾਰਕ ਨੀਤੀ ਰਾਹੀਂ ਸ਼ਹਿਰ ਦੇ ‘ਮੂਡ’ ਨੂੰ ਬਦਲਣਾ ਉਨ੍ਹਾਂ ਦਾ ਉਦੇਸ਼ ਹੈ। ਇਸ ਬੈਠਕ ਵਿਚ ਅਦਾਕਾਰ ਮਨੋਜ ਬਾਜਪਾਈ ਨੇ ਬੱਚਿਆਂ ਨੂੰ ਥੀਏਟਰ ਸਿੱਖਿਆ ਰਾਹੀਂ ਸਕੂਲਾਂ ਦੇ ਨਾਲ ਨਾਲ ਝੁੱਗੀਆਂ-ਝੌਂਪੜੀਆਂ ਅਤੇ ਚੌਕਾਂ ਦੇ ਬੱਚਿਆਂ ਨੂੰ ਮੁੱਖ ਧਾਰਾ ਵਿਚ ਲਿਆਉਣ ਦੀ ਸਲਾਹ ਦਿੱਤੀ ਹੈ। ਮੁੱਖ ਧਾਰਾ ਵਿਚ ਸ੍ਰੀ ਵਾਜਪਾਈ ਨੇ ਕਲਾਕਾਰਾਂ ਨੂੰ ਦਿੱਲੀ ਵਿਚ ਪ੍ਰਦਰਸ਼ਨ ਕਰਨ ਲਈ ਜਗ੍ਹਾ ਦੇਣ ਦਾ ਸੁਝਾਅ ਵੀ ਦਿੱਤਾ। ਸਲਾਹਕਾਰ ਕਮੇਟੀ ’ਚ ਅਦਾਕਾਰ ਮਨੋਜ ਬਾਜਪਾਈ ਤੇ ਜਾਵੇਦ ਜਾਫਰੀ, ਪੂਜਾ ਸੂਦ, ਜੇਐੱਨਯੂ ਸਕੂਲ ਆਫ਼ ਆਰਟਸ ਦੀ ਪ੍ਰੋਫੈਸਰ ਇਰਾ ਭਾਸਕਰ ਤੇ ਦਿੱਲੀ ਕਾਲਜ ਆਫ਼ ਆਰਟ ਦੀ ਪ੍ਰਿੰਸੀਪਲ ਅਸ਼ਵਨੀ ਕੁਮਾਰ ਹਾਜ਼ਰ ਸਨ।