NEET PG 2026 Result: ਮੈਡੀਕਲ ਬੋਰਡ ਵੱਲੋਂ ਨਤੀਜਾ ਜਾਰੀ; ਜਾਣੋ ਸ਼੍ਰੇਣੀਵਾਰ ਕੱਟ-ਆਫ਼ ਅਤੇ ਅਗਲੀ ਪ੍ਰਕਿਰਿਆ
ਸੂਬੇ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਆਪਣੀਆਂ ਨੀਤੀਆਂ ਅਨੁਸਾਰ ਤਿਆਰ ਕਰਨਗੇ ਸੂਬਾ ਕੋਟੇ ਦੀਆਂ ਮੈਰਿਟ ਸੂਚੀਆਂ
'ਨੈਸ਼ਨਲ ਬੋਰਡ ਆਫ਼ ਐਗਜ਼ਾਮੀਨੇਸ਼ਨਜ਼ ਇਨ ਮੈਡੀਕਲ ਸਾਇੰਸਜ਼' (NBEMS) ਨੇ ਵੀਰਵਾਰ ਨੂੰ ਨੀਟ-ਪੀਜੀ (NEET-PG 2026) ਦਾ ਨਤੀਜਾ ਐਲਾਨ ਦਿੱਤਾ ਹੈ। 30 ਅਗਸਤ ਨੂੰ ਹੋਈ ਪ੍ਰੀਖਿਆ ਵਿੱਚ 2,63,544 ਉਮੀਦਵਾਰ ਬੈਠੇ ਸਨ, ਜਦੋਂ ਕਿ 5 ਸਤੰਬਰ ਨੂੰ ਜੈਪੁਰ ਵਿੱਚ ਕਰਵਾਈ ਗਈ ਮੁੜ-ਪ੍ਰੀਖਿਆ ਵਿੱਚ 2,416 ਪ੍ਰੀਖਿਆਰਥੀਆਂ ਨੇ ਭਾਗ ਲਿਆ।
ਜੈਪੁਰ ਦੇ ਇੱਕ ਪ੍ਰੀਖਿਆ ਕੇਂਦਰ ਵਿੱਚ ਬਿਜਲੀ ਗੁੱਲ ਹੋਣ ਕਾਰਨ ਪ੍ਰਭਾਵਿਤ ਉਮੀਦਵਾਰ ਪ੍ਰੀਖਿਆ ਪੂਰੀ ਨਹੀਂ ਕਰ ਸਕੇ ਸਨ, ਜਿਸ ਕਰਕੇ ਉੱਥੇ ਮੁੜ-ਪ੍ਰੀਖਿਆ ਕਰਵਾਉਣੀ ਪਈ ਸੀ।
ਯੋਗਤਾ ਲਈ ਕੱਟ-ਆਫ਼ 720 ਵਿੱਚੋਂ ਜਨਰਲ/ਈ.ਡਬਲਿਊ.ਐੱਸ. (EWS) ਉਮੀਦਵਾਰਾਂ ਲਈ 262 ਅੰਕ, ਜਨਰਲ ਦਿਵਿਆਂਗ (PwBD) ਲਈ 244 ਅੰਕ ਅਤੇ ਐੱਸ.ਸੀ./ਐੱਸ.ਟੀ./ਓ.ਬੀ.ਸੀ. (ਦਿਵਿਆਂਗਾਂ ਸਮੇਤ) ਸ਼੍ਰੇਣੀਆਂ ਲਈ 226 ਅੰਕ ਨਿਰਧਾਰਤ ਕੀਤੇ ਗਏ ਹਨ।
ਬੋਰਡ (NBEMS) ਨੇ ਦੱਸਿਆ ਕਿ ਨਤੀਜੇ ਵਿੱਚ ਉਮੀਦਵਾਰਾਂ ਦੇ ਅਸਲ ਅੰਕ (Raw Scores) ਅਤੇ ਨੀਟ-ਪੀਜੀ ਰੈਂਕ ਸ਼ਾਮਲ ਹਨ। ਇਹ ਰੈਂਕ ਹਾਸਲ ਕੀਤੇ ਅਸਲ ਅੰਕਾਂ ਅਤੇ ਨਿਯਮਾਂ ਅਨੁਸਾਰ ਤੈਅ ਮਾਪਦੰਡਾਂ ਦੇ ਆਧਾਰ ’ਤੇ ਤਿਆਰ ਕੀਤੇ ਗਏ ਹਨ।
ਪ੍ਰੀਖਿਆ ਦੀ ਸਮੀਖਿਆ ਕਰਦਿਆਂ ਬੋਰਡ ਨੇ ਸਪੱਸ਼ਟ ਕੀਤਾ, "ਜਾਂਚ ਦੌਰਾਨ ਕੋਈ ਵੀ ਪ੍ਰਸ਼ਨ ਤਕਨੀਕੀ ਤੌਰ ’ਤੇ ਗਲਤ ਨਹੀਂ ਪਾਇਆ ਗਿਆ ਹੈ।"
ਉਮੀਦਵਾਰਾਂ ਦੇ ਵਿਅਕਤੀਗਤ ਸਕੋਰਕਾਰਡ ਅਤੇ ਉੱਤਰ-ਕੁੰਜੀ (Answer Key) 1 ਅਕਤੂਬਰ ਜਾਂ ਉਸ ਤੋਂ ਬਾਅਦ ਬੋਰਡ ਦੀ ਵੈੱਬਸਾਈਟ ’ਤੇ ਉਪਲੱਬਧ ਹੋਵੇਗੀ। ਪ੍ਰੀਖਿਆਰਥੀ ਆਪਣੇ ਲੌਗਇਨ ਰਾਹੀਂ ਪ੍ਰਸ਼ਨ ਆਈ.ਡੀ., ਉੱਤਰ-ਕੁੰਜੀ ਆਈ.ਡੀ., ਆਪਣੇ ਦਿੱਤੇ ਉੱਤਰ ਅਤੇ ਅੰਕ ਦੇਖ ਸਕਣਗੇ।
ਬੋਰਡ ਨੇ ਇਹ ਵੀ ਦੱਸਿਆ ਕਿ ਸੂਬਿਆਂ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਦੀਆਂ ਅਧਿਕਾਰਤ ਸੰਸਥਾਵਾਂ ਆਪਣੀਆਂ ਯੋਗਤਾ ਸ਼ਰਤਾਂ ਅਤੇ ਰਾਖਵੇਂਕਰਨ ਨੀਤੀਆਂ ਅਨੁਸਾਰ ਸੂਬਾ ਕੋਟੇ ਦੀਆਂ ਸੀਟਾਂ ਲਈ ਅੰਤਿਮ ਮੈਰਿਟ ਸੂਚੀਆਂ ਤਿਆਰ ਕਰਨਗੀਆਂ।
