Indigo: London ਤੋਂ ਦਿੱਲੀ ਆ ਰਹੀ ਉਡਾਣ ਤਕਨੀਕੀ ਖ਼ਰਾਬੀ ਕਾਰਨ ਵਾਪਸ ਮੋੜੀ
ਹਵਾ ’ਚ ਐਮਰਜੈਂਸੀ ਐਲਾਨ ਕੇ ਹੀਥਰੋ ਹਵਾਈ ਅੱਡੇ ’ਤੇ ਕਰਵਾਈ ਸੁਰੱਖਿਅਤ ਲੈਂਡਿੰਗ; ਸਾਰੇ ਯਾਤਰੀ ਸੁਰੱਖਿਅਤ
ਲੰਡਨ ਤੋਂ ਨਵੀਂ ਦਿੱਲੀ ਆ ਰਹੇ ਇੰਡੀਗੋ ਦੇ ਬੋਇੰਗ 787-9 ਡ੍ਰੀਮਲਾਈਨਰ ਜਹਾਜ਼ ਨੂੰ ਉਡਾਣ ਭਰਨ ਤੋਂ ਕੁਝ ਸਮੇਂ ਬਾਅਦ ਹੀ ਪਾਇਲਟਾਂ ਵੱਲੋਂ ਤਕਨੀਕੀ ਖ਼ਰਾਬੀ ਦਾ ਪਤਾ ਲੱਗਣ ਮਗਰੋਂ ਵਾਪਸ ਹੀਥਰੋ ਹਵਾਈ ਅੱਡੇ ਵੱਲ ਮੋੜਨਾ ਪਿਆ। ਪਾਇਲਟਾਂ ਵੱਲੋਂ ਹਵਾ ਵਿੱਚ ਹੀ ਐਮਰਜੈਂਸੀ ਐਲਾਨ ਦਿੱਤੀ ਗਈ, ਜਿਸ ਤੋਂ ਬਾਅਦ ਏਅਰ ਟਰੈਫਿਕ ਕੰਟਰੋਲ (ATC) ਨੇ ਜਹਾਜ਼ ਨੂੰ ਪਹਿਲ ਦੇ ਆਧਾਰ ’ਤੇ ਲੈਂਡਿੰਗ ਦੀ ਇਜਾਜ਼ਤ ਦਿੱਤੀ।
ਇੰਡੀਗੋ ਨੇ ਪੁਸ਼ਟੀ ਕੀਤੀ ਹੈ ਕਿ 22 ਸਤੰਬਰ ਨੂੰ ਲੰਡਨ ਹੀਥਰੋ ਤੋਂ ਦਿੱਲੀ ਦੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਲਈ ਰਵਾਨਾ ਹੋਈ ਉਡਾਣ '6E 04' ਸੁਰੱਖਿਅਤ ਤਰੀਕੇ ਨਾਲ ਹੀਥਰੋ ਵਿਖੇ ਵਾਪਸ ਲੈਂਡ ਕਰ ਗਈ ਹੈ। ਜਹਾਜ਼ ਨੂੰ ਤਕਨੀਕੀ ਜਾਂਚ ਲਈ ਰੋਕ ਲਿਆ ਗਿਆ ਹੈ ਅਤੇ ਲੋੜੀਂਦੀਆਂ ਪ੍ਰਵਾਨਗੀਆਂ ਮਿਲਣ ਤੋਂ ਬਾਅਦ ਹੀ ਇਸ ਨੂੰ ਮੁੜ ਸੇਵਾਵਾਂ ਵਿੱਚ ਸ਼ਾਮਲ ਕੀਤਾ ਜਾਵੇਗਾ।
ਇੰਗਲਿਸ਼ ਚੈਨਲ ਕੋਲ ਪਹੁੰਚ ਕੇ ਭੇਜਿਆ 'ਸਕੁਆਕ 7700' ਕੋਡ
ਰਜਿਸਟਰੇਸ਼ਨ ਨੰਬਰ LN-FND ਵਾਲੇ ਇਸ ਡ੍ਰੀਮਲਾਈਨਰ ਜਹਾਜ਼ ਨੇ ਯੂਕੇ ਦੇ ਸਥਾਨਕ ਸਮੇਂ ਅਨੁਸਾਰ ਰਾਤ ਲਗਭਗ 8:05 ਵਜੇ ਹੀਥਰੋ ਦੇ ਰਨਵੇਅ 27R ਤੋਂ ਉਡਾਣ ਭਰੀ ਸੀ ਅਤੇ ਦਿੱਲੀ ਲਈ ਆਪਣੀ ਲੰਮੀ ਦੂਰੀ ਦੀ ਯਾਤਰਾ ਲਈ ਉੱਚਾਈ ਵੱਲ ਵਧ ਰਿਹਾ ਸੀ। ਫਲਾਈਟ-ਟਰੈਕਿੰਗ ਡਾਟਾ ਅਨੁਸਾਰ ਜਿਵੇਂ ਹੀ ਜਹਾਜ਼ ਇੰਗਲਿਸ਼ ਚੈਨਲ ਕੋਲ ਪਹੁੰਚਿਆ, ਪਾਇਲਟਾਂ ਨੇ ਲਗਪਗ 24,000 ਫੁੱਟ ਦੀ ਉੱਚਾਈ ’ਤੇ ਇਸ ਨੂੰ ਅੱਗੇ ਵਧਣ ਤੋਂ ਰੋਕ ਦਿੱਤਾ।
ਇਸ ਤੋਂ ਤੁਰੰਤ ਬਾਅਦ ਪਾਇਲਟਾਂ ਨੇ ਸਕੁਆਕ ਕੋਡ 7700 (Squawk Code 7700) ਭੇਜਿਆ, ਜੋ ਕਿ ਹਵਾਈ ਜਹਾਜ਼ ਵਿੱਚ ਕਿਸੇ ਵੀ ਆਮ ਐਮਰਜੈਂਸੀ ਬਾਰੇ ਏਅਰ ਟਰੈਫਿਕ ਕੰਟਰੋਲ ਨੂੰ ਸੂਚਿਤ ਕਰਨ ਲਈ ਵਰਤਿਆ ਜਾਂਦਾ ਅੰਤਰਰਾਸ਼ਟਰੀ ਕੋਡ ਹੈ। ਐਮਰਜੈਂਸੀ ਦੇ ਐਲਾਨ ਤੋਂ ਬਾਅਦ ਕੰਟਰੋਲਰਾਂ ਨੇ ਡ੍ਰੀਮਲਾਈਨਰ ਨੂੰ ਪਹਿਲ ਦਿੰਦਿਆਂ ਬ੍ਰਿਟਿਸ਼ ਹਵਾਈ ਖੇਤਰ ਵੱਲ ਵਾਪਸ ਆਉਣ ਦਾ ਰਸਤਾ ਸਾਫ਼ ਕਰ ਦਿੱਤਾ, ਜਿਸ ਤੋਂ ਬਾਅਦ ਇਹ ਹੀਥਰੋ ਉੱਤਰ ਗਿਆ।
ਯਾਤਰੀਆਂ ਦੀ ਸੁਰੱਖਿਆ ਸਾਡੀ ਪਹਿਲੀ ਤਰਜੀਹ: ਇੰਡੀਗੋ
ਇੰਡੀਗੋ ਦੇ ਬੁਲਾਰੇ ਨੇ ਦੱਸਿਆ, "ਰਵਾਨਗੀ ਤੋਂ ਤੁਰੰਤ ਬਾਅਦ ਤਕਨੀਕੀ ਖ਼ਰਾਬੀ ਦਾ ਪਤਾ ਲੱਗਿਆ ਸੀ। ਮਿਆਰੀ ਸੰਚਾਲਨ ਪ੍ਰਕਿਰਿਆਵਾਂ (SOP) ਦੀ ਪਾਲਣਾ ਕਰਦੇ ਹੋਏ ਪਾਇਲਟਾਂ ਨੇ ਵਾਪਸ ਮੁੜਨ ਦਾ ਫ਼ੈਸਲਾ ਕੀਤਾ ਅਤੇ ਜਹਾਜ਼ ਨੂੰ ਲੰਡਨ ਹੀਥਰੋ ਹਵਾਈ ਅੱਡੇ ’ਤੇ ਸੁਰੱਖਿਅਤ ਲੈਂਡ ਕਰਵਾਇਆ।"
ਹਾਲਾਂਕਿ ਏਅਰਲਾਈਨ ਨੇ ਤਕਨੀਕੀ ਖ਼ਰਾਬੀ ਦੇ ਅਸਲ ਕਾਰਨ ਦਾ ਖੁਲਾਸਾ ਨਹੀਂ ਕੀਤਾ ਹੈ। 7700 ਕੋਡ ਦਾ ਮਤਲਬ ਇਹ ਨਹੀਂ ਹੁੰਦਾ ਕਿ ਕੋਈ ਵੱਡਾ ਖ਼ਤਰਾ ਹੈ, ਸਗੋਂ ਇਹ ਏਟੀਸੀ ਨੂੰ ਸੂਚਿਤ ਕਰਦਾ ਹੈ ਕਿ ਜਹਾਜ਼ ਨੂੰ ਪਹਿਲ ਦੇ ਆਧਾਰ ’ਤੇ ਮਦਦ ਦੀ ਲੋੜ ਹੈ ਤਾਂ ਜੋ ਜ਼ਮੀਨ ’ਤੇ ਐਮਰਜੈਂਸੀ ਸੇਵਾਵਾਂ ਤਿਆਰ ਰੱਖੀਆਂ ਜਾ ਸਕਣ।
ਏਅਰਲਾਈਨ ਨੇ ਦੱਸਿਆ ਕਿ ਪ੍ਰਭਾਵਿਤ ਯਾਤਰੀਆਂ ਨੂੰ ਹੋਟਲ ਵਿੱਚ ਠਹਿਰਾਉਣ ਦੀ ਵਿਵਸਥਾ ਕੀਤੀ ਗਈ ਹੈ ਅਤੇ ਉਨ੍ਹਾਂ ਨੂੰ ਦਿੱਲੀ ਲਈ ਅਗਲੀਆਂ ਉਪਲੱਬਧ ਉਡਾਣਾਂ ਰਾਹੀਂ ਭੇਜਿਆ ਜਾ ਰਿਹਾ ਹੈ। ਬੁਲਾਰੇ ਨੇ ਕਿਹਾ, "ਯਾਤਰੀਆਂ ਨੂੰ ਹੋਈ ਅਸੁਵਿਧਾ ਲਈ ਸਾਨੂੰ ਖੇਦ ਹੈ। ਯਾਤਰੀਆਂ, ਕਰੂ ਮੈਂਬਰਾਂ ਅਤੇ ਜਹਾਜ਼ ਦੀ ਸੁਰੱਖਿਆ ਸਾਡੀ ਸਭ ਤੋਂ ਪਹਿਲੀ ਤਰਜੀਹ ਹੈ।"
