ਇੰਡੀਗੋ, ਏਅਰ ਇੰਡੀਆ ਵੱਲੋਂ ਸਾਫਟਵੇਅਰ ਅੱਪਗ੍ਰੇਡ ਕਾਰਨ ਉਡਾਣਾਂ ਵਿੱਚ ਦੇਰੀ ਦੀ ਚੇਤਾਵਨੀ

ਏਅਰ ਇੰਡੀਆ ਅਤੇ ਇੰਡੀਗੋ ਨੇ ਏਅਰਬੱਸ ਦੇ ਇੱਕ ਨਵੇਂ ਤਕਨੀਕੀ ਨਿਰਦੇਸ਼ ਤੋਂ ਬਾਅਦ ਸੰਭਾਵਿਤ ਦੇਰੀ ਬਾਰੇ ਯਾਤਰੀਆਂ ਨੂੰ ਸਲਾਹ ਜਾਰੀ ਕੀਤੀ ਹੈ, ਜਿਸ ਕਾਰਨ ਕਈ ਘਰੇਲੂ ਰੂਟਾਂ 'ਤੇ ਹਵਾਈ ਯਾਤਰੀਆਂ ਨੂੰ ਵਿਘਨ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਇਹ ਨਿਰਦੇਸ਼ ਏਅਰਬੱਸ ਦੇ ਵਿਸ਼ਵਵਿਆਪੀ A320 ਪਰਿਵਾਰ ਦੇ ਫਲੀਟ ਲਈ ਜਾਰੀ ਕੀਤਾ ਗਿਆ ਹੈ।

ਏਅਰਬੱਸ ਨੇ ਆਪਣੇ A320 ਫਲੀਟ ਦੇ ਕੁਝ ਹਿੱਸੇ 'ਤੇ ਸਾਫਟਵੇਅਰ ਅਤੇ ਹਾਰਡਵੇਅਰ ਨੂੰ ਮੁੜ-ਵਿਵਸਥਿਤ (realignment) ਕਰਨ ਲਈ ਇੱਕ ਤਕਨੀਕੀ ਨਿਰਦੇਸ਼ ਜਾਰੀ ਕੀਤਾ ਹੈ। ਇਸ ਸਬੰਧੀ ਏਅਰਲਾਈਨਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਇਸ ਅੱਪਡੇਟ ਕਾਰਨ ਜਹਾਜ਼ਾਂ ਦਾ ਟਰਨਅਰਾਊਂਡ ਸਮਾਂ (turnaround time) ਲੰਬਾ ਹੋ ਜਾਵੇਗਾ, ਜਿਸ ਨਾਲ ਨਿਰਧਾਰਤ ਉਡਾਣ ਸੰਚਾਲਨ ਪ੍ਰਭਾਵਿਤ ਹੋ ਸਕਦਾ ਹੈ।

ਏਅਰ ਇੰਡੀਆ ਨੇ X (ਪਹਿਲਾਂ ਟਵਿੱਟਰ) 'ਤੇ ਪੋਸਟ ਸਾਂਝੀ ਕਰਦੇ ਹੋਏ ਅਸੁਵਿਧਾ ਲਈ ਅਫਸੋਸ ਪ੍ਰਗਟ ਕਰਦਿਆਂ ਯਾਤਰੀਆਂ ਨੂੰ ਸਫ਼ਰ ਕਰਨ ਤੋਂ ਪਹਿਲਾਂ ਉਡਾਣ ਦੀ ਸਥਿਤੀ (flight status) ਚੈੱਕ ਕਰਨ ਦੀ ਅਪੀਲ ਕੀਤੀ ਹੈ।

ਇੰਡੀਗੋ ਨੇ ਵੀ ਇੱਕ ਵੱਖਰੇ ਬਿਆਨ ਵਿੱਚ ਪੁਸ਼ਟੀ ਕੀਤੀ ਕਿ ਉਹ ਇਸ ਲਾਜ਼ਮੀ ਏਅਰਬੱਸ ਅੱਪਡੇਟ ਨੂੰ ਆਪਣੇ A320 ਜਹਾਜ਼ਾਂ 'ਤੇ ਲਾਗੂ ਕਰ ਰਹੀ ਹੈ ਅਤੇ ਚੇਤਾਵਨੀ ਦਿੱਤੀ ਹੈ ਕਿ ਇਸ ਪ੍ਰਕਿਰਿਆ ਦੌਰਾਨ ਕੁਝ ਉਡਾਣਾਂ ਦੇ ਸ਼ਡਿਊਲ ਵਿੱਚ ਮਾਮੂਲੀ ਤਬਦੀਲੀਆਂ ਹੋ ਸਕਦੀਆਂ ਹਨ।

ਦੋਵਾਂ ਕੰਪਨੀਆਂ ਨੇ ਗਾਹਕਾਂ ਨੂੰ ਭਰੋਸਾ ਦਿੱਤਾ ਹੈ ਕਿ ਉਹ ਏਅਰਬੱਸ ਦੁਆਰਾ ਲੋੜੀਂਦੇ ਇਹ ਸਾਵਧਾਨੀ ਦੇ ਉਪਾਅ ਲਾਗੂ ਕਰਦੇ ਹੋਏ ਯਾਤਰੀਆਂ ਨੂੰ ਪੇਸ਼ ਆਉਣ ਵਾਲੀਆਂ ਸਮੱਸਿਆਵਾਂ ਨੂੰ ਘੱਟ ਕਰਨ ਲਈ ਕੰਮ ਕਰ ਰਹੇ ਹਨ।