India Passport Stamp: ਭਾਰਤੀ ਹਵਾਈ ਅੱਡਿਆਂ ਤੋਂ ਬਾਹਰ ਜਾਣ ਵੇਲੇ ਪਾਸਪੋਰਟ ’ਤੇ ਨਹੀਂ ਲੱਗੇਗੀ ਮੋਹਰ
ਪਹਿਲੀ ਸਤੰਬਰ ਤੋਂ ਨਿਯਮ ਲਾਗੂ; ਇਮੀਗ੍ਰੇਸ਼ਨ ਕਲੀਅਰੈਂਸ ਵੇਲੇ ਫਿਜ਼ੀਕਲ ਬੋਰਡਿੰਗ ਪਾਸ ਦੀ ਲੋੜ ਖ਼ਤਮ ਕੀਤੀ
India Passport Stamp: ਭਾਰਤ ਤੋਂ ਪਹਿਲੀ ਸਤੰਬਰ ਤੋਂ ਹੋਰ ਦੇਸ਼ਾਂ ਵਿਚ ਜਾਣ ਵੇਲੇ ਭਾਰਤੀ ਪਾਸਪੋਰਟ ’ਤੇ ਇਮੀਗਰੇਸ਼ਨ ਕਲੀਅਰੈਂਸ ਦੀ ਮੋਹਰ ਨਹੀਂ ਲੱਗੇਗੀ ਤੇ ਭਾਰਤੀ ਪਾਸਪੋਰਟ ਧਾਰਕਾਂ ਨੂੰ ਈ ਬੋਰਡਿੰਗ ਪਾਸ ਹੀ ਦਿਖਾਉਣਾ ਹੋਵੇਗਾ।
ਇਮੀਗ੍ਰੇਸ਼ਨ ਬਿਊਰੋ ਨੇ ਐਲਾਨ ਕੀਤਾ ਹੈ ਕਿ 1 ਸਤੰਬਰ ਤੋਂ ਅੰਤਰਰਾਸ਼ਟਰੀ ਸਫਰ ਕਰਨ ਵਾਲੇ ਯਾਤਰੀ ਭਾਰਤੀ ਹਵਾਈ ਅੱਡਿਆਂ ’ਤੇ ਇਮੀਗ੍ਰੇਸ਼ਨ ਕਲੀਅਰੈਂਸ ਦੌਰਾਨ ਆਪਣੇ ਸਮਾਰਟਫ਼ੋਨਾਂ ’ਤੇ ਦਿਖਾਈ ਦੇਣ ਵਾਲੇ ਈ-ਬੋਰਡਿੰਗ ਪਾਸ (e-boarding passes) ਦੀ ਵਰਤੋਂ ਕਰ ਸਕਣਗੇ ਕਿਉਂਕਿ ਇਨ੍ਹਾਂ ਦਸਤਾਵੇਜ਼ਾਂ 'ਤੇ ਫਿਜ਼ੀਕਲ ਮੋਹਰ (ਸਟੈਂਪ) ਲਗਾਉਣ ਦੀ ਪ੍ਰਕਿਰਿਆ ਨੂੰ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤਾ ਗਿਆ ਹੈ।
ਗ੍ਰਹਿ ਮੰਤਰਾਲੇ ਤਹਿਤ ਕੰਮ ਕਰਨ ਵਾਲੀ ਇਸ ਏਜੰਸੀ ਨੇ ਅੱਜ ਆਪਣੇ ਸੋਸ਼ਲ ਮੀਡੀਆ ਹੈਂਡਲ 'ਐਕਸ' 'ਤੇ ਮਹੱਤਵਪੂਰਨ ਜਾਣਕਾਰੀ ਸਾਂਝੀ ਕਰਦਿਆਂ ਕਿਹਾ ਕਿ ਇਸ ਕਦਮ ਦਾ ਮਤਲਬ ਘੱਟ ਕਾਗਜ਼ ਦੀ ਵਰਤੋਂ ਅਤੇ ਵਧੇਰੇ ਆਸਾਨ ਯਾਤਰਾ ਬਣਾਉਣਾ ਹੈ।
ਬੀ.ਓ.ਆਈ. ਨੇ ਆਪਣੀ ਪੋਸਟ ਵਿੱਚ ਕਿਹਾ ਕਿ 1 ਸਤੰਬਰ ਤੋਂ ਅੰਤਰਰਾਸ਼ਟਰੀ ਯਾਤਰੀ ਡਿਜੀਟਲ ਹੋ ਸਕਦੇ ਹਨ ਕਿਉਂਕਿ ਹੁਣ ਈ-ਬੋਰਡਿੰਗ ਪਾਸ ਸਵੀਕਾਰ ਕੀਤੇ ਜਾਣਗੇ। ਅੰਤਰਰਾਸ਼ਟਰੀ ਯਾਤਰੀ ਇਮੀਗ੍ਰੇਸ਼ਨ ਕਲੀਅਰੈਂਸ ਦੌਰਾਨ ਆਪਣੇ ਸਮਾਰਟਫ਼ੋਨਾਂ 'ਤੇ ਦਿਖਾਏ ਗਏ ਈ-ਬੋਰਡਿੰਗ ਪਾਸ ਦੀ ਵਰਤੋਂ ਕਰ ਸਕਦੇ ਹਨ। ਇਸ ਤੋਂ ਇਲਾਵਾ ਫਾਸਟ ਟ੍ਰੈਕ ਇਮੀਗ੍ਰੇਸ਼ਨ-ਟਰੱਸਟਡ ਟਰੈਵਲਰ ਪ੍ਰੋਗਰਾਮ ਵਿੱਚ ਦਾਖ਼ਲ ਯਾਤਰੀ ਵੀ ਈ-ਗੇਟਾਂ 'ਤੇ ਇਨ੍ਹਾਂ ਦੀ ਵਰਤੋਂ ਕਰ ਸਕਦੇ ਹਨ।
ਇਮੀਗ੍ਰੇਸ਼ਨ ਕਲੀਅਰੈਂਸ ਦੌਰਾਨ ਬੋਰਡਿੰਗ ਪਾਸਾਂ 'ਤੇ ਹੁਣ ਮੋਹਰ ਨਹੀਂ ਲਗਾਈ ਜਾਵੇਗੀ। ਏਜੰਸੀ ਨੇ ਕਿਹਾ ਕਿ ਫਿਜ਼ੀਕਲ ਬੋਰਡਿੰਗ ਪਾਸ ਸਵੀਕਾਰ ਕੀਤੇ ਜਾਣਗੇ ਪਰ ਉਨ੍ਹਾਂ 'ਤੇ ਸਟੈਂਪ ਨਹੀਂ ਲੱਗੇਗੀ। ਹਵਾਈ ਅੱਡੇ ਦੀ ਸੁਰੱਖਿਆ ਵਿੱਚ ਸ਼ਾਮਲ ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਈ-ਬੋਰਡਿੰਗ ਪਾਸ ਦੀ ਇਸ ਨਵੀਂ ਵਿਵਸਥਾ ਨਾਲ ਬੋਰਡਿੰਗ ਤੋਂ ਪਹਿਲਾਂ ਕੇਂਦਰੀ ਉਦਯੋਗਿਕ ਸੁਰੱਖਿਆ ਬਲ (CISF) ਵੱਲੋਂ ਸਟੈਂਪ ਲਗਾਉਣ ਦੀ ਲੋੜ ਵੀ ਖ਼ਤਮ ਹੋ ਜਾਵੇਗੀ।
