India Ladakh Map: ਭਾਰਤ ਨੇ ਲਦਾਖ ਦੀਆਂ 28 ਥਾਵਾਂ ਨੂੰ ਸਰਕਾਰੀ ਨਕਸ਼ੇ ’ਤੇ ਦਿੱਤੇ ਨਵੇਂ ਨਾਮ
ਸਰਵੇਅ ਆਫ਼ ਇੰਡੀਆ ਨੇ ਜਾਰੀ ਕੀਤਾ ਲਦਾਖ ਦਾ ਨਵਾਂ ਨਕਸ਼ਾ
ਭਾਰਤ ਸਰਕਾਰ ਨੇ ਲਦਾਖ ਵਿੱਚ ਆਪਣੀ ਜ਼ਮੀਨ ’ਤੇ ਹੱਕ ਮਜ਼ਬੂਤ ਕਰਨ ਲਈ ਇੱਕ ਵੱਡਾ ਫੈਸਲਾ ਲਿਆ ਹੈ। ਸਰਕਾਰ ਨੇ ਲਦਾਖ ਦੀਆਂ 28 ਥਾਵਾਂ ਦੇ ਨਾਮ ‘ਸਰਵੇਅ ਆਫ਼ ਇੰਡੀਆ’ ਦੇ ਸਰਕਾਰੀ ਨਕਸ਼ੇ ਵਿੱਚ ਦਰਜ ਕਰ ਦਿੱਤੇ ਹਨ। ਇਹ ਕਦਮ ਚੀਨ ਨੂੰ ਜਵਾਬ ਦੇਣ ਲਈ ਚੁੱਕਿਆ ਗਿਆ ਹੈ। ਚੀਨ ਅਕਸਰ ਸਰਹੱਦੀ ਇਲਾਕਿਆਂ ਦੇ ਨਾਮ ਬਦਲ ਕੇ ਉਨ੍ਹਾਂ ’ਤੇ ਆਪਣਾ ਦਾਅਵਾ ਕਰਦਾ ਹੈ। ਹੁਣ ਭਾਰਤ ਦੇ ਸਰਕਾਰੀ ਰਿਕਾਰਡ ਵਿੱਚ ਇਹ ਨਾਮ ਪੱਕੇ ਤੌਰ ’ਤੇ ਦਰਜ ਹੋ ਗਏ ਹਨ।
ਇਨ੍ਹਾਂ 28 ਨਾਵਾਂ ਵਿੱਚ ਪਹਾੜੀ ਚੋਟੀਆਂ, ਗਲੇਸ਼ੀਅਰ, ਦਰਿਆ, ਝੀਲਾਂ ਅਤੇ ਨਦੀਆਂ ਸ਼ਾਮਲ ਹਨ। ਇਨ੍ਹਾਂ ਵਿੱਚੋਂ ਕੁਝ ਮੁੱਖ ਨਾਮ ਹਨ- ਅਤਿਸ਼ਾ ਗਿਰੀ, ਕਨਿਸ਼ਕ ਪੀਕ, ਜ਼ੋਰਾਵਰ ਪੀਕ, ਗੁਰੂ ਰਿਨਪੋਚੇ ਝੀਲ ਅਤੇ ਯਾਂਗਪਾ ਨਦੀ। ਸਰਕਾਰ ਨੇ ਦੱਸਿਆ ਕਿ ਇਹ ਨਾਮ ਲਦਾਖ ਪ੍ਰਸ਼ਾਸਨ ਨਾਲ ਸਲਾਹ ਕਰਕੇ ਰੱਖੇ ਗਏ ਹਨ। ਇਸ ਨਾਲ ਲੋਕਾਂ ਨੂੰ ਇਨ੍ਹਾਂ ਥਾਵਾਂ ਬਾਰੇ ਸਹੀ ਜਾਣਕਾਰੀ ਮਿਲੇਗੀ।
ਚੀਨ ਨੇ ਪਹਿਲਾ ਅਰੁਣਾਚਲ ਪ੍ਰਦੇਸ਼ ਦੀਆਂ ਕਈ ਥਾਵਾਂ ਦੇ ਬਦਲੇ ਸਨ ਨਾਮ
ਚੀਨ ਨੇ ਪਹਿਲਾਂ ਅਰੁਣਾਚਲ ਪ੍ਰਦੇਸ਼ ਦੀਆਂ ਕਈ ਥਾਵਾਂ ਦੇ ਨਾਮ ਬਦਲੇ ਸਨ। ਭਾਰਤ ਨੇ ਕਿਹਾ ਸੀ ਕਿ ਝੂਠੇ ਨਾਮ ਰੱਖਣ ਨਾਲ ਜ਼ਮੀਨ ਚੀਨ ਦੀ ਨਹੀਂ ਹੋ ਜਾਵੇਗੀ। ਹੁਣ ਭਾਰਤ ਨੇ ਖੁਦ ਸਰਕਾਰੀ ਨਕਸ਼ੇ ਵਿੱਚ ਇਹ ਨਾਮ ਦਰਜ ਕਰਕੇ ਆਪਣਾ ਪੱਖ ਮਜ਼ਬੂਤ ਕੀਤਾ ਹੈ। ਇਹ ਨਾਮ ਸਾਡੇ ਇਤਿਹਾਸ ਨਾਲ ਵੀ ਜੁੜੇ ਹੋਏ ਹਨ। ਜਿਵੇਂ ‘ਜ਼ੋਰਾਵਰ ਪੀਕ’ ਜਨਰਲ ਜ਼ੋਰਾਵਰ ਸਿੰਘ ਦੇ ਨਾਮ ’ਤੇ ਹੈ ਅਤੇ ‘ਗੁਰੂ ਰਿਨਪੋਚੇ’ ਬੋਧੀ ਧਰਮ ਦੇ ਮਹਾਨ ਗੁਰੂ ਦੇ ਨਾਮ ’ਤੇ ਹੈ। ਇਹ ਨਵਾਂ ਨਕਸ਼ਾ ਸਰਵੇਅ ਆਫ਼ ਇੰਡੀਆ ਦੀ ਵੈੱਬਸਾਈਟ ’ਤੇ ਦੇਖਿਆ ਜਾ ਸਕਦਾ ਹੈ।
