ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 22 ਅਕਤੂਬਰ
ਦਿੱਲੀ ਸਰਕਾਰ ਦੇ ਗੁਰਦੁਆਰਾ ਚੋਣ ਮੰਤਰੀ ਰਾਜਿੰਦਰ ਪਾਲ ਗੌਤਮ ਨੇ ਅੱਜ ਰਾਜਧਾਨੀ ਦੇ ਗੁਰਦੁਆਰਾ ਹਲਕਿਆਂ (ਵਾਰਡਾਂ) ਦੀ ਵੋਟਰ ਸੂਚੀ ਨੂੰ ਸੋਧਣ ਲਈ ਤਿਆਰ ਕੀਤੇ ਗਏ ਇੱਕ ਨਵੇਂ ਸਾਫਟਵੇਅਰ ਦਾ ਉਦਘਾਟਨ ਕੀਤਾ। ਇਸ ਮੌਕੇ ਉਨ੍ਹਾਂ ਕਿਹਾ ਕਿ ਕੋਵਿਡ ਮਹਾਮਾਰੀ ਵਿੱਚ ਲੋੜੀਂਦੀ ਦੂਰੀ ਬਣਾਈ ਰੱਖਦੇ ਹੋਏ ਆਨਲਾਈਨ ਫਾਰਮ ਜਮ੍ਹਾਂ ਕਰਨਾ ਲਾਭਦਾਇਕ ਹੈ। ਡਾਇਰੈਕਟੋਰੇਟ ਆਫ਼ ਗੁਰਦੁਆਰਾ ਚੋਣਾਂ ਨੇ ਅੱਜ ਤੋਂ ਗੁਰਦੁਆਰਾ ਵਾਰਡਾਂ ਦੀ ਸੂਚੀ ਦੀ ‘ਆਨਲਾਈਨ’ ਤੇ ‘ਆਫਲਾਈਨ’ ਦੀ ਸ਼ੁਰੂਆਤ ਕੀਤੀ ਹੈ। ਇਸ ਕਾਰਜ ਲਈ ਫਾਰਮ ਜਮ੍ਹਾਂ ਕਰਨ ਦੀ ਆਖ਼ਰੀ ਤਰੀਕ 20.11.2020 ਨਿਰਧਾਰਤ ਕੀਤੀ ਗਈ ਹੈ। ਗੁਰਦੁਆਰਾ ਚੋਣਾਂ ਦੇ ਵੋਟਰਾਂ ਦੀ ਸਹੂਲਤ ਲਈ ਰਾਜਧਾਨੀ ਦੇ ਨਾਮਜ਼ਦ ਸਾਰੇ 46 ਕੇਂਦਰਾਂ ’ਚ ਜ਼ਰੂਰੀ ਸਟਾਫ ਦੀ ਨਿਯੁਕਤੀ ਕੀਤੀ ਗਈ ਹੈ। ਸ੍ਰੀ ਗੌਤਮ ਨੇ ਕਿਹਾ ਕਿ ਗੁਰਦੁਆਰਾ ਚੋਣ ਡਾਇਰੈਕਟੋਰੇਟ ਦੀ ਪਹਿਲਕਦਮੀ ਤੇ ਦਿੱਲੀ ਸਰਕਾਰ ਦੇ ਸੂਚਨਾ ਤੇ ਤਕਨਾਲੋਜੀ ਵਿਭਾਗ ਦੀ ਇੱਕ ਕੰਪਨੀ, ਡੀ-ਜੀਐੱਸ ਨੇ ਪਹਿਲੀ ਵਾਰ ਇੱਕ ਸਾਫਟਵੇਅਰ ਤਿਆਰ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਪੋਰਟਲ ਨਾਲ ਸਬੰਧਤ ਸਾਫਟਵੇਅਰ ਐਪਲੀਕੇਸ਼ਨ ਬਣਾਉਣ ਤੇ ਚਲਾਉਣ ਦਾ ਕੰਮ ਡੀ-ਜੀਐਸ ਕੰਪਨੀ ਨੂੰ ਦਿੱਤਾ ਗਿਆ ਹੈ। ਗੁਰਦੁਆਰਾ ਚੋਣ ਮੰਤਰੀ ਨੇ ਕਿਹਾ ਕਿ ਗੁਰਦੁਆਰਾ ਚੋਣ ਡਾਇਰੈਕਟੋਰੇਟ ਨੇ ਸਾਰੀ ਦਿੱਲੀ ਦੇ ਗੁਰਦੁਆਰਾ ਵਾਰਡਾਂ ਅਨੁਸਾਰ 46 ਜ਼ੋਨਲ ਦਫਤਰ ਸਥਾਪਤ ਕੀਤੇ ਹਨ। ਗੁਰਦੁਆਰਾ ਚੋਣ ਮੰਤਰੀ ਨੇ ਦੱਸਿਆ ਕਿ ਇਸ ਆਨ ਲਾਈਨ ਪੋਰਟਲ ਰਾਹੀਂ ਗੁਰਦੁਆਰਾ ਚੋਣਾਂ ਦੇ ਵੱਡੀ ਗਿਣਤੀ ਵੋਟਰ ਆਪਣੀ ਸਹੂਲਤ ਅਨੁਸਾਰ ਵੋਟਰ ਸੂਚੀ ’ਚ ਆਪਣੇ ਨਾਮ ਸ਼ਾਮਲ ਕਰਨ ਦੀ ਸਹੂਲਤ ਲੈ ਸਕਦੇ ਹਨ। ਇਸ ਐਪਲੀਕੇਸ਼ਨ ਵਿਚ ਵਾਰਡ ਦੇ ਸਾਰੇ ਵੇਰਵਿਆਂ, ਵਾਰਡ ’ਚ ਆਉਣ ਵਾਲੇ ਖੇਤਰ / ਸਥਾਨ ਦਾ ਨਾਮ ਤੇ ਦਾਖਲੇ ਲਈ ਭਰੀ ਗਈ ਦਰਖਾਸਤ ਦੀ ਸਥਿਤੀ ਵੀ ਵੇਖੀ ਜਾ ਸਕਦੀ ਹੈ।
ਇਸ ਸਾਫਟਵੇਅਰ ਐਪਲੀਕੇਸ਼ਨ ਦੇ ਲੰਬੇ ਸਮੇਂ ਦੇ ਲਾਭ ਹੋਣਗੇ ਤੇ ਭਵਿੱਖ ’ਚ ਵੀ ਇਕੱਠੀ ਕੀਤੀ ਜਾਣਕਾਰੀ ਦੀ ਵਰਤੋਂ ਕਰਨ ਦੇ ਯੋਗ ਹੋਣਗੇ। ਇਹ ਕਿਸੇ ਵੀ ਕਿਸਮ ਦੇ ਕਾਨੂੰਨੀ ਮਾਮਲੇ ਵਿਚ ਨਾਮਜ਼ਦ ਚੁਣੇ ਗਏ ਵੋਟਰਾਂ ਦੀ ਪ੍ਰਮਾਣਿਕਤਾ ਨੂੰ ਸਾਬਤ ਕਰਨ ਵਿਚ ਸਹਾਇਤਾ ਕਰੇਗਾ।