ਗ੍ਰੇਟ ਨਿਕੋਬਾਰ ਪ੍ਰੋਜੈਕਟ ਸਭ ਤੋਂ ਵੱਡੇ ਘੁਟਾਲਿਆਂ ਵਿੱਚੋਂ ਇੱਕ: Rahul Gandhi
ਕਾਂਗਰਸ ਦੇ ਸੀਨੀਅਰ ਆਗੂ ਰਾਹੁਲ ਗਾਂਧੀ ਨੇ ਬੁੱਧਵਾਰ ਨੂੰ ਕਿਹਾ ਕਿ ਅੰਡੇਮਾਨ ਅਤੇ ਨਿਕੋਬਾਰ ਟਾਪੂ ਦੇ ਕੈਂਪਬੈਲ ਬੇਅ ਵਿੱਚ ਗ੍ਰੇਟ ਨਿਕੋਬਾਰ ਪ੍ਰੋਜੈਕਟ "ਦੇਸ਼ ਦੀ ਕੁਦਰਤੀ ਅਤੇ ਕਬਾਇਲੀ ਵਿਰਾਸਤ ਵਿਰੁੱਧ ਸਭ ਤੋਂ ਵੱਡੇ ਘੁਟਾਲਿਆਂ ਅਤੇ ਸਭ ਤੋਂ ਗੰਭੀਰ ਅਪਰਾਧਾਂ ਵਿੱਚੋਂ ਇੱਕ"...
ਕਾਂਗਰਸ ਦੇ ਸੀਨੀਅਰ ਆਗੂ ਰਾਹੁਲ ਗਾਂਧੀ ਨੇ ਬੁੱਧਵਾਰ ਨੂੰ ਕਿਹਾ ਕਿ ਅੰਡੇਮਾਨ ਅਤੇ ਨਿਕੋਬਾਰ ਟਾਪੂ ਦੇ ਕੈਂਪਬੈਲ ਬੇਅ ਵਿੱਚ ਗ੍ਰੇਟ ਨਿਕੋਬਾਰ ਪ੍ਰੋਜੈਕਟ "ਦੇਸ਼ ਦੀ ਕੁਦਰਤੀ ਅਤੇ ਕਬਾਇਲੀ ਵਿਰਾਸਤ ਵਿਰੁੱਧ ਸਭ ਤੋਂ ਵੱਡੇ ਘੁਟਾਲਿਆਂ ਅਤੇ ਸਭ ਤੋਂ ਗੰਭੀਰ ਅਪਰਾਧਾਂ ਵਿੱਚੋਂ ਇੱਕ" ਹੈ। ਉਨ੍ਹਾਂ ਕਿਹਾ ਕਿ ਇਸ ਪ੍ਰੋਜੈਕਟ ਲਈ 160 ਵਰਗ ਕਿਲੋਮੀਟਰ ਦੇ ਰੇਨਫੋਰੈਸਟ (ਵਰਖਾ ਜੰਗਲ) ਵਿੱਚ ਲੱਖਾਂ ਦਰੱਖਤਾਂ ਦੀ ਕਟਾਈ ਕੀਤੀ ਜਾਵੇਗੀ ਅਤੇ ਉਨ੍ਹਾਂ ਨੇ ਇਸ ਨੂੰ "ਵਿਕਾਸ ਦੀ ਭਾਸ਼ਾ ਵਿੱਚ ਲਿਪਟੀ ਹੋਈ ਤਬਾਹੀ" ਕਰਾਰ ਦਿੱਤਾ।
ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਆਗੂ ਨੇ ਇੱਕ ਸੋਸ਼ਲ ਮੀਡੀਆ ਪੋਸਟ ਵਿੱਚ ਕਿਹਾ, “ਮੈਂ ਅੱਜ ਪੂਰੇ ਗ੍ਰੇਟ ਨਿਕੋਬਾਰ ਦੀ ਯਾਤਰਾ ਕੀਤੀ। ਇਹ ਸਭ ਤੋਂ ਅਸਾਧਾਰਨ ਜੰਗਲ ਹਨ ਜੋ ਮੈਂ ਆਪਣੀ ਜ਼ਿੰਦਗੀ ਵਿੱਚ ਕਦੇ ਦੇਖੇ ਹਨ। ਯਾਦਾਂ ਤੋਂ ਵੀ ਪੁਰਾਣੇ ਦਰੱਖਤ। ਉਹ ਜੰਗਲ ਜਿਨ੍ਹਾਂ ਨੂੰ ਉੱਗਣ ਵਿੱਚ ਪੀੜ੍ਹੀਆਂ ਲੱਗ ਗਈਆਂ। ਇਸ ਟਾਪੂ ਦੇ ਲੋਕ ਵੀ ਓਨੇ ਹੀ ਖੂਬਸੂਰਤ ਹਨ - ਭਾਵੇਂ ਉਹ ਆਦਿਵਾਸੀ ਭਾਈਚਾਰੇ ਦੇ ਹੋਣ ਜਾਂ ਵਸਨੀਕ, ਪਰ ਉਨ੍ਹਾਂ ਤੋਂ ਉਹ ਸਭ ਕੁਝ ਖੋਹਿਆ ਜਾ ਰਿਹਾ ਹੈ ਜੋ ਹੱਕੀ ਤੌਰ 'ਤੇ ਉਨ੍ਹਾਂ ਦਾ ਹੈ।”
ਉਨ੍ਹਾਂ ਅੱਗੇ ਕਿਹਾ, “ਸਰਕਾਰ ਜਿਸ ਨੂੰ ਇੱਥੇ 'ਪ੍ਰੋਜੈਕਟ' ਕਹਿ ਰਹੀ ਹੈ, ਜੋ ਮੈਂ ਦੇਖਿਆ ਹੈ ਉਹ ਪ੍ਰੋਜੈਕਟ ਨਹੀਂ ਹੈ। ਇਹ ਲੱਖਾਂ ਦਰੱਖਤ ਹਨ ਜਿਨ੍ਹਾਂ 'ਤੇ ਕੁਹਾੜੀ ਚੱਲਣੀ ਤੈਅ ਹੈ। ਇਹ 160 ਵਰਗ ਕਿਲੋਮੀਟਰ ਦਾ ਰੇਨਫੋਰੈਸਟ ਹੈ ਜਿਸ ਨੂੰ ਮਰਨ ਲਈ ਮਜਬੂਰ ਕੀਤਾ ਗਿਆ ਹੈ। ਇਹ ਉਹ ਭਾਈਚਾਰੇ ਹਨ ਜਿਨ੍ਹਾਂ ਨੂੰ ਨਜ਼ਰਅੰਦਾਜ਼ ਕੀਤਾ ਗਿਆ ਹੈ ਜਦੋਂ ਕਿ ਉਨ੍ਹਾਂ ਦੇ ਘਰ ਖੋਹ ਲਏ ਗਏ ਹਨ। ਇਹ ਵਿਕਾਸ ਨਹੀਂ ਹੈ। ਇਹ ਵਿਕਾਸ ਦੀ ਭਾਸ਼ਾ ਵਿੱਚ ਲਿਪਟੀ ਤਬਾਹੀ ਹੈ।”
ਕੇਂਦਰ ਸਰਕਾਰ ਦਾ ਕਹਿਣਾ ਹੈ ਕਿ 81,000 ਕਰੋੜ ਰੁਪਏ\B ਦਾ ਇਹ ਪ੍ਰੋਜੈਕਟ, ਜਿਸ ਵਿੱਚ ਇੱਕ ਟ੍ਰਾਂਸਸ਼ਿਪਮੈਂਟ ਟਰਮੀਨਲ, ਇੱਕ ਪਾਵਰ ਪਲਾਂਟ ਅਤੇ ਇੱਕ ਟਾਊਨਸ਼ਿਪ ਸ਼ਾਮਲ ਹੈ, ਸਮੁੰਦਰੀ ਵਪਾਰ, ਕਨੈਕਟੀਵਿਟੀ ਅਤੇ ਸੁਰੱਖਿਆ ਨੂੰ ਹੁਲਾਰਾ ਦੇਵੇਗਾ, ਜੋ ਦੇਸ਼ ਦੇ ਭੂ-ਰਣਨੀਤਕ ਅਤੇ ਆਰਥਿਕ ਹਿੱਤਾਂ ਨੂੰ ਉਤਸ਼ਾਹਿਤ ਕਰਨ ਵਿੱਚ ਮਦਦਗਾਰ ਸਾਬਤ ਹੋਵੇਗਾ।
ਮੰਗਲਵਾਰ ਨੂੰ ਗਾਂਧੀ ਇਸ ਪ੍ਰੋਜੈਕਟ ਦੇ ਖਿਲਾਫ ਕਬਾਇਲੀ ਆਗੂਆਂ ਨੂੰ ਮਿਲਣ ਲਈ ਨਿਕੋਬਾਰ ਜ਼ਿਲ੍ਹੇ ਦੇ ਕੈਂਪਬੈਲ ਬੇਅ ਗਏ ਸਨ। ਕਬਾਇਲੀ ਭਾਈਚਾਰਿਆਂ ਦਾ ਇੱਕ ਹਿੱਸਾ ਪਾਰਦਰਸ਼ਤਾ ਦੀ ਘਾਟ, ਵਾਤਾਵਰਣ ਦੇ ਖਤਰਿਆਂ ਅਤੇ ਕੇਂਦਰ ਸਰਕਾਰ ਦੁਆਰਾ ਕਬਾਇਲੀ ਅਧਿਕਾਰਾਂ ਦੀ ਲਗਾਤਾਰ ਅਣਦੇਖੀ ਦਾ ਦੋਸ਼ ਲਗਾ ਰਿਹਾ ਹੈ।
26 ਅਪਰੈਲ ਨੂੰ ਅੰਡੇਮਾਨ ਅਤੇ ਨਿਕੋਬਾਰ ਟਾਪੂ ਪਹੁੰਚੇ ਰਾਹੁਲ ਗਾਂਧੀ ਨੇ ਕੇਂਦਰ ਸ਼ਾਸਤ ਪ੍ਰਦੇਸ਼ ਵਿੱਚ ਕਾਰਪੋਰੇਟ ਪ੍ਰਭਾਵ ਦੀ ਵੀ ਆਲੋਚਨਾ ਕੀਤੀ ਅਤੇ ਜ਼ੋਰ ਦਿੱਤਾ ਕਿ ਵਿਕਾਸ ਵਿੱਚ ਕਾਰਪੋਰੇਟ ਹਿੱਤਾਂ ਦੀ ਬਜਾਏ ਸਥਾਨਕ ਲੋਕਾਂ ਦੀਆਂ ਲੋੜਾਂ ਨੂੰ ਪਹਿਲ ਦਿੱਤੀ ਜਾਣੀ ਚਾਹੀਦੀ ਹੈ। ਆਪਣੀ ਫੇਰੀ ਦੌਰਾਨ ਉਨ੍ਹਾਂ ਨੇ ਨਿਕੋਬਾਰੀ ਕਬਾਇਲੀ ਭਾਈਚਾਰੇ ਦੇ ਮੈਂਬਰਾਂ ਨਾਲ ਗੱਲਬਾਤ ਕੀਤੀ ਅਤੇ ਸੈਟਲਰ ਭਾਈਚਾਰੇ ਦੇ ਮੈਂਬਰਾਂ ਨਾਲ ਵੀ ਮੁਲਾਕਾਤ ਕੀਤੀ। ਉਨ੍ਹਾਂ ਨੇ ਇੰਦਰਾ ਪੁਆਇੰਟ\B ਦਾ ਦੌਰਾ ਵੀ ਕੀਤਾ ਅਤੇ ਸਾਬਕਾ ਪ੍ਰਧਾਨ ਮੰਤਰੀ ਸਵਰਗੀ ਇੰਦਰਾ ਗਾਂਧੀ ਨੂੰ ਸ਼ਰਧਾਂਜਲੀ ਭੇਟ ਕੀਤੀ। ਕਬਾਇਲੀ ਭਾਈਚਾਰਿਆਂ ਨੇ ਦੋਸ਼ ਲਾਇਆ ਕਿ ਪ੍ਰਸਤਾਵਿਤ ਪ੍ਰੋਜੈਕਟ ਕਾਰਨ ਉਨ੍ਹਾਂ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ ਅਤੇ ਮੰਗ ਕੀਤੀ ਕਿ ਕੇਂਦਰ ਸਰਕਾਰ ਉਨ੍ਹਾਂ ਦੀਆਂ ਚਿੰਤਾਵਾਂ ਨੂੰ ਧਿਆਨ ਵਿੱਚ ਰੱਖੇ।
