ਦਿੱਲੀ ਦੀਆਂ ਔਰਤਾਂ ਲਈ ਖ਼ੁਸ਼ਖ਼ਬਰੀ: ਰਾਸ਼ਟਰਪਤੀ ਮੁਰਮੂ ਲਾਂਚ ਕਰਨਗੇ ਮੁਫ਼ਤ 'Pink mobility card'
ਔਰਤਾਂ ਨੂੰ ਹੋਲੀ-ਦੀਵਾਲੀ 'ਤੇ ਮਿਲੇਗਾ ਮੁਫ਼ਤ ਸਿਲੰਡਰ
ਦਿੱਲੀ ਸਰਕਾਰ ਸੋਮਵਾਰ ਨੂੰ 'ਪਿੰਕ ਨੈਸ਼ਨਲ ਕਾਮਨ ਮੋਬਿਲਿਟੀ ਕਾਰਡ' (NCMC) ਲਾਂਚ ਕਰਨ ਜਾ ਰਹੀ ਹੈ। ਇਸ ਦਾ ਉਦੇਸ਼ ਕੌਮੀ ਰਾਜਧਾਨੀ ਵਿੱਚ ਔਰਤਾਂ ਨੂੰ ਬੱਸਾਂ ਵਿੱਚ ਮੁਫ਼ਤ ਸਫ਼ਰ ਦੀ ਸਹੂਲਤ ਦੇਣਾ ਅਤੇ ਇੱਕੋ ਸਮਾਰਟ ਕਾਰਡ ਰਾਹੀਂ ਵੱਖ-ਵੱਖ ਜਨਤਕ ਟ੍ਰਾਂਸਪੋਰਟ ਪ੍ਰਣਾਲੀਆਂ ਤੱਕ ਆਸਾਨ ਪਹੁੰਚ ਬਣਾਉਣਾ ਹੈ।
ਇੱਕ ਬਿਆਨ ਅਨੁਸਾਰ, ਰਾਸ਼ਟਰਪਤੀ ਦਰੋਪਦੀ ਮੁਰਮੂ ਇੰਦਰਾ ਗਾਂਧੀ ਇੰਡੋਰ ਸਟੇਡੀਅਮ ਵਿੱਚ "ਸਸ਼ਕਤ ਨਾਰੀ, ਸਮ੍ਰਿਧ ਦਿੱਲੀ" ਨਾਮਕ ਪ੍ਰੋਗਰਾਮ ਦੌਰਾਨ ਇਸ ਦੀ ਰਸਮੀ ਸ਼ੁਰੂਆਤ ਕਰਨਗੇ। ਇਸੇ ਸਮਾਗਮ ਵਿੱਚ ਰਾਸ਼ਟਰਪਤੀ ਦਿੱਲੀ ਦੇ ਸਾਰੇ ਰਾਸ਼ਨ ਕਾਰਡ ਧਾਰਕ ਪਰਿਵਾਰਾਂ ਨੂੰ ਹੋਲੀ ਅਤੇ ਦੀਵਾਲੀ ਦੇ ਮੌਕੇ 'ਤੇ ਸਾਲਾਨਾ ਦੋ ਮੁਫ਼ਤ ਐਲਪੀਜੀ (LPG) ਸਿਲੰਡਰ ਦੇਣ ਦੀ ਯੋਜਨਾ ਵੀ ਲਾਂਚ ਕਰਨਗੇ।
ਮੁੱਖ ਮੰਤਰੀ ਰੇਖਾ ਗੁਪਤਾ ਅਨੁਸਾਰ, ਸਿਲੰਡਰ ਦੀ ਕੀਮਤ ਦੇ ਬਰਾਬਰ ਦੀ ਰਕਮ ਪਰਿਵਾਰ ਦੇ ਮੁਖੀ ਦੇ ਆਧਾਰ ਨਾਲ ਜੁੜੇ ਬੈਂਕ ਖਾਤੇ ਵਿੱਚ ਸਿੱਧੀ ਜਮ੍ਹਾਂ ਕੀਤੀ ਜਾਵੇਗੀ। ਇਸ ਨਾਲ ਲਗਪਗ 15.5 ਲੱਖ ਪਰਿਵਾਰਾਂ ਨੂੰ ਫਾਇਦਾ ਹੋਵੇਗਾ। ਇਹ ਕਾਰਡ ਦਿੱਲੀ ਦੀਆਂ ਮਹਿਲਾ ਨਿਵਾਸੀਆਂ ਨੂੰ DTC ਬੱਸਾਂ ਵਿੱਚ ਮੁਫ਼ਤ ਸਫ਼ਰ ਦੀ ਇਜਾਜ਼ਤ ਦੇਵੇਗਾ।
ਇਸ ਤੋਂ ਇਲਾਵਾ, ਇਸ ਦੀ ਵਰਤੋਂ ਮੈਟਰੋ, RRTS ਅਤੇ ਹੋਰ ਟ੍ਰਾਂਸਪੋਰਟ ਸੇਵਾਵਾਂ ਵਿੱਚ ਮੁੱਲ ਸਫ਼ਰ ਲਈ ਵੀ ਕੀਤੀ ਜਾ ਸਕੇਗੀ। ਔਰਤਾਂ ਲਈ 'ਪਿੰਕ', ਆਮ ਯਾਤਰੀਆਂ ਲਈ 'ਬਲੂ' (ਨੀਲਾ) ਅਤੇ ਮਹੀਨਾਵਾਰ ਪਾਸ ਵਾਲਿਆਂ ਲਈ 'ਓਰੇਂਜ' (ਸੰਤਰੀ) ਕਾਰਡ ਜਾਰੀ ਕੀਤੇ ਜਾਣਗੇ। ਪਿੰਕ ਕਾਰਡ ਬਿਲਕੁਲ ਮੁਫ਼ਤ ਦਿੱਤਾ ਜਾਵੇਗਾ, ਜਿਸ ਦਾ ਖਰਚਾ ਦਿੱਲੀ ਸਰਕਾਰ ਚੁੱਕੇਗੀ।
ਇਹ ਮੌਜੂਦਾ ਕਾਗਜ਼ੀ ਗੁਲਾਬੀ ਟਿਕਟਾਂ ਦੀ ਥਾਂ ਲਵੇਗਾ। ਕਾਰਡ ਬਣਾਉਣ ਲਈ ਡੀਐੱਮ (DM) ਦਫ਼ਤਰ, ਐੱਸਡੀਐੱਮ (SDM) ਦਫ਼ਤਰ ਅਤੇ ਚੋਣਵੇਂ DTC ਟਿਕਾਣਿਆਂ ਸਮੇਤ 50 ਕੇਂਦਰ ਬਣਾਏ ਜਾਣਗੇ। ਕਾਰਡ ਨੂੰ ਲਾਭਪਾਤਰੀ ਦੇ ਮੋਬਾਈਲ ਨੰਬਰ ਅਤੇ ਆਧਾਰ ਨਾਲ ਜੋੜਿਆ ਜਾਵੇਗਾ ਤਾਂ ਜੋ ਉਮਰ, ਲਿੰਗ ਅਤੇ ਦਿੱਲੀ ਦੀ ਰਿਹਾਇਸ਼ ਦੀ ਪੁਸ਼ਟੀ ਕੀਤੀ ਜਾ ਸਕੇ।
