ਗੀਤਾ ਮਹੋਤਸਵ: ਸੁਰੇਸ਼ ਵਾਡੇਕਰ ਨੇ ਬੰਨ੍ਹਿਆ ਸਮਾਂ

ਕੌਮਾਂਤਰੀ ਗੀਤਾ ਮਹੋਤਸਵ ਮੌਕੇ ਬ੍ਰਹਮ ਸਰੋਵਰ ਕੰਢੇ ਕਰਵਾਏ ਗਏ ਵਿਸ਼ੇਸ਼ ਸੱਭਿਆਚਾਰਕ ਪ੍ਰੋਗਰਾਮ ਦੌਰਾਨ ਗਾਇਕ ਸੁਰੇਸ਼ ਵਾਡੇਕਰ ਅਤੇ ਪਦਮਾ ਵਾਡੇਕਰ ਨੇ ਆਪਣੀ ਗਾਇਕੀ ਨਾਲ ਦਰਸ਼ਕਾਂ ਨੂੰ ਮੰਤਰ ਮੁਗਧ ਕਰ ਦਿੱਤਾ। ਇਹ ਸ਼ਾਨਦਾਰ ਸਮਾਗਮ ਕੁਰੂਕਸ਼ੇਤਰ ਵਿਕਾਸ ਬੋਰਡ ਅਤੇ ਉੱਤਰੀ ਜ਼ੋਨ ਸੱਭਿਆਚਾਰਕ ਕਲਾ ਕੇਂਦਰ (ਐੱਨ ਜ਼ੈੱਡ ਸੀ ਸੀ) ਪਟਿਆਲਾ ਦੇ ਸਾਂਝੇ ਉੱਦਮ ਨਾਲ ਕਰਵਾਇਆ ਗਿਆ ਸੀ।

ਬੀਤੀ ਸ਼ਾਮ ਬ੍ਰਹਮ ਸਰੋਵਰ ਸਥਿਤ ਪੁਰਸ਼ੋਤਮ ਪੁਰਾ ਬਾਗ ਵਿੱਚ ਸਜੀ ਇਸ ਮਹਿਫ਼ਿਲ ਦੀ ਸ਼ੁਰੂਆਤ ਰਸਮੀ ਉਦਘਾਟਨ ਨਾਲ ਹੋਈ। ਇਸ ਮੌਕੇ ਹਰਿਆਣਾ ਦੇ ਮੁੱਖ ਮੰਤਰੀ ਦੇ ਓ ਐੱਸ ਡੀ ਭਾਰਤ ਭੂਸ਼ਣ ਭਾਰਤੀ, ਚੇਅਰਮੈਨ ਅਮਰਪਾਲ ਰਾਣਾ, ਚੇਅਰਮੈਨ ਜੈ ਸਿੰਘ ਪਾਲ ਅਤੇ ਨੈਰੋਲੈਕ ਮੁੰਬਈ ਦੇ ਉਪ ਪ੍ਰਧਾਨ ਰਾਮ ਮਲਹੋਤਰਾ ਸਮੇਤ ਕਈ ਪਤਵੰਤੇ ਹਾਜ਼ਰ ਸਨ। ਇਨ੍ਹਾਂ ਮਹਿਮਾਨਾਂ ਨੇ ਰਵਾਇਤ ਅਨੁਸਾਰ ਦੀਪ ਪ੍ਰਜਵਲਿਤ ਕਰਕੇ ਸੱਭਿਆਚਾਰਕ ਸ਼ਾਮ ਦਾ ਆਗ਼ਾਜ਼ ਕੀਤਾ। ਇਸ ਮਗਰੋਂ ਮੰਚ ’ਤੇ ਆਏ ਪ੍ਰਸਿੱਧ ਗਾਇਕ ਸੁਰੇਸ਼ ਵਾਡੇਕਰ ਅਤੇ ਪਦਮਾ ਵਾਡੇਕਰ ਨੇ ਆਪਣੇ ਹਿੱਟ ਗੀਤਾਂ ਅਤੇ ਭਜਨਾਂ ਨਾਲ ਅਜਿਹਾ ਸਮਾਂ ਬੰਨ੍ਹਿਆ ਕਿ ਪੁਰਸ਼ੋਤਮ ਪੁਰਾ ਬਾਗ ਵਿੱਚ ਬੈਠਾ ਹਰ ਸ਼ਖਸ ਝੂਮਣ ਲੱਗ ਪਿਆ। ਉਨ੍ਹਾਂ ਦੀ ਮਨਮੋਹਕ ਅਤੇ ਜਾਣੀ-ਪਛਾਣੀ ਗਾਇਕੀ ਸ਼ੈਲੀ ਨੇ ਦਰਸ਼ਕਾਂ ਤੋਂ ਭਰਪੂਰ ਦਾਦ ਖੱਟੀ ਅਤੇ ਪੰਡਾਲ ਤਾੜੀਆਂ ਦੀ ਗੂੰਜ ਨਾਲ ਭਰ ਗਿਆ। ਦਰਸ਼ਕ ਦੇਰ ਰਾਤ ਤੱਕ ਇਸ ਸੰਗੀਤਮਈ ਮਾਹੌਲ ਦਾ ਆਨੰਦ ਮਾਣਦੇ ਰਹੇ। ਪ੍ਰੋਗਰਾਮ ਦੀ ਸਮਾਪਤੀ ’ਤੇ ਆਏ ਹੋਏ ਮੁੱਖ ਮਹਿਮਾਨਾਂ ਵੱਲੋਂ ਸੁਰੇਸ਼ ਵਾਡੇਕਰ, ਪਦਮਾ ਵਾਡੇਕਰ ਅਤੇ ਉਨ੍ਹਾਂ ਦੇ ਸਾਥੀ ਕਲਾਕਾਰਾਂ ਨੂੰ ਯਾਦਗਾਰੀ ਚਿੰਨ੍ਹ ਭੇਟ ਕਰਕੇ ਵਿਸ਼ੇਸ਼ ਤੌਰ ’ਤੇ ਸਨਮਾਨਿਤ ਕੀਤਾ ਗਿਆ। ਇਸ ਮੌਕੇ ਵੱਡੀ ਗਿਣਤੀ ਵਿੱਚ ਸ਼ਰਧਾਲੂ ਅਤੇ ਸੰਗੀਤ ਪ੍ਰੇਮੀ ਮੌਜੂਦ ਸਨ।

ਗੀਤਾ ਦੇ ਸਿਧਾਂਤਾਂ ’ਤੇ ਚੱਲਣ ਦਾ ਸੱਦਾ

ਸ਼ਾਹਬਾਦ ਮਾਰਕੰਡਾ (ਪੱਤਰ ਪ੍ਰੇਰਕ): ਸ੍ਰੀ ਮਦਭਗਵਦ ਗੀਤਾ ਜੈਯੰਤੀ ਨੂੰ ਸਮਰਪਿਤ ਮਾਤ੍ਰਭੂਮੀ ਸੇਵਾ ਮਿਸ਼ਨ ਵੱਲੋਂ ਚੱਲ ਰਹੇ ਪ੍ਰੋਗਰਾਮਾਂ ਦੇ ਪੰਦਰਵੇਂ ਦਿਨ ਵਿਸ਼ੇਸ਼ ਗੀਤਾ ਗਿਆਨ ਸੰਵਾਦ ਕਰਵਾਇਆ ਗਿਆ। ਇਸ ਦਾ ਵਿਸ਼ਾ ‘ਬ੍ਰਹਮਚਾਰੀ ਲਈ ਗੀਤਾ ਦੇ ਸਦੀਵੀ ਮੁੱਲਾਂ ਦਾ ਪਾਠ’ ਰੱਖਿਆ ਗਿਆ ਸੀ, ਜਿਸ ਦੀ ਸ਼ੁਰੂਆਤ ਕੁਰੂਕਸ਼ੇਤਰ ਸੰਸਕ੍ਰਿਤ ਵੇਦ ਵਿਦਿਆਲਿਆ ਦੇ ਬ੍ਰਹਮਚਾਰੀਆਂ ਵੱਲੋਂ ਗੀਤਾ ਸ਼ਲੋਕ ਉਚਾਰਨ ਨਾਲ ਹੋਈ। ਇਸ ਮੌਕੇ ਮਿਸ਼ਨ ਦੇ ਸੰਸਥਾਪਕ ਡਾ. ਸ੍ਰੀ ਪ੍ਰਕਾਸ਼ ਮਿਸ਼ਰਾ ਨੇ ਕਿਹਾ ਕਿ ਗੀਤਾ ਅਨੁਸਾਰ ਚੇਤਨਾ ਸਿਰਫ਼ ਵਿਅਕਤੀਗਤ ਜੀਵਾਂ ਤੱਕ ਸੀਮਤ ਨਹੀਂ ਸਗੋਂ ਪੂਰੇ ਬ੍ਰਹਿਮੰਡ ਵਿੱਚ ਵਿਆਪਕ ਹੈ। ਇਹ ਸ੍ਰਿਸ਼ਟੀ ਦੇ ਕਣ-ਕਣ ਵਿੱਚ ਮੌਜੂਦ ਹੈ ਅਤੇ ਸਮੇਂ ਤੇ ਸੀਮਾਵਾਂ ਤੋਂ ਪਰੇ ਹੈ। ਬ੍ਰਹਮਚਾਰੀਆਂ ਨੂੰ ਸੰਬੋਧਨ ਕਰਦਿਆਂ ਡਾ. ਮਿਸ਼ਰਾ ਨੇ ਕਿਹਾ ਕਿ ਗੀਤਾ ਦੇ ਸਦੀਵੀ ਮੁੱਲ ਬ੍ਰਹਮਚਾਰੀ ਜੀਵਨ ਲਈ ਅਤਿ ਮਹੱਤਵਪੂਰਨ ਹਨ, ਕਿਉਂਕਿ ਇਹ ਨਿਰਸੁਆਰਥ ਸੇਵਾ, ਇੰਦਰੀਆਂ ’ਤੇ ਕਾਬੂ ਅਤੇ ਸਵੈ-ਨਿਯੰਤਰਣ ਸਿਖਾਉਂਦੇ ਹਨ। ਉਨ੍ਹਾਂ ਕਿਹਾ ਕਿ ਗੀਤਾ ਦਾ ਗਿਆਨ ਸਰੀਰਕ ਤੇ ਮਾਨਸਿਕ ਸੰਤੁਲਨ ਬਣਾਈ ਰੱਖਣ ਵਿੱਚ ਮਦਦਗਾਰ ਹੈ ਅਤੇ ਜੀਵਨ ਦੇ ਟੀਚਿਆਂ ਨੂੰ ਪਾਉਣ ਲਈ ਜ਼ਰੂਰੀ ਸਵੈ-ਅਨੁਸ਼ਾਸਨ ਪੈਦਾ ਕਰਦਾ ਹੈ।