ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 25 ਅਕਤੂਬਰ
ਦਿੱਲੀ ਦੇ ਟਰਾਂਸਪੋਰਟ ਮੰਤਰੀ ਕੈਲਾਸ਼ ਗਹਿਲੋਤ ਨੇ ਅੱਜ ਇੰਸਟੀਚਿਊਟ ਆਫ ਡਰਾਈਵਿੰਗ, ਟਰੇਨਿੰਗ ਐਂਡ ਰਿਸਰਚ (ਆਈਡੀਟੀਆਰ), ਸਰਾਏ ਕਾਲੇ ਖਾਨ ਵਿੱਚ 7-ਰੋਜ਼ਾ ਈ-ਆਟੋ ਮੇਲੇ ਦਾ ਉਦਘਾਟਨ ਕੀਤਾ। ਜਾਣਕਾਰੀ ਮੁਤਾਬਿਕ ਅੱਜ ਰਸਮੀ ਉਦਘਾਟਨ ਨਾਲ ਦਿੱਲੀ ਸਰਕਾਰ ਦੁਆਰਾ ਆਯੋਜਿਤ ਮੇਲਾ ਦੋ ਥਾਵਾਂ ਸਰਾਏ ਕਾਲੇ ਖਾਨ ਅਤੇ ਲੋਨੀ ਵਿੱਚ ਸ਼ੁਰੂ ਹੋ ਗਿਆ ਹੈ। ਇਹ ਮੇਲਾ 31 ਅਕਤੂਬਰ ਤੱਕ ਰੋਜ਼ਾਨਾ ਸਵੇਰੇ 9 ਵਜੇ ਤੋਂ ਸ਼ਾਮ 4 ਵਜੇ ਤੱਕ ਲੱਗੇਗਾ। ਇੱਥੇ ਆਟੋ ਚਾਲਕ ਈ-ਆਟੋ ਦੇ ਸਾਰੇ ਉਪਲੱਬਧ ਮਾਡਲਾਂ ਨੂੰ ਵੇਖ ਤੇ ਚਲਾ ਸਕਣਗੇ ਅਤੇ ਕਰਜ਼ਿਆਂ ਬਾਰੇ ਜਾਣਕਾਰੀ ਪ੍ਰਾਪਤ ਕਰ ਸਕਣਗੇ। ਇਸ ਤੋਂ ਇਲਾਵਾ ਲੋਕ ਇਸ ਮੇਲੇ ਵਿੱਚ ਈ-ਆਟੋ ਦੇ ਵੱਖ-ਵੱਖ ਮਾਡਲਾਂ ਦੀ ਟੈਸਟ ਡਰਾਈਵ ਵੀ ਕਰ ਸਕਣਗੇ।