ਨਕਲੀ ਇੰਜਣ ਤੇਲ ਬਣਾਉਣ ਵਾਲੀ ਯੂਨਿਟ ਦਾ ਪਰਦਾਫਾਸ਼, 1 ਗ੍ਰਿਫਤਾਰ
ਉੱਤਰ-ਪੂਰਬੀ ਦਿੱਲੀ ਵਿੱਚ ਪੁਲੀਸ ਨੇ ਨਕਲੀ ਲੁਬਰੀਕੈਂਟ ਤੇਲ ਬਣਾਉਣ ਵਾਲੀ ਇੱਕ ਵੱਡੀ ਯੂਨਿਟ ਦਾ ਪਰਦਾਫਾਸ਼ ਕੀਤਾ ਹੈ ਅਤੇ ਇੱਕ 41 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਹੈ। ਇੱਕ ਅਧਿਕਾਰੀ ਨੇ ਸ਼ਨਿਚਰਵਾਰ ਨੂੰ ਦੱਸਿਆ ਕਿ ਇਸ ਦੌਰਾਨ ਵੱਡੀ ਮਾਤਰਾ ਵਿੱਚ ਨਕਲੀ ਬ੍ਰਾਂਡਿਡ...
ਉੱਤਰ-ਪੂਰਬੀ ਦਿੱਲੀ ਵਿੱਚ ਪੁਲੀਸ ਨੇ ਨਕਲੀ ਲੁਬਰੀਕੈਂਟ ਤੇਲ ਬਣਾਉਣ ਵਾਲੀ ਇੱਕ ਵੱਡੀ ਯੂਨਿਟ ਦਾ ਪਰਦਾਫਾਸ਼ ਕੀਤਾ ਹੈ ਅਤੇ ਇੱਕ 41 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਹੈ। ਇੱਕ ਅਧਿਕਾਰੀ ਨੇ ਸ਼ਨਿਚਰਵਾਰ ਨੂੰ ਦੱਸਿਆ ਕਿ ਇਸ ਦੌਰਾਨ ਵੱਡੀ ਮਾਤਰਾ ਵਿੱਚ ਨਕਲੀ ਬ੍ਰਾਂਡਿਡ ਇੰਜਣ ਤੇਲ, ਮਸ਼ੀਨਰੀ ਅਤੇ ਪੈਕਿੰਗ ਸਮੱਗਰੀ ਜ਼ਬਤ ਕੀਤੀ ਗਈ ਹੈ।
ਗ੍ਰਿਫਤਾਰ ਕੀਤੇ ਗਏ ਮੁਲਜ਼ਮ ਦੀ ਪਛਾਣ ਮਨੀਸ਼ ਗੁਪਤਾ ਵਜੋਂ ਹੋਈ ਹੈ, ਜੋ ਸ਼ਾਹਦਰਾ ਦਾ ਰਹਿਣ ਵਾਲਾ ਹੈ। ਪੁਲੀਸ ਨੇ ਦੱਸਿਆ ਕਿ 18 ਦਸੰਬਰ ਨੂੰ ਕਬੀਰ ਨਗਰ ਸਥਿਤ ਇੱਕ ਗੋਦਾਮ ਵਿੱਚ ਛਾਪੇਮਾਰੀ ਕੀਤੀ ਗਈ ਸੀ, ਜਿੱਥੇ ਮੁਲਜ਼ਮ ਕੈਸਟਰੋਲ (Castrol), ਟੀਵੀਐਸ (TVS) ਅਤੇ ਹੀਰੋ (Hero) ਵਰਗੇ ਨਾਮੀ ਬ੍ਰਾਂਡਾਂ ਦੇ ਲੇਬਲ ਹੇਠ ਨਕਲੀ ਲੁਬਰੀਕੈਂਟ ਤੇਲ ਬਣਾ ਕੇ ਸਪਲਾਈ ਕਰ ਰਿਹਾ ਸੀ, ਜੋ ਵਾਹਨਾਂ ਦੇ ਇੰਜਣਾਂ ਅਤੇ ਖਪਤਕਾਰਾਂ ਲਈ ਗੰਭੀਰ ਖਤਰਾ ਪੈਦਾ ਕਰ ਰਿਹਾ ਸੀ।
ਪੁਲੀਸ ਅਨੁਸਾਰ ਗੁਪਤਾ ਬਿਨਾਂ ਕਿਸੇ ਲਾਇਸੈਂਸ ਜਾਂ ਅਧਿਕਾਰ ਦੇ ਇਹ ਯੂਨਿਟ ਚਲਾ ਰਿਹਾ ਸੀ। ਪੁਲੀਸ ਨੂੰ ਖਾਸ ਖੁਫੀਆ ਜਾਣਕਾਰੀ ਮਿਲੀ ਸੀ ਕਿ ਕੱਚੇ ਲੁਬਰੀਕੈਂਟ ਤੇਲ ਨੂੰ ਖਾਲੀ ਬ੍ਰਾਂਡਿਡ ਕੰਟੇਨਰਾਂ ਵਿੱਚ ਭਰ ਕੇ ਅਸਲੀ ਉਤਪਾਦਾਂ ਵਜੋਂ ਵੇਚਿਆ ਜਾ ਰਿਹਾ ਸੀ। ਪੁਲਿਸ ਨੇ ਦੱਸਿਆ ਕਿ ਕੈਸਟਰੋਲ ਲਿਮਟਿਡ ਦੇ ਅਧਿਕਾਰਤ ਪ੍ਰਤੀਨਿਧੀ ਵੀ ਛਾਪੇਮਾਰੀ ਵਿੱਚ ਸ਼ਾਮਲ ਹੋਏ ਅਤੇ ਉਨ੍ਹਾਂ ਨੇ ਪੁਸ਼ਟੀ ਕੀਤੀ ਕਿ ਜ਼ਬਤ ਕੀਤੇ ਗਏ ਉਤਪਾਦ ਨਕਲੀ ਸਨ।
ਛਾਪੇਮਾਰੀ ਦੌਰਾਨ ਤਿੰਨ ਮਜ਼ਦੂਰ ਕੱਚੇ ਤੇਲ ਨੂੰ ਫਿਲਟਰ ਕਰਦੇ, ਰੰਗ ਮਿਲਾਉਂਦੇ, ਬੋਤਲਾਂ ਭਰਦੇ, ਨਕਲੀ ਲੇਬਲ ਚਿਪਕਾਉਂਦੇ ਅਤੇ ਡੱਬਿਆਂ ਨੂੰ ਸੀਲ ਕਰਦੇ ਪਾਏ ਗਏ। ਇੱਕ ਸੀਨੀਅਰ ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਕਾਰਵਾਈ ਦੌਰਾਨ ਮੌਕੇ 'ਤੇ ਪਹੁੰਚੇ ਗੁਪਤਾ ਨੇ ਯੂਨਿਟ ਚਲਾਉਣ ਦੀ ਗੱਲ ਕਬੂਲ ਕੀਤੀ। ਪੁਲਿਸ ਨੇ 19 ਦਸੰਬਰ ਨੂੰ ਕਾਪੀਰਾਈਟ ਐਕਟ ਅਤੇ ਭਾਰਤੀ ਨਿਆ ਸੰਹਿਤਾ ਦੀਆਂ ਸਬੰਧਤ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਹੈ, ਜਿਸ ਵਿੱਚ ਬਾਅਦ ਵਿੱਚ ਧੋਖਾਧੜੀ ਨਾਲ ਸਬੰਧਤ ਉਪਬੰਧ ਵੀ ਸ਼ਾਮਲ ਕੀਤੇ ਗਏ ਹਨ।
ਉਨ੍ਹਾਂ ਦੱਸਿਆ ਕਿ ਗੁਪਤਾ ਨੂੰ ਗ੍ਰਿਫਤਾਰ ਕਰਕੇ ਪੁੱਛਗਿੱਛ ਕੀਤੀ ਗਈ। ਪੁੱਛਗਿੱਛ ਦੌਰਾਨ ਮੁਲਜ਼ਮ ਨੇ ਖੁਲਾਸਾ ਕੀਤਾ ਕਿ ਉਹ 2019 ਤੋਂ 'ਕੇਬੀਐਸ ਲੁਬਰੀਕੈਂਟ ਇੰਡੀਆ' (KBS Lubricant India) ਦੇ ਨਾਂ 'ਤੇ ਨਕਲੀ ਇੰਜਣ ਤੇਲ ਬਣਾ ਰਿਹਾ ਸੀ। ਉਸ ਨੇ ਦਾਅਵਾ ਕੀਤਾ ਕਿ ਉਹ ਸਥਾਨਕ ਤੌਰ 'ਤੇ ਪ੍ਰਾਪਤ ਬੇਸ ਆਇਲ ਅਤੇ ਐਡਿਟਿਵਜ਼ ਨੂੰ ਮਿਲਾ ਕੇ ਰੋਜ਼ਾਨਾ ਲਗਭਗ 150 ਲੀਟਰ ਤੇਲ ਤਿਆਰ ਕਰਦਾ ਸੀ, ਜਿਸ ਨੂੰ ਫਿਰ ਮਸ਼ਹੂਰ ਬ੍ਰਾਂਡਾਂ ਦੇ ਨਕਲੀ ਲੋਗੋ, ਲੇਬਲ, ਬੈਚ ਨੰਬਰ ਅਤੇ ਹੋਲੋਗ੍ਰਾਮ ਵਾਲੇ ਪੁਰਾਣੇ ਜਾਂ ਮਿਆਦ ਪੁੱਗ ਚੁੱਕੇ ਕੰਟੇਨਰਾਂ ਵਿੱਚ ਪੈਕ ਕੀਤਾ ਜਾਂਦਾ ਸੀ।
ਪੁਲੀਸ ਨੇ ਦੱਸਿਆ ਕਿ ਇਹ ਨਕਲੀ ਉਤਪਾਦ ਉੱਤਰ ਪ੍ਰਦੇਸ਼ ਅਤੇ ਰਾਜਸਥਾਨ ਸਮੇਤ ਕਈ ਰਾਜਾਂ ਵਿੱਚ ਪ੍ਰਚੂਨ ਵਿਕਰੇਤਾਵਾਂ ਨੂੰ ਸਸਤੀਆਂ ਦਰਾਂ 'ਤੇ ਵੇਚੇ ਜਾਂਦੇ ਸਨ, ਜਿਸ ਨਾਲ ਉਸ ਨੂੰ ਪ੍ਰਤੀ ਮਹੀਨਾ ਲਗਪਗ 50,000 ਰੁਪਏ ਦਾ ਮੁਨਾਫਾ ਹੁੰਦਾ ਸੀ। ਗੁਪਤਾ ਨੇ ਇਹ ਵੀ ਕਬੂਲ ਕੀਤਾ ਕਿ ਉਹ ਫੜੇ ਜਾਣ ਤੋਂ ਬਚਣ ਲਈ ਅਕਸਰ ਸਟੋਰੇਜ ਦੀਆਂ ਥਾਵਾਂ ਬਦਲਦਾ ਰਹਿੰਦਾ ਸੀ।
