ਮਨਧੀਰ ਸਿੰਘ ਦਿਓਲ
ਨਵੀਂ ਦਿੱਲੀ, 18 ਅਪਰੈਲ
ਦਿੱਲੀ ਵਿੱਚ ਕਰੋਨਾ ਦੀ ਵਧੀ ਰਫ਼ਤਾਰ ਦੇ ਮੱਦੇਨਜ਼ਰ ਦਿੱਲੀ ਸਰਕਾਰ ਹੰਗਾਮੀਂ ਤੌਰ ’ਤੇ ਕੋਵਿਡ ਮਰੀਜ਼ਾਂ ਲਈ ਬਿਸਤਰੇ ਵਧਾਉਣ ਦੇ ਆਹਰੇ ਲੱਗ ਗਈ ਹੈ। ਦਿੱਲੀ ਵਿੱਚ ਆਕਸੀਜਨ ਵਾਲੇ 100 ਤੋਂ ਵੀ ਘੱਟ ਬਿਸਤਰੇ ਬਚਣ ਮਗਰੋਂ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ, ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ, ਸਿਹਤ ਮੰਤਰੀ ਸਤਿੰਦਰ ਜੈਨ ਤੇ ਦਿੱਲੀ ਜਲ ਬੋਰਡ ਦੇ ਉਪ ਚੇਅਰਮੈਨ ਰਾਘਵ ਚੱਢਾ ਵੱਲੋਂ ਵੱਖ-ਵੱਖ ਥਾਵਾਂ ਉਪਰ ਕਰੋਨਾ ਮਰੀਜ਼ਾਂ ਲਈ ਸ਼ੁਰੂ ਕੀਤੀਆਂ ਜਾ ਰਹੀਆਂ ਸਿਹਤ ਸਹੂਲਤਾਂ ਦਾ ਜਾਇਜ਼ਾ ਲਿਆ ਗਿਆ। ਕੇਜਰੀਵਾਲ ਨੇ ਯਮੁਨਾ ਸਪੋਰਟਸ ਕੰਪਲੈਕਸ, ਰਾਸ਼ਟਰਮੰਡਲ ਖੇਡ ਪਿੰਡ ਤੇ ਰਾਊਜ਼ ਐਵੀਨਿਊ ਸਕੂਲ ਵਿੱਚ ਲਾਏ ਗਏ ਵਾਧੂ ਕੋਵਿਡ ਬਿਸਤਰਿਆਂ ਦਾ ਜਾਇਜ਼ਾ ਲਿਆ ਤੇ ਕਿਹਾ ਕਿ ਅਗਲੇ ਦੋ ਦਿਨਾਂ ਦੌਰਾਨ 1400 ਤੋਂ 2000 ਬਿਸਤਰੇ ਮੁਹੱਈਆ ਹੋ ਜਾਣਗੇ। ਮਨੀਸ਼ ਸਿਸੋਦੀਆ ਨੇ 5 ਹਜ਼ਾਰ ਬਿਸਤਰਿਆਂ ਦੇ ਰਾਧਾ ਸੁਆਮੀ ਸਤਿਸੰਗ ਬਿਆਸ ਤੋਂ ਇਲਾਵਾ ਬੁਰਾੜੀ, ਨਰੇਲਾ ਦੇ ਐੱਸਆਰਸੀਐੱਚ ਤੇ ਡੀਆਰਡੀਓ ਦੇ ਵਿਸ਼ੇਸ਼ ਕੈਂਪ ਦਾ ਦੌਰਾ ਕੀਤਾ। ਰਾਘਵ ਚੱਢਾ ਲੋਕ ਨਾਇਕ ਜੈ ਪ੍ਰਕਾਸ਼ ਹਸਪਤਾਲ ਗਏ।
ਉਥੇ ਹੀ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਕੇਂਦਰੀ ਗ੍ਰਹਿ ਮੰਤਰੀ ਤੇ ਕੇਂਦਰੀ ਸਿਹਤ ਮੰਤਰੀ ਨਾਲ ਫ਼ੋਨ ਰਾਹੀਂ ਗੱਲਬਾਤ ਕਰਦਿਆਂ ਕਰੋਨਾ ਦੀ ਸਥਿਤੀ ’ਤੇ ਚਿੰਤਾ ਜ਼ਾਹਿਰ ਕੀਤੀ ਹੈ ਤੇ ਦਿੱਲੀ ’ਚ ਬਿਸਤਰੇ ਤੇ ਆਕਸੀਜਨ ਦੀ ਘਾਟ ਬਾਰੇ ਜਾਣਕਾਰੀ ਦਿੱਤੀ ਹੈ। ਕੇਂਦਰ ’ਚ 10 ਹਜ਼ਾਰ ’ਚੋਂ ਸਿਰਫ 1800 ਬਿਸਤਰੇ ਸੁਰੱਖਿਅਤ ਹਨ। ਦਿੱਲੀ ਸਰਕਾਰ ਅਗਲੇ ਦੋ-ਤਿੰਨ ਦਿਨਾਂ ’ਚ 6 ਹਜ਼ਾਰ ਤੋਂ ਵੱਧ ਵੈਂਟੀਲੇਟਰ ਤਿਆਰ ਕਰੇਗੀ। ਰਾਸ਼ਟਰਮੰਡਲ ਖੇਡ ਪਿੰਡ ਤੋਂ ਇਲਾਵਾ, ਯਮੁਨਾ ਸਪੋਰਟਸ ਕੰਪਲੈਕਸ, ਰਾਧਾ ਸਵਾਮੀ ਸਤਿਸੰਗ ਬਿਆਸ ਤੋਂ ਇਲਾਵਾ ਕੁਝ ਸਕੂਲਾਂ ’ਚ ਬਿਸਤਰੇ ਵੀ ਲਗਾਏ ਜਾ ਰਹੇ ਹਨ।
ਮੁੱਖ ਮੰਤਰੀ ਨੇ ਦਿੱਲੀ ਵਾਸੀਆਂ ਦੇ ਨਾਲ ਨਾਲ ਬਹੁਤ ਸਾਰੀਆਂ ਐਨ.ਜੀ.ਓ., ਡਾਕਟਰਾਂ ਤੇ ਧਾਰਮਿਕ ਸੰਸਥਾਵਾਂ ਦਾ ਧੰਨਵਾਦ ਕੀਤਾ, ਕਰੋਨਾ ਦਾ ਸਾਹਮਣਾ ਕਰਨ ਤੇ ਕਰਫਿਊ ’ਚ ਸਹਿਯੋਗ ਲਈ ਅੱਗੇ ਆਏ।
ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਪਿਛਲੇ 24 ਘੰਟਿਆਂ ’ਚ ਦਿੱਲੀ ’ਚ ਕਰੋਨਾ ਦੇ ਲਗਭਗ 25,500 ਮਾਮਲੇ ਸਾਹਮਣੇ ਆਏ ਹਨ। ਉਸ ਦੇ ਪਿਛਲੇ 24 ਘੰਟਿਆਂ ’ਚ 24,000 ਤੇ ਆਪਣੇ ਪਿਛਲੇ 24 ਘੰਟਿਆਂ ’ਚ 19,500 ਕੇਸ ਸਨ। ਪਿਛਲੇ 24 ਘੰਟਿਆਂ ’ਚ ਸਾਕਾਰਾਤਮਕਤਾ ਦਰ ਲਗਭਗ 30 ਫ਼ੀਸਦੀ ਤੱਕ ਵਧ ਗਈ ਹੈ, ਜਦੋਂ ਕਿ ਇਹ ਪਿਛਲੇ 24 ਘੰਟਿਆਂ ’ਚ ਸਿਰਫ 24 ਫ਼ੀਸਦੀ ਸੀ। ਸਾਕਾਰਾਤਮਕ ਦਰ ਪਿਛਲੇ 24 ਘੰਟਿਆਂ ’ਚ 24 ਪ੍ਰਤੀਸ਼ਤ ਤੋਂ 30 ਪ੍ਰਤੀਸ਼ਤ ਤੱਕ ਵਧ ਗਈ ਹੈ।
ਐੱਮਸੀਡੀ ਬਿਸਤਰੇ ਮੁਹੱਈਆ ਕਰਵਾਏ: ਕੇਜਰੀਵਾਲ
ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਤਿੰਨ ਐੱਮਸੀਡੀਜ਼ ਦੇ ਮੇਅਰ ਤੇ ਕਮਿਸ਼ਨਰ ਨਾਲ ਮੁਲਾਕਾਤ ਕਰਦਿਆਂ ਕਿਹਾ ਕਿ ਸਾਨੂੰ ਸਾਰਿਆਂ ਨੂੰ ਕਰੋਨਾ ਖ਼ਿਲਾਫ਼ ਲੜਾਈ ’ਚ ਮਿਲ ਕੇ ਕੰਮ ਕਰਨਾ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਤਿੰਨੋਂ ਐੱਮਸੀਡੀ ਵਧੇਰੇ ਬਿਸਤਰੇ ਮੁਹੱਈਆ ਕਰਵਾਉਣ। ਉਨ੍ਹਾਂ ਕਿਹਾ, ‘‘ਅਸੀਂ ਉਹ ਚੀਜ਼ਾਂ ਦੇਣ ਲਈ ਤਿਆਰ ਹਾਂ, ਜਿਨ੍ਹਾਂ ਦੀ ਐੱਮ.ਸੀ.ਡੀਜ਼ ਨੂੰ ਜ਼ਰੂਰਤ ਪਵੇਗੀ, ਜੇ ਐੱਮ.ਸੀ.ਡੀਜ਼ ਆਪਣੇ ਮੈਡੀਕਲ ਬੁਨਿਆਦੀ ਢਾਂਚਾ ਤੇ ਮਨੁੱਖ ਸ਼ਕਤੀ ਵੱਧ ਤੋਂ ਵੱਧ ਦਿੰਦੀਆਂ ਹਨ ਤਾਂ ਦਿੱਲੀ ਸਰਕਾਰ ਇਸ ਦੀ ਵਰਤੋਂ ਜਨਤਾ ਦੀ ਸੇਵਾ ਵਿਚ ਸਹੀ ਢੰਗ ਨਾਲ ਕਰ ਸਕਦੀ ਹੈ। ਕੇਂਦਰ ਸਰਕਾਰ, ਦਿੱਲੀ ਸਰਕਾਰ ਤੇ ਐੱਮਸੀਡੀ ਮਿਲ ਕੇ ਕੰਮ ਕਰੇਗੀ, ਤਦ ਹੀ ਦਿੱਲੀ ਨੂੰ ਸੰਭਾਲ ਸਕਾਂਗੇ।’’ ਉਨ੍ਹਾਂ ਕੇਂਦਰ ਸਰਕਾਰ ਨੂੰ ਬੇਨਤੀ ਕੀਤੀ ਹੈ ਕਿ ਉਹ ਸਾਨੂੰ ਦਿੱਲੀ ਦੇ ਅੰਦਰ-ਅੰਦਰ ਟੀਕੇ ਲਗਾਉਣ ਦੀ ਆਗਿਆ ਦੇਵੇ। ਇਸ ਲਈ ਦਿੱਲੀ ਵਿਚ ਵੱਡੇ ਪੱਧਰ ’ਤੇ ਘਰ-ਘਰ ਜਾ ਕੇ ਟੀਕਾਕਰਨ ਦੀ ਸ਼ੁਰੂਆਤ ਕੀਤੀ ਜਾਵੇਗੀ। ਇਸ ਮੀਟਿੰਗ ’ਚ ਦਿੱਲੀ ਦੇ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਤੇ ਸਿਹਤ ਮੰਤਰੀ ਸਤਿੰਦਰ ਜੈਨ ਵੀ ਮੌਜੂਦ ਸਨ। ਪਿਛਲੇ ਮਾਰਚ ਦੇ ਅੱਧ ਤੱਕ ਹਰ ਰੋਜ਼ 100 ਤੋਂ 150 ਕੇਸ ਦਿੱਲੀ ਆ ਰਹੇ ਸਨ ਪਰ ਅੱਜ 24 ਘੰਟਿਆਂ ’ਚ 24 ਹਜ਼ਾਰ ਕੇਸ ਆ ਚੁੱਕੇ ਹਨ। ਇੰਨੀ ਵੱਡੀ ਗਿਣਤੀ ਦੇ ਮਾਮਲਿਆਂ ’ਚ ਕੋਈ ਸਿਹਤ ਪ੍ਰਣਾਲੀ ਕਿੰਨਾ ਚਿਰ ਰਹਿ ਸਕਦੀ ਹੈ, ਇਹ ਦੇਸ਼ ਲਈ ਕਰੋਨਾ ਦੀ ਦੂਜੀ ਲਹਿਰ ਹੋ ਸਕਦੀ ਹੈ ਪਰ ਦਿੱਲੀ ਲਈ ਇਹ ਚੌਥੀ ਲਹਿਰ ਹੈ।
ਵਪਾਰੀ ਸੰਸਥਾ ਵੱਲੋਂ 15 ਦਿਨਾਂ ਲਈ ਲੌਕਡਾਊਨ ਲਾਉਣ ਦੀ ਮੰਗ
ਕਰੋਨਾ ਮਹਾਮਾਰੀ ਦੀ ਮਾਰ ਦੇਸ਼ ਭਰ ਵਿੱਚ ਤੇਜ਼ੀ ਨਾਲ ਵੱਧ ਰਹੀ ਹੈ ਤੇ ਦਿੱਲੀ ਵਿੱਚ ਤੇਜ਼ੀ ਨਾਲ ਹੋ ਰਹੇ ਵਿਕਾਸ ਦੇ ਮੱਦੇਨਜ਼ਰ ਕਨਫੈਡਰੇਸ਼ਨ ਆਫ ਆਲ ਇੰਡੀਆ ਟਰੇਡਰਜ਼ (ਕੈਟ) ਨੇ ਉਪ ਰਾਜਪਾਲ ਅਨਿਲ ਬੈਜਲ ਤੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੂੰ ਪੱਤਰ ਭੇਜਦਿਆਂ ਮੰਗ ਕੀਤੀ ਹੈ ਕਿ ਘੱਟੋ-ਘੱਟ 15 ਦਿਨਾਂ ਦੀ ਤਾਲਾਬੰਦੀ ਤੁਰੰਤ ਲਾਗੂ ਕੀਤੀ ਜਾਵੇ ਤੇ ਸਾਰੀਆਂ ਸਰਹੱਦਾਂ ’ਤੇ ਕਰੋਨਾ ਦੀ ਜਾਂਚ ਲਈ ਸਖਤ ਪ੍ਰਬੰਧ ਕੀਤੇ ਜਾਣ। ‘ਕੈਟ’ ਨੇ ਕਿਹਾ ਕਿ ਇਹ ਕਦਮ ਯਕੀਨੀ ਤੌਰ ’ਤੇ ਦਿੱਲੀ ਦੇ ਕਾਰੋਬਾਰੀ ਤੇ ਆਰਥਿਕ ਗਤੀਵਿਧੀਆਂ ਨੂੰ ਪ੍ਰਭਾਵਿਤ ਕਰੇਗਾ ਪਰ ਹੁਣ ਜ਼ਿੰਦਗੀ ਨੂੰ ਪਹਿਲੀ ਤਰਜੀਹ ’ਤੇ ਪਾਉਣਾ ਪਵੇਗਾ। ਕੈਟ ਨੇ ਕਿਹਾ ਕਿ ਕੱਲ੍ਹ ਦਿੱਲੀ ਦੇ ਮੁੱਖ ਮੰਤਰੀ ਕੇਜਰੀਵਾਲ ਨੇ ਖ਼ੁਦ ਮੰਨਿਆ ਹੈ ਕਿ ਦਿੱਲੀ ਵਿੱਚ ਬਿਸਤਰੇ, ਦਵਾਈਆਂ, ਆਕਸੀਜਨ ਆਦਿ ਦੀ ਵੀ ਘਾਟ ਹੈ। ਉਨ੍ਹਾਂ ਇੱਕ ਵਾਰ ਫਿਰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੂੰ ਅਪੀਲ ਕੀਤੀ ਹੈ ਕਿ ਉਹ ਦਿੱਲੀ ਸਮੇਤ ਸਾਰੇ ਰਾਜਾਂ ਵਿੱਚ ਜ਼ਿਲ੍ਹਾ ਪੱਧਰ ’ਤੇ ਕਰੋਨਾ ਨੂੰ ਰੋਕਣ ਲਈ ਇੱਕ ਵਿਆਪਕ ਯੋਜਨਾ ਤਿਆਰ ਕਰੇ, ਜਿਸ ਵਿੱਚ ਕਰੋਨਾ ਤੇਜ਼ੀ ਨਾਲ ਵੱਧ ਰਿਹਾ ਹੈ। ‘ਕੈਟ’ ਦੇ ਕੌਮੀ ਪ੍ਰਧਾਨ ਬੀਸੀ ਭਾਰਟੀਆ ਤੇ ਕੌਮੀ ਜਨਰਲ ਸਕੱਤਰ ਪ੍ਰਵੀਨ ਖੰਡੇਲਵਾਲ ਨੇ ਅੱਜ ਇਥੇ ਕਿਹਾ ਕਿ ਪਿਛਲੇ ਇੱਕ ਮਹੀਨੇ ਦੇ ਅੰਕੜੇ ਗਵਾਹ ਹਨ ਕਿ ਜੇ ਕਰੋਨਾ ਚੇਨ ਨੂੰ ਤੁਰੰਤ ਰੋਕਿਆ ਨਹੀਂ ਗਿਆ ਤਾਂ ਫਿਰ ਕਰੋਨਾ ਬੰਬ ਫਟਣਾ ਤੈਅ ਹੈ।
ਸ਼ਕੂਰ ਬਸਤੀ ਤੇ ਆਨੰਦ ਵਿਹਾਰ ਸਟੇਸ਼ਨਾਂ ’ਤੇ ਕਰੋਨਾ ਕੋਚ ਸਥਾਪਤ
ਕੇਂਦਰੀ ਰੇਲਵੇ ਮੰਤਰੀ ਪੀਯੂਸ਼ ਗੋਇਲ ਨੇ ਦਿੱਲੀ ਸਰਕਾਰ ਨੂੰ ਭਰੋਸਾ ਦਿੰਦੇ ਹੋਏ ਕਿਹਾ ਕਿ ਸ਼ਹਿਰ ਦੇ ਮਰੀਜ਼ਾਂ ਲਈ ਦੋ ਰੇਲਵੇ ਸਟੇਸ਼ਨਾਂ ’ਤੇ ਵਿਸ਼ੇਸ਼ ਕੋਵਿਡ-19 ਕੇਅਰ ਕੋਚ ਉਪਲੱਬਧ ਕੀਤੇ ਗਏ ਹਨ। ਮੰਤਰੀ ਨੇ ਕੌਮੀ ਰਾਜਧਾਨੀ ਵਿਚ ਕਰੋਨਾਵਾਇਰਸ ਬਿਮਾਰੀ ਦੇ ਮਾਮਲਿਆਂ ਵਿਚ ਭਾਰੀ ਵਾਧਾ ਕਰਦਿਆਂ ਮਰੀਜ਼ਾਂ ਨੂੰ ਰਹਿਣ ਦੇ ਪ੍ਰਬੰਧ ਲਈ ਦਿੱਲੀ ਸਰਕਾਰ ਵੱਲੋਂ ਕੀਤੀ ਬੇਨਤੀ ਦੇ ਕੁਝ ਘੰਟਿਆਂ ਵਿਚ ਹੀ ਜਵਾਬ ਦਿੱਤਾ ਹੈ। ਪਿਯੂਸ਼ ਗੋਇਲ ਨੇ ਟਵਿੱਟਰ ’ਤੇ ਜਾਣਕਾਰੀ ਦਿੱਤੀ, ‘‘ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਧੀਨ ਸਰਕਾਰ ਕੋਵਿਡ-19 ਵਿਰੁੱਧ ਲੜਾਈ ਦੀ ਅਗਵਾਈ ਕਰ ਰਹੀ ਹੈ, ਸ਼ਕੂਰ ਬਸਤੀ ਸਟੇਸ਼ਨ ’ਤੇ 800 ਬੈੱਡਾਂ ਵਾਲੇ ਕੋਵਿਡ-19 ਇਕਾਂਤਵਾਸ ਕੋਚ ਤੇ 25 ਕੋਚ ਦਿੱਲੀ ਦੇ ਆਨੰਦ ਵਿਹਾਰ ਸਟੇਸ਼ਨ ’ਤੇ ਉਪਲੱਬਧ ਹੋਣਗੇ। ਰਾਜਾਂ ਦੀ ਮੰਗ ’ਤੇ ਰੇਲਵੇ ਦੇਸ਼ ਭਰ ਵਿਚ 3 ਲੱਖ ਅਲੱਗ ਬੈੱਡ ਸਥਾਪਤ ਕਰ ਸਕਦਾ ਹੈ।’’ ਗੋਇਲ ਦਾ ਇਹ ਟਵੀਟ ਦਿੱਲੀ ਦੇ ਮੁੱਖ ਸਕੱਤਰ ਵਿਜੈ ਕੁਮਾਰ ਦੇਵ ਵੱਲੋਂ ਰੇਲਵੇ ਬੋਰਡ ਦੇ ਚੇਅਰਮੈਨ ਸੁਨੀਤ ਸ਼ਰਮਾ ਨੂੰ ਸ਼ਹਿਰ ਦੇ ਸ਼ਕੂਰ ਬਸਤੀ ਅਤੇ ਆਨੰਦ ਵਿਹਾਰ ਰੇਲਵੇ ਸਟੇਸ਼ਨਾਂ ’ਤੇ ਪਿਛਲੇ ਸਾਲ ਦੀ ਤਰ੍ਹਾਂ ਕੋਵਿਡ-19 ਬਿਸਤਰੇ ਦੀ ਸਹੂਲਤ ਦਾ ਪ੍ਰਬੰਧ ਕਰਨ ਦੀ ਬੇਨਤੀ ਕਰਨ ਦੇ ਕੁਝ ਸਮੇਂ ਬਾਅਦ ਆਇਆ। ਇਸ ਤੋਂ ਪਹਿਲਾਂ ਹੀ ਰੇਲਵੇ ਮੰਤਰਾਲੇ ਨੇ ਇਕ ਪੋਸਟ ਮੁੜ ਜਾਰੀ ਕੀਤੀ, ਜਿਸ ਦੇ ਅਨੁਸਾਰ ਇਸ ਸਮੇਂ ਰੇਲਵੇ ਦੇ 16 ਜ਼ੋਨਾਂ ਵਿਚ ਕੋਵਿਡ ਕੇਅਰ ਕੋਚਾਂ ਵਿਚ ਤਬਦੀਲ ਕੀਤੇ ਗਏ ਲਗਭਗ 4002 ਕੋਚ ਉਪਲੱਬਧ ਹਨ ਤੇ ਬੇਨਤੀ ਕਰਨ ’ਤੇ ਰਾਜ ਸਰਕਾਰਾਂ ਲਈ ਉਪਲਬਧ ਕਰਵਾਏ ਜਾ ਸਕਦੇ ਹਨ।