Cyber Crime: ਬਜ਼ੁਰਗ ਐੱਨ ਆਰ ਆਈ ਜੋੜੇ ਨਾਲ 14 ਕਰੋੜ ਰੁਪਏ ਦੀ ਠੱਗੀ

ਪੁਲੀਸ ਨੇ ਦੱਸਿਆ ਕਿ ਗ੍ਰੇਟਰ ਕੈਲਾਸ਼-2 ਦੀ ਰਹਿਣ ਵਾਲੀ 77 ਸਾਲਾ ਐੱਨ ਆਰ ਆਈ ਮਹਿਲਾ ਨੇ ਇਸ ਸਬੰਧੀ ਸ਼ਿਕਾਇਤ ਦਰਜ ਕਰਵਾਈ ਹੈ। ਵੇਰਵਿਆਂ ਅਨੁਸਾਰ ਇਹ ਘਟਨਾ 24 ਦਸੰਬਰ 2025 ਤੋਂ 9 ਜਨਵਰੀ 2026 ਦਰਮਿਆਨ ਵਾਪਰੀ ਜਦੋਂ ਇੱਕ ਨੌਸਰਬਾਜ਼ ਨੇ ਆਪਣੇ ਆਪ ਨੂੰ ਟੈਲੀਕਾਮ ਰੈਗੂਲੇਟਰੀ ਅਥਾਰਟੀ ਆਫ ਇੰਡੀਆ ਦਾ ਅਧਿਕਾਰੀ ਦੱਸਦੇ ਹਏ ਫੋਨ ਕਾਲ ਕੀਤੀ।

ਠੱਗ ਨੇ ਦਾਅਵਾ ਕੀਤਾ ਕਿ ਉਸ(ਮਹਿਲਾ) ਦਾ ਮੋਬਾਈਲ ਨੰਬਰ ਅਸ਼ਲੀਲ ਅਤੇ ਅਪਮਾਨਜਨਕ ਕਾਲਾਂ ਲਈ ਵਰਤਿਆ ਜਾ ਰਿਹਾ ਹੈ ਅਤੇ ਉਸ ਦੇ ਬੈਂਕ ਖਾਤਿਆਂ ਵਿੱਚ ਕਾਲਾ ਧਨ ਮਿਲਿਆ ਹੈ। ਇਸ ਤੋਂ ਇਲਾਵਾ, ਉਸ ਨੂੰ ਮਨੀ ਲਾਂਡਰਿੰਗ ਦੇ ਮਾਮਲੇ ਵਿੱਚ ਜਾਂਚ ਹੇਠ ਹੋਣ ਦੀ ਧਮਕੀ ਦਿੱਤੀ ਗਈ। ਠੱਗਾਂ ਨੇ ਤੁਰੰਤ ਕਾਨੂੰਨੀ ਕਾਰਵਾਈ ਦੀ ਚੇਤਾਵਨੀ ਦੇ ਕੇ ਪੀੜਤਾ ਨੂੰ ਡਰਾਇਆ ਅਤੇ ਲਗਾਤਾਰ ਫੋਨ ਕਾਲਾਂ ਰਾਹੀਂ ਮਾਨਸਿਕ ਤਣਾਅ ਵਿੱਚ ਰੱਖਿਆ।

ਡਾ. ਇੰਦਰ ਤਨੇਜਾ ਨੇ ਦੱਸਿਆ ਕਿ ਪੁਲੀਸ ਕੋਲ ਸ਼ਿਕਾਇਤ ਕਰਨ ਮੌਕੇ ਉਨ੍ਹਾਂ ਨੂੰ ਇਸ ਵੱਡੀ ਠੱਗੀ ਦਾ ਅਹਿਸਾਸ ਹੋਇਆ।

ਪੀੜਤ ਦੇ ਪਤੀ ਡਾ. ਓਮ ਤਨੇਜਾ ਨੇ ਕਿਹਾ ਕਿ ਠੱਗਾਂ ਕੋਲ ਉਨ੍ਹਾਂ ਬਾਰੇ ਕਾਫੀ ਨਿੱਜੀ ਜਾਣਕਾਰੀ ਸੀ, ਜਿਸਦੇ ਡਰ ਕਾਰਨ ਉਨ੍ਹਾਂ ਆਰ ਟੀ ਜੀ ਐੱਸ ਰਾਹੀਂ ਵੱਖ-ਵੱਖ ਖਾਤਿਆਂ ਵਿੱਚ 14 ਕਰੋੜ ਰੁਪਏ ਟਰਾਂਸਫਰ ਕਰ ਦਿੱਤੇ। ਪੀੜਤਾ ਨੇ ਰਾਸ਼ਟਰੀ ਸਾਈਬਰ ਕ੍ਰਾਈਮ ਹੈਲਪਲਾਈਨ ’ਤੇ ਸ਼ਿਕਾਇਤ ਦਰਜ ਕਰਵਾਈ ਹੈ। ਦਿੱਲੀ ਪੁਲੀਸ ਦੇ ਆਈ ਐੱਫ ਐੱਸ ਓ ਯੂਨਿਟ ਵੱਲੋਂ ਐੱਫ ਆਈ ਆਰ ਦਰਜ ਕਰ ਲਈ ਗਈ ਹੈ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ। ANI