CBSE Result Declared: ਬਿਨਾਂ ਇੰਟਰਨੈੱਟ ਦੇ SMS ਅਤੇ ਫ਼ੋਨ ਕਾਲ ਰਾਹੀਂ ਇੰਝ ਦੇਖੋ 10ਵੀਂ ਦੀ ਮਾਰਕਸ਼ੀਟ
ਡਿਜੀਲਾਕਰ ਤੇ ਉਮੰਗ ਐਪ ’ਤੇ ਵੀ ਦੇਖਿਆ ਜਾ ਸਕਦਾ ਹੈ ਨਤੀਜਾ
ਸੈਂਟਰਲ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ (CBSE) ਨੇ ਦਸਵੀਂ ਜਮਾਤ ਦੀ ਬੋਰਡ ਪ੍ਰੀਖਿਆ ਦਾ ਨਤੀਜਾ ਐਲਾਨ ਦਿੱਤਾ ਹੈ। ਇਸ ਵਾਰ ਪਹਿਲੀ ਵਾਰ ਬੋਰਡ ਨੇ ਅਪਰੈਲ ਮਹੀਨੇ ਵਿਚ ਨਤੀਜੇ ਐਲਾਨੇ ਹਨ ਕਿਉਂਕਿ ਇਸ ਵਾਰ ਸਾਲ ਵਿਚ ਦੋ ਵਾਰ ਪ੍ਰੀਖਿਆਵਾਂ ਹੋਣਗੀਆਂ। ਵਿਦਿਆਰਥੀ ਆਪਣਾ ਨਤੀਜਾ ਉਮੰਗ (UMANG) ਐਪ ਰਾਹੀਂ ਤੇ ਡਿਜੀਲਾਕਰ ਵਿਚ ਦੇਖ ਸਕਦੇ ਹਨ। ਇਸ ਸਾਲ ਬੋਰਡ ਦੀਆਂ ਪ੍ਰੀਖਿਆਵਾਂ 17 ਫਰਵਰੀ ਨੂੰ ਸ਼ੁਰੂ ਹੋਈਆਂ ਸਨ ਅਤੇ 6 ਮਾਰਚ ਨੂੰ ਖਤਮ ਹੋਈਆਂ ਸਨ। ਇਸ ਵਾਰ ਕੁੱਲ 25,08,319 ਵਿਦਿਆਰਥੀਆਂ ਨੇ ਪ੍ਰੀਖਿਆ ਦਿੱਤੀ ਸੀ ਜਿਸ ਵਿੱਚ 14,08,546 ਲੜਕੇ ਅਤੇ 10,99,773 ਲੜਕੀਆਂ ਸ਼ਾਮਲ ਸਨ। ਇਹ ਪ੍ਰੀਖਿਆਵਾਂ ਕੁੱਲ 83 ਵਿਸ਼ਿਆਂ ਲਈ 8,075 ਕੇਂਦਰਾਂ 'ਤੇ ਕਰਵਾਈਆਂ ਗਈਆਂ ਸਨ।
ਜਿਨ੍ਹਾਂ ਵਿਦਿਆਰਥੀਆਂ ਕੋਲ ਇੰਟਰਨੈੱਟ ਦੀ ਸਹੂਲਤ ਘੱਟ ਹੈ, CBSE ਨੇ ਉਨ੍ਹਾਂ ਲਈ SMS ਰਾਹੀਂ ਨਤੀਜਾ ਦੇਖਣ ਦੀ ਸਹੂਲਤ ਦਿੱਤੀ ਹੈ। ਵਿਦਿਆਰਥੀ ਆਪਣਾ ਰੋਲ ਨੰਬਰ (roll number), ਸਕੂਲ ਕੋਡ (school code) ਅਤੇ ਸੈਂਟਰ ਨੰਬਰ (centre number) ਨਿਰਧਾਰਤ ਫਾਰਮੈਟ ਵਿੱਚ ਲਿਖ ਕੇ 7738299899 'ਤੇ ਭੇਜ ਸਕਦੇ ਹਨ। ਨਤੀਜਾ ਸਿੱਧਾ ਉਨ੍ਹਾਂ ਦੇ ਮੋਬਾਈਲ ਫ਼ੋਨ 'ਤੇ ਭੇਜ ਦਿੱਤਾ ਜਾਵੇਗਾ।
ਇਸ ਤੋਂ ਇਲਾਵਾ, Interactive Voice Response System (IVRS) ਰਾਹੀਂ ਵਿਦਿਆਰਥੀ ਫ਼ੋਨ ਕਾਲ ਕਰਕੇ ਵੀ ਆਪਣਾ ਨਤੀਜਾ ਜਾਣ ਸਕਦੇ ਹਨ। ਦਿੱਲੀ ਦੇ ਵਿਦਿਆਰਥੀ 24300699 'ਤੇ ਡਾਇਲ ਕਰ ਸਕਦੇ ਹਨ, ਜਦੋਂ ਕਿ ਦੂਜੇ ਖੇਤਰਾਂ ਦੇ ਵਿਦਿਆਰਥੀ ਆਟੋਮੇਟਿਡ ਵਾਇਸ ਸਿਸਟਮ ਰਾਹੀਂ ਆਪਣੇ ਅੰਕ ਜਾਣਨ ਲਈ 011-24300699 'ਤੇ ਕਾਲ ਕਰ ਸਕਦੇ ਹਨ।
ਜਿਹੜੇ ਵਿਦਿਆਰਥੀ ਆਪਣੇ ਅੰਕਾਂ ਜਾਂ ਕਾਰਗੁਜ਼ਾਰੀ ਵਿੱਚ ਸੁਧਾਰ ਕਰਨਾ ਚਾਹੁੰਦੇ ਹਨ, ਉਨ੍ਹਾਂ ਕੋਲ ਇੰਪਰੂਵਮੈਂਟ ਪ੍ਰੀਖਿਆਵਾਂ ਵਿੱਚ ਬੈਠਣ ਦਾ ਵਿਕਲਪ ਵੀ ਮੌਜੂਦ ਹੈ। ਬੋਰਡ ਵੱਲੋਂ ਇਨ੍ਹਾਂ ਸੁਧਾਰ ਪ੍ਰੀਖਿਆਵਾਂ ਦੀ ਸਮਾਂ-ਸਾਰਣੀ ਦੀ ਡੇਟਸ਼ੀਟ ਆਉਣ ਵਾਲੇ ਦਿਨਾਂ ਵਿੱਚ ਜਾਰੀ ਕੀਤੀ ਜਾਵੇਗੀ।
