ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 18 ਅਪਰੈਲ
ਦਿੱਲੀ ਪੁਲੀਸ ਵੱਲੋਂ ਕੋਵਿਡ ਦੇ ਮਰੀਜ਼ਾਂ ਲਈ ਉਪਲੱਬਧ ਬਿਸਤਰੇ ਬਾਰੇ ਗਲਤ ਜਾਣਕਾਰੀ ਦੇਣ ਦੇ ਦੋਸ਼ ਹੇਠ ਦੋ ਨਿੱਜੀ ਹਸਪਤਾਲਾਂ ਖ਼ਿਲਾਫ਼ ਐੱਫਆਈਆਰ ਦਰਜ ਕੀਤੀ ਗਈ ਹੈ। ਪੁਲੀਸ ਨੇ ਦੱਸਿਆ ਕਿ ਦੁਆਰਕਾ ਤਹਿਸੀਲਦਾਰ ਸਮੇਤ ਤਿੰਨ ਅਧਿਕਾਰੀਆਂ ਦੀ ਟੀਮ ਹਸਪਤਾਲ ਪਹੁੰਚੀ। ਸੀਨੀਅਰ ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਚੰਨਣ ਦੇਵੀ ਹਸਪਤਾਲ ਪਹੁੰਚਣ ’ਤੇ ਉਨ੍ਹਾਂ ਐਮਰਜੈਂਸੀ ਵਾਰਡ ਵਿੱਚ ਕੋਵਿਡ ਮਰੀਜ਼ਾਂ ਲਈ ਹਸਪਤਾਲ ਵਿੱਚ ਬੈੱਡਾਂ ਦੀ ਉਪਲੱਬਧਤਾ ਬਾਰੇ ਪੁੱਛਗਿੱਛ ਕੀਤੀ ਤੇ ਡਿਊਟੀ ਵਾਲੇ ਅਮਲੇ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਕੋਵਿਡ ਦੇ ਮਰੀਜ਼ਾਂ ਲਈ ਕੋਈ ਬਿਸਤਰਾ ਨਹੀਂ ਹੈ। ਹਾਲਾਂਕਿ ਜਦੋਂ ਟੀਮ ਨੇ ਦਿੱਲੀ ਕੋਵਿਡ ਮਰੀਜ਼ ਪੋਰਟਲ ਦੀ ਜਾਂਚ ਕੀਤੀ ਤਾਂ ਇਹ ਦਿਖਾਇਆ ਕਿ ਹਸਪਤਾਲ ਵਿਚ ਮਰੀਜ਼ਾਂ ਲਈ 93 ਬੈੱਡ ਉਪਲੱਬਧ ਹਨ।
ਕਰਫਿਊ ਦੀ ਉਲੰਘਣਾਂ ਕਰਨ ’ਤੇ 500 ਤੋਂ ਵੱਧ ਖ਼ਿਲਾਫ਼ ਕੇਸ
ਦਿੱਲੀ ਪੁਲੀਸ ਨੇ ਕਰਫਿਊ ਉਲੰਘਣਾਂ ਦੇ 500 ਤੋਂ ਵੱਧ ਮਾਮਲੇ ਦਰਜ ਕੀਤੇ ਹਨ, ਜੋ ਨੇਮਾਂ ਦੀ ਅਣਦੇਖੀ ਕਰਕੇ ਘਰਾਂ ਤੋਂ ਬਿਨਾਂ ਕਾਰਨ ਬਾਹਰ ਨਿਕਲੇ ਹੋਏ ਸਨ। ਪੁਲੀਸ ਨੇ ਦੱਸਿਆ ਕਿ ਲੋਕ ਗੁਆਂਢੀ ਸੂਬਿਆਂ ਤੋਂ ਦਿੱਲੀ ਆ ਰਹੇ ਸਨ ਜਾਂ ਏਟੀਐੱਮਾਂ ਤੋਂ ਪੈਸੇ ਕਢਵਾਉਣ ਲਈ ਬਾਹਰ ਨਿਕਲੇ ਸਨ। ਕੁੱਝ ਸ਼ਰਾਬ ਦੀ ਖਰੀਦਦਾਰੀ ਲਈ ਕਰਫਿਊ ਦੌਰਾਨ ਬਾਹਰ ਆਏ ਤੇ ਪੁਲੀਸ ਦੀ ਕਾਰਵਾਈ ਦਾ ਸਾਹਮਣਾ ਕਰਨਾ ਪਿਆ।