Indigo ਤੋਂ ਬਾਅਦ ਹੁਣ Air Indian ਨੇ ਵੀ ਵਧਾਇਆ ਫਿਊਲ ਸਰਚਾਰਜ

ਇੰਡੀਗੋ ਤੋਂ ਬਾਅਦ ਹੁਣ ਏਅਰ ਇੰਡੀਆ ਨੇ ਵੀ ਘਰੇਲੂ ਅਤੇ ਅੰਤਰਰਾਸ਼ਟਰੀ ਉਡਾਣਾਂ 'ਤੇ ਫਿਊਲ ਸਰਚਾਰਜ (ਤੇਲ ਦੀ ਕੀਮਤ 'ਤੇ ਵਾਧੂ ਚਾਰਜ) ਵਧਾਉਣ ਦਾ ਐਲਾਨ ਕਰ ਦਿੱਤਾ ਹੈ, ਜਿਸ ਨਾਲ ਹਵਾਈ ਸਫਰ ਮਹਿੰਗਾ ਹੋ ਸਕਦਾ ਹੈ। ਇਹ ਫੈਸਲਾ ਹਵਾਬਾਜ਼ੀ ਟਰਬਾਈਨ ਫਿਊਲ (ATF) ਦੀਆਂ ਕੀਮਤਾਂ ਵਿੱਚ ਭਾਰੀ ਉਛਾਲ ਕਾਰਨ ਲਿਆ ਗਿਆ ਹੈ। ਇੰਟਰਨੈਸ਼ਨਲ ਏਅਰ ਟਰਾਂਸਪੋਰਟ ਐਸੋਸੀਏਸ਼ਨ ਦੇ ਅਨੁਸਾਰ, ਇੱਕ ਮਹੀਨੇ ਵਿੱਚ ਜੈੱਟ ਈਂਧਨ ਦੀਆਂ ਦਰਾਂ ਲਗਪਗ ਦੁੱਗਣੀਆਂ ਹੋ ਗਈਆਂ ਹਨ। ਘਰੇਲੂ ਉਡਾਣਾਂ ਲਈ, ਏਅਰ ਇੰਡੀਆ 8 ਅਪਰੈਲ ਤੋਂ ਦੂਰੀ ਦੇ ਆਧਾਰ 'ਤੇ ਫਿਊਲ ਸਰਚਾਰਜ ਲਾਗੂ ਕਰੇਗੀ। ਨਵੇਂ ਢਾਂਚੇ ਤਹਿਤ, 500 ਕਿਲੋਮੀਟਰ ਤੱਕ ਦੀ ਦੂਰੀ ਲਈ ਯਾਤਰੀਆਂ ਨੂੰ 299 ਰੁਪਏ, 501-1,000 ਕਿਲੋਮੀਟਰ ਲਈ 399 ਰੁਪਏ, 1,001-1,500 ਕਿਲੋਮੀਟਰ ਲਈ 549 ਰੁਪਏ, 1,501-2,000 ਕਿਲੋਮੀਟਰ ਲਈ 749 ਰੁਪਏ ਅਤੇ 2,000 ਕਿਲੋਮੀਟਰ ਤੋਂ ਵੱਧ ਦੀ ਦੂਰੀ ਲਈ 899 ਰੁਪਏ ਪ੍ਰਤੀ ਸੈਕਟਰ ਦੇਣੇ ਪੈਣਗੇ। ਇਹ ਵਧੀਆਂ ਦਰਾਂ ਏਅਰ ਇੰਡੀਆ ਐਕਸਪ੍ਰੈਸ 'ਤੇ ਵੀ ਲਾਗੂ ਹੋਣਗੀਆਂ।

ਅੰਤਰਰਾਸ਼ਟਰੀ ਰੂਟਾਂ 'ਤੇ ਤੇਲ ਦੀਆਂ ਕੀਮਤਾਂ 'ਤੇ ਕੋਈ ਸਰਕਾਰੀ ਸੀਮਾ ਨਾ ਹੋਣ ਕਾਰਨ ਇੱਥੇ ਵਾਧਾ ਹੋਰ ਵੀ ਜ਼ਿਆਦਾ ਹੈ। ਪੱਛਮੀ ਏਸ਼ੀਆ ਜਾਣ ਵਾਲੇ ਯਾਤਰੀਆਂ ਨੂੰ ਹੁਣ 50 ਡਾਲਰ, ਦੱਖਣੀ-ਪੂਰਬੀ ਏਸ਼ੀਆ ਲਈ 100 ਡਾਲਰ, ਸਿੰਗਾਪੁਰ ਲਈ 60 ਡਾਲਰ ਅਤੇ ਅਫਰੀਕਾ ਦੇ ਰੂਟਾਂ ਲਈ 130 ਡਾਲਰ ਫਿਊਲ ਸਰਚਾਰਜ ਵਜੋਂ ਦੇਣੇ ਪੈਣਗੇ। ਲੰਬੀ ਦੂਰੀ ਦੀਆਂ ਉਡਾਣਾਂ ਜਿਵੇਂ ਕਿ ਯੂਰਪ ਅਤੇ ਯੂਨਾਈਟਿਡ ਕਿੰਗਡਮ ਲਈ 205 ਡਾਲਰ, ਜਦੋਂ ਕਿ ਉੱਤਰੀ ਅਮਰੀਕਾ ਅਤੇ ਆਸਟਰੇਲੀਆ ਦੇ ਰੂਟਾਂ ਲਈ 10 ਅਪਰੈਲ ਤੋਂ 280 ਡਾਲਰ ਦਾ ਸਰਚਾਰਜ ਲੱਗੇਗਾ। ਏਅਰ ਇੰਡੀਆ ਨੇ ਕਿਹਾ ਹੈ ਕਿ ਪ੍ਰਭਾਵੀ ਤਰੀਕਾਂ ਤੋਂ ਪਹਿਲਾਂ ਜਾਰੀ ਕੀਤੀਆਂ ਟਿਕਟਾਂ 'ਤੇ ਇਸ ਦਾ ਕੋਈ ਅਸਰ ਨਹੀਂ ਪਵੇਗਾ। ਇੰਡੀਗੋ ਅਤੇ ਏਅਰ ਇੰਡੀਆ ਦੋਵਾਂ ਵੱਲੋਂ ਚਾਰਜ ਵਧਾਉਣ ਨਾਲ, ਆਉਣ ਵਾਲੇ ਹਫ਼ਤਿਆਂ ਅਤੇ ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਹਵਾਈ ਕਿਰਾਏ ਉੱਚੇ ਰਹਿਣ ਦੀ ਉਮੀਦ ਹੈ।