ਮਹਿਲਾ ਦੀ ਮੌਤ ਦਾ ਮਾਮਲਾ ਭਖ਼ਿਆ

ਪਟਿਆਲਾ ਜ਼ਿਲ੍ਹੇ ਦੇ ਪਿੰਡ ਫੱਗਣਮਾਜਰਾ ਵਾਸੀ ਅਮਰਜੀਤ ਕੌਰ (42) ਦੀ 7 ਨਵੰਬਰ ਨੂੰ ਪੀ ਜੀ ਆਈ ਚੰਡੀਗੜ੍ਹ ਵਿੱਚ ਹੋਈ ਮੌਤ ਦਾ ਮਾਮਲਾ ਭਖ਼ ਗਿਆ ਹੈ। ਮੌਤ ਤੋਂ ਤਿੰਨ ਹਫ਼ਤੇ ਬਾਅਦ ਮਹਿਲਾ ਦੇ ਪਰਿਵਾਰ ਅਤੇ ਭਾਰਤੀ ਕਿਸਾਨ ਯੂਨੀਅਨ ਆਜ਼ਾਦ ਨੇ ਅੱਜ ਬਨੂੜ ਤੋਂ ਰਾਜਪੁਰਾ ਨੂੰ ਜਾਂਦੇ ਕੌਮੀ ਮਾਰਗ ’ਤੇ ਸਥਿਤ ਨੀਲਮ ਹਸਪਤਾਲ ਦੇ ਗੇਟ ਉੱਤੇ ਧਰਨਾ ਆਰੰਭ ਕਰ ਦਿੱਤਾ। ਧਰਨਾਕਾਰੀਆਂ ਨੇ ਹਸਪਤਾਲ ਪ੍ਰਬੰਧਨ ’ਤੇ ਅਣਗਹਿਲੀ ਦਾ ਦੋਸ਼ ਲਾਉਂਦਿਆਂ ਨਾਅਰੇਬਾਜ਼ੀ ਕੀਤੀ ਅਤੇ ਲੋੜੀਂਦੀ ਕਾਰਵਾਈ ਦੀ ਮੰਗ ਕੀਤੀ।

ਧਰਨੇ ਦਾ ਪਤਾ ਲੱਗਦਿਆਂ ਰਾਜਪੁਰਾ ਤੋਂ ਡੀ ਐੱਸ ਪੀ ਮਨਜੀਤ ਸਿੰਘ ਅਤੇ ਥਾਣਾ ਬਨੂੜ ਦੇ ਸਬ ਇੰਸਪੈਕਟਰ ਨਰਿੰਦਰ ਸਿੰਘ ਦੀ ਅਗਵਾਈ ਹੇਠ ਪੁਲੀਸ ਮੌਕੇ ’ਤੇ ਪਹੁੰਚੀ ਤੇ ਧਰਨਾਕਾਰੀਆਂ ਨਾਲ ਗੱਲਬਾਤ ਕਰਕੇ ਧਰਨੇ ਨੂੰ ਗੇਟ ਤੋਂ ਹਟਵਾ ਕੇ ਹਸਪਤਾਲ ਮੂਹਰਿਉਂ ਲੰਘਦੇ ਕੌਮੀ ਮਾਰਗ ਦੇ ਓਵਰਬਰਿੱਜ ਥੱਲੇ ਤਬਦੀਲ ਕਰਵਾ ਦਿੱਤਾ। ਦੇਰ ਰਾਤ ਤੱਕ ਧਰਨਾ ਜਾਰੀ ਸੀ। ਅਮਰਜੀਤ ਕੌਰ ਦੇ ਪਤੀ ਬਹਾਦਰ ਸਿੰਘ ਫੱਗਣ ਮਾਜਰਾ, ਭਾਰਤੀ ਕਿਸਾਨ ਯੂਨੀਅਨ ਆਜ਼ਾਦ ਦੇ ਸੂਬਾਈ ਆਗੂ ਕਰਨੈਲ ਸਿੰਘ ਲੰਗ, ਪਰਮਜੀਤ ਸਿੰਘ, ਇੰਦਰਜੀਤ ਸਿੰਘ ਰੀਠਖੇੜੀ, ਪਿਆਰਾ ਸਿੰਘ, ਹਰਬੰਸ ਸਿੰਘ, ਕ੍ਰਿਸ਼ਨ ਸਿੰਘ, ਰਣਧੀਰ ਸਿੰਘ, ਸਰਪੰਚ ਚਰਨਜੀਤ ਸਿੰਘ ਸਧਰੋਰ, ਪਰਮਜੀਤ ਸਿੰਘ, ਗੁਰਦੇਵ ਸਿੰਘ ਅਤੇ ਗੁਲਜ਼ਾਰ ਸਿੰਘ ਨੇ ਦੱਸਿਆ ਕਿ ਅਮਰਜੀਤ ਕੌਰ ਨੇ ਜੁਲਾਈ ਮਹੀਨੇ ਵਿੱਚ ਨੀਲਮ ਹਸਪਤਾਲ ਤੋਂ ਚੂਲਾ ਬਦਲਵਾਇਆ ਸੀ। ਉਨ੍ਹਾਂ ਦੱਸਿਆ ਕਿ ਡਾਕਟਰਾਂ ਨੇ ਅਣਗਹਿਲੀ ਵਰਤਦਿਆਂ ਅਪਰੇਸ਼ਨ ਦੌਰਾਨ ਚੂਲਾ ਛੋਟਾ ਪਾ ਦਿੱਤਾ ਸੀ, ਜਿਸ ਕਾਰਨ ਅਮਰਜੀਤ ਕੌਰ ਦੇ ਲੱਕ ਵਿੱਚ ਦਰਦ ਰਹਿਣ ਲੱਗਿਆ।

ਜਦੋਂ ਉਹ ਮੁੜ ਅਮਰਜੀਤ ਕੌਰ ਨੂੰ ਹਸਪਤਾਲ ਲੈ ਕੇ ਆਏ ਡਾਕਟਰਾਂ ਨੇ ਦੁਬਾਰਾ ਅਪਰੇਸ਼ਨ ਕਰ ਦਿੱਤਾ। ਜ਼ਖ਼ਮ ਵੱਡਾ ਹੋਣ ਕਾਰਨ ਹਸਪਤਾਲ ਦੇ ਡਾਕਟਰਾਂ ਵੱਲੋਂ ਵਾਰ-ਵਾਰ ਇਲਾਜ ਕਰਨ ਦੇ ਬਾਅਦ ਵੀ ਠੀਕ ਨਹੀਂ ਹੋਇਆ। ਉਹ ਅਮਰਜੀਤ ਕੌਰ ਨੂੰ ਪੀ ਜੀ ਆਈ ਲੈ ਗਏ, ਜਿੱਥੇ ਉਸ ਦੀ ਇਲਾਜ ਦੌਰਾਨ ਸੱਤ ਨਵੰਬਰ ਨੂੰ ਮੌਤ ਹੋ ਗਈ। ਉਨ੍ਹਾਂ ਕਿਹਾ ਕਿ ਪੀ ਜੀ ਆਈ ਦੇ ਡਾਕਟਰਾਂ ਨੇ ਵੀ ਮੌਤ ਦਾ ਕਾਰਨ ਇੰਨਫ਼ੈਕਸ਼ਨ ਦੱਸਿਆ ਹੈ ਤੇ ਇਸ ਲਈ ਨੀਲਮ ਹਸਪਤਾਲ ਦੇ ਸਬੰਧਿਤ ਡਾਕਟਰ ਜ਼ਿੰਮੇਵਾਰ ਹਨ।

ਪ੍ਰਦਰਸ਼ਨਕਾਰੀਆਂ ਨੇ ਕਿਹਾ ਕਿ ਜਦੋਂ ਤੱਕ ਮੌਤ ਦੇ ਮਾਮਲੇ ਵਿਚ ਬਣਦੀ ਕਾਰਵਾਈ ਨਹੀਂ ਹੁੰਦੀ ਅਤੇ ਲੋੜੀਂਦੀ ਭਰਪਾਈ ਨਹੀਂ ਹੁੰਦੀ ਉਹ ਪੱਕੇ ਤੌਰ ’ਤੇ ਇੱਥੇ ਧਰਨਾ ਜਾਰੀ ਰੱਖਣਗੇ।

ਉਨ੍ਹਾਂ ਕਿਹਾ ਕਿ ਆਯੂਸ਼ਮਾਨ ਕਾਰਡ ਤੋਂ ਪੈਸੇ ਹਾਸਲ ਕਰਨ ਦੇ ਬਾਵਜੂਦ ਮਰੀਜ਼ ਦੇ ਪਰਿਵਾਰ ਕੋਲੋਂ 38 ਹਜ਼ਾਰ ਦੀ ਨਕਦੀ ਵੀ ਵਸੂਲੀ ਗਈ। ਅਮਰਜੀਤ ਕੌਰ ਦੋ ਬੱਚਿਆਂ ਦੀ ਮਾਂ ਸੀ।

ਹਸਪਤਾਲ ਪ੍ਰਬੰਧਨ ਨੇ ਦੋਸ਼ ਨਕਾਰੇ

ਨੀਲਮ ਹਸਪਤਾਲ ਦੇ ਪ੍ਰਬੰਧਕੀ ਅਧਿਕਾਰੀ ਡਾ. ਸੰਦੀਪ ਵੱਤਸ ਨੇ ਸਾਰੇ ਦੋਸ਼ਾਂ ਨੂੰ ਸਿਰੇ ਤੋਂ ਖਾਰਜ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਅਮਰਜੀਤ ਕੌਰ 13 ਜੁਲਾਈ ਨੂੰ ਇਲਾਜ ਵਾਸਤੇ ਹਸਪਤਾਲ ਆਈ ਸੀ ਅਤੇ ਅਪਰੇਸ਼ਨ ਮਗਰੋਂ ਠੀਕ ਹੋ ਕੇ ਘਰ ਚਲੀ ਗਈ। ਉਨ੍ਹਾਂ ਕਿਹਾ ਕਿ ਘਰ ਵਿੱਚ ਕੰਮ ਕਰਦਿਆਂ ਉਹ ਮੁੜ ਡਿੱਗ ਗਈ, ਜਿਸ ਕਾਰਨ ਉਸ ਦਾ ਚੂਲਾ ਖਰਾਬ ਹੋ ਗਿਆ। ਉਨ੍ਹਾਂ ਦੱਸਿਆ ਕਿ ਮਹਿਲਾ ਦਾ ਪੁਰਾਣੇ ਖਰਚੇ ’ਤੇ ਹੀ ਦੋ ਸਤੰਬਰ ਨੂੰ ਮੁੜ ਅਪਰੇਸ਼ਨ ਕਰਕੇ ਚੂਲਾ ਬਦਲਿਆ ਗਿਆ। ਉਨ੍ਹਾਂ ਕਿਹਾ ਕਿ ਚੂਲਾ ਛੋਟਾ ਪਾਉਣ ਜਾਂ ਹਸਪਤਾਲ ਵੱਲੋਂ ਕੋਈ ਵੀ ਅਣਗਹਿਲੀ ਵਰਤਣ ਦੇ ਦੋਸ਼ ਬੇਬੁਨਿਆਦ ਹਨ। ਉਨ੍ਹਾਂ ਕਿਹਾ ਕਿ ਪਰਿਵਾਰ ਸਿਹਤ ਵਿਭਾਗ ਜਾਂ ਸਿਵਲ ਸਰਜਨ ਕੋਲ ਸ਼ਿਕਾਇਤ ਕਰ ਸਕਦਾ ਹੈ, ਜੇਕਰ ਜਾਂਚ ਉਪਰੰਤ ਹਸਪਤਾਲ ਦੀ ਕੋਈ ਵੀ ਅਣਗਹਿਲੀ ਸਾਹਮਣੇ ਆਈ ਤਾਂ ਉਹ ਇਸ ਦਾ ਇਵਜ਼ਾਨਾ ਭੁਗਤਣ ਲਈ ਤਿਆਰ ਹਨ।