ਹਰਜੀਤ ਸਿੰਘ
ਡੇਰਾਬੱਸੀ, 24 ਅਕਤੂਬਰ
ਇਸ ਖੇਤਰ ਵਿੱਚ ਅੱਜ ਕਰਵਾਚੌਥ ਵਾਲੇ ਦਿਨ ਡੇਂਗੂ ਨਾਲ ਦੋ ਸੁਹਾਗਣਾਂ ਦੇ ਸੁਹਾਗ ਉਜੜ ਗਏ। ਇਥੋਂ ਦੇ ਪਿੰਡ ਕਾਰਕੌਰ ਵਸਨੀਕ ਕਾਂਗਰਸ ਪਾਰਟੀ ਤੋਂ ਬਲਾਕ ਸਮਿਤੀ ਮੈਂਬਰ ਧਰਮਿੰਦਰ ਸਿੰਘ ਕਾਰਕੌਰ ਅਤੇ ਇਥੋਂ ਦੀ ਗੁਲਾਬਗੜ੍ਹ ਰੋਡ ਦੇ ਵਸਨੀਕ ਇਕ ਦੁਕਾਨਦਾਰ ਰਾਜੀਵ ਥੰਮਨ ਦੀ ਮੌਤ ਹੋ ਗਈ। ਦੋਵਾਂ ਜਣਿਆਂ ਨੂੰ ਬੁਖ਼ਾਰ ਤੋਂ ਪਲੇਟਲੈਟਸ ਘਟਣ ਦੀ ਸ਼ਿਕਾਇਤ ਨੂੰ ਲੈ ਕੇ ਇਥੋਂ ਦੇ ਇਕ ਨਿੱਜੀ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਸੀ। ਉਥੇ ਇਲਾਜ ਦੌਰਾਨ ਉਨ੍ਹਾਂ ਦੀ ਮੌਤ ਹੋ ਗਈ। ਇਸ ਕਾਰਨ ਇਲਾਕੇ ਦੇ ਲੋਕਾਂ ਵਿੱਚ ਸਹਿਮ ਦਾ ਮਾਹੌਲ ਪੈਦਾ ਹੋ ਗਿਆ। ਉਥੇ ਲੋਕਾਂ ਵਿੱਚ ਸਿਹਤ ਵਿਭਾਗ ਵਿਰੁੱਧ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। ਲੋਕਾਂ ਨੇ ਦੋਸ਼ ਲਾਇਆ ਕਿ ਡੇਂਗੂ ਅਤੇ ਪੇਚਿਸ਼ ਨਾਲ ਸਥਿਤੀ ਬੇਕਾਬੂ ਹੁੰਦੀ ਜਾ ਰਹੀ ਹੈ। ਦੂਜੇ ਪਾਸੇ ਸਿਹਤ ਵਿਭਾਗ ਹੱਥ ’ਤੇ ਹੱਥ ਧਰ ਕੇ ਬੈਠਾ ਹੈ। ਇਲਾਕੇ ਵਿੱਚ ਰੋਜ਼ਾਨਾ ਕਿਸੇ ਨਾ ਕਿਸੇ ਵਿਅਕਤੀ ਦੀ ਡੇਂਗੂ ਜਾਂ ਪੇਚਿਸ਼ ਨਾਲ ਮੌਤ ਹੋ ਰਹੀ ਹੈ। ਘਰ ਘਰ ਲੋਕ ਬਿਮਾਰ ਪਏ ਹਨ। ਸਰਕਾਰੀ ਅਤੇ ਨਿੱਜੀ ਹਸਪਤਾਲ ਮਰੀਜ਼ਾਂ ਨਾਲ ਭਰੇ ਹੋਏ ਹਨ। ਸਰਕਾਰੀ ਹਸਪਤਾਲਾਂ ’ਚ ਤਾਂ ਹਾਲਤ ਐਨੀ ਮਾੜੀ ਹੈ ਕਿ ਇਕ ਇਕ ਬੈੱਡ ’ਤੇ ਤਿੰਨ ਤਿੰਨ ਮਰੀਜ਼ ਪਏ ਹਨ।
ਸਿਹਤ ਵਿਭਾਗ ਤੋਂ ਮਿਲੇ ਅੰਕੜਿਆਂ ਮੁਤਾਬਕ ਲੰਘੇ ਸਤੰਬਰ ਮਹੀਨੇ ਵਿੱਚ ਡੇਂਗੂ ਦੇ 102 ਮਰੀਜ਼ ਸਾਹਮਣੇ ਆਏ ਸਨ। ਉਥੇ ਹੀ ਅਕਤੂਬਰ ਵਿੱਚ ਇਹ ਅੰਕੜਾ 400 ਤੋਂ ਉੱਪਰ ਪਹੁੰਚ ਗਿਆ ਹੈ। ਇਸੇ ਤਰ੍ਹਾਂ ਪੇਚਿਸ਼ ਕਾਰਨ ਹੁਣ ਤੱਕ ਇਲਾਕੇ ਵਿੱਚ ਨੌਂ ਮੌਤਾਂ ਹੋ ਚੁੱਕੀਆਂ ਹਨ। ਲੰਘੇ 24 ਘੰਟੇ ਦੌਰਾਨ ਪੇਚਿਸ਼ ਦੇ 32 ਮਰੀਜ਼ ਸਾਹਮਣੇ ਆਏ ਹਨ।
ਇਸ ਸਬੰਧੀ ਗੱਲ ਕਰਨ ’ਤੇ ਸਿਵਲ ਹਸਪਤਾਲ ਦੀ ਐਸ.ਐਮ.ਓ. ਡਾ. ਸੰਗੀਤਾ ਜੈਨ ਨੇ ਕਿਹਾ ਕਿ ਦੋਵੇਂ ਮੌਤਾਂ ਬਾਰੇ ਉਨ੍ਹਾਂ ਨੂੰ ਜਾਣਕਾਰੀ ਮਿਲੀ ਹੈ। ਉਹ ਇਨ੍ਹਾਂ ਦੋਵੇਂ ਮੌਤਾਂ ਦੀ ਡੇਂਗੂ ਜਾਂ ਪੇਚਿਸ਼ ਨਾਲ ਹੋਣ ਦੀ ਜਾਂਚ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਪੇਚਿਸ਼ ਦੀ ਬਿਮਾਰੀ ਤੋਂ ਨਿਪਟਣ ਲਈ ਇਲਾਕੇ ਵਿੱਚ 22 ਪਾਣੀ ਦੀ ਸੈਂਪਲ ਲਏ ਗਏ ਹਨ ਜਿਨ੍ਹਾਂ ਦੀ ਕੱਲ੍ਹ ਰਿਪੋਰਟ ਆ ਜਾਏਗੀ।