Punjab ’ਚ ਜ਼ਮੀਨ-ਜਾਇਦਾਦ ਦੀ ਰਜਿਸਟਰੇਸ਼ਨ ਲਈ ਹੁਣ ਫਾਰਸੀ ਤੇ ਉਰਦੂ ਦੀ ਥਾਂ ਵਰਤੇ ਜਾਣਗੇ ਪੰਜਾਬੀ ਸ਼ਬਦ: 35 ਪੁਰਾਣੇ ਸ਼ਬਦ ਬਦਲੇ

ਪੰਜਾਬ ਸਰਕਾਰ ਨੇ ਨਾਗਰਿਕ ਪੱਖੀ ਸ਼ਾਸਨ ਵੱਲ ਇੱਕ ਵੱਡਾ ਕਦਮ ਚੁੱਕਦਿਆਂ ਜਾਇਦਾਦ ਦੀ ਰਜਿਸਟ੍ਰੇਸ਼ਨ ਵਾਲੇ ਦਸਤਾਵੇਜ਼ਾਂ ਵਿੱਚ ਵਰਤੇ ਜਾਂਦੇ ਮਾਲ ਵਿਭਾਗ ਦੇ 35 ਔਖੇ ਅਤੇ ਪੁਰਾਣੇ ਸ਼ਬਦਾਂ ਨੂੰ ਬਦਲ ਕੇ ਉਨ੍ਹਾਂ ਦੀ ਥਾਂ ਆਮ ਵਰਤੋਂ ਵਾਲੇ ਸਰਲ ਪੰਜਾਬੀ ਸ਼ਬਦ ਲਾਗੂ ਕਰ ਦਿੱਤੇ ਹਨ। ਇਸ ਫੈਸਲੇ ਦਾ ਮੁੱਖ ਮਨੋਰਥ ਜ਼ਮੀਨ ਅਤੇ ਜਾਇਦਾਦ ਨਾਲ ਸਬੰਧਤ ਕਾਗਜ਼ਾਤ ਸਮਝਣ ਵੇਲੇ ਆਮ ਲੋਕਾਂ ਨੂੰ ਆਉਂਦੀਆਂ ਪ੍ਰੇਸ਼ਾਨੀਆਂ ਅਤੇ ਉਲਝਣਾਂ ਨੂੰ ਖ਼ਤਮ ਕਰਨਾ ਹੈ।

ਮਾਲ, ਮੁੜ ਵਸੇਬਾ ਅਤੇ ਆਫ਼ਤ ਪ੍ਰਬੰਧਨ ਮੰਤਰੀ ਹਰਦੀਪ ਸਿੰਘ ਮੁੰਡੀਆਂ ਨੇ ਦੱਸਿਆ ਕਿ ਦਸਤਾਵੇਜ਼ਾਂ ਵਿੱਚ ਲੰਮੇ ਸਮੇਂ ਤੋਂ ਚੱਲ ਰਹੇ ਪੁਰਾਣੇ ਫਾਰਸੀ ਅਤੇ ਉਰਦੂ ਭਾਸ਼ਾ ਦੇ ਸ਼ਬਦ ਆਮ ਜਨਤਾ ਲਈ ਸਰਕਾਰੀ ਕਾਗਜ਼ਾਤ ਸਮਝਣ ਵਿੱਚ ਵੱਡੀ ਰੁਕਾਵਟ ਬਣ ਰਹੇ ਸਨ।

ਖ਼ਾਸ ਕਮੇਟੀ ਦੀਆਂ ਸਿਫ਼ਾਰਸ਼ਾਂ 'ਤੇ ਲਿਆ ਗਿਆ ਫੈਸਲਾ

ਇਸ ਨਵੀਂ ਪਹਿਲਕਦਮੀ ਦਾ ਐਲਾਨ ਕਰਦਿਆਂ ਕੈਬਨਿਟ ਮੰਤਰੀ ਮੁੰਡੀਆਂ ਨੇ ਦੱਸਿਆ ਕਿ ਇਹ ਫੈਸਲਾ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠ ਲਿਆ ਗਿਆ ਹੈ। ਉਨ੍ਹਾਂ ਕਿਹਾ, "ਜਾਇਦਾਦ ਦੀ ਰਜਿਸਟ੍ਰੇਸ਼ਨ ਵੇਲੇ ਵਰਤੀ ਜਾਂਦੀ ਪੁਰਾਣੀ ਸ਼ਬਦਾਵਲੀ ਕਾਰਨ ਅਕਸਰ ਆਮ ਲੋਕ ਭੰਬਲਭੂਸੇ ਵਿੱਚ ਪੈ ਜਾਂਦੇ ਸਨ। ਮੁੱਖ ਮੰਤਰੀ ਦੇ ਨਿਰਦੇਸ਼ਾਂ 'ਤੇ ਮਾਲ ਅਤੇ ਮੁੜ ਵਸੇਬਾ ਵਿਭਾਗ ਨੇ ਸਰਲ ਵਿਕਲਪ ਸੁਝਾਉਣ ਲਈ ਇੱਕ ਵਿਸ਼ੇਸ਼ ਕਮੇਟੀ ਦਾ ਗਠਨ ਕੀਤਾ ਸੀ।" ਮੰਤਰੀ ਨੇ ਅੱਗੇ ਕਿਹਾ ਕਿ ਇਸ ਦਾ ਮਕਸਦ ਇਹ ਯਕੀਨੀ ਬਣਾਉਣਾ ਹੈ ਕਿ ਕਿਸੇ ਵੀ ਨਾਗਰਿਕ ਨੂੰ ਆਪਣੀ ਜ਼ਮੀਨ ਜਾਂ ਜਾਇਦਾਦ ਦੇ ਕਾਗਜ਼ਾਤ ਸਮਝਣ ਵਿੱਚ ਕੋਈ ਅਣਚਾਹੀ ਮੁਸ਼ਕਿਲ ਨਾ ਆਵੇ।

ਅਧਿਕਾਰੀਆਂ ਨੂੰ ਪਹਿਲ ਦੇ ਆਧਾਰ 'ਤੇ ਨਿਯਮ ਲਾਗੂ ਕਰਨ ਦੀ ਹਦਾਇਤ

ਮਾਲ ਮੰਤਰੀ ਨੇ ਦੱਸਿਆ ਕਿ ਸਰਕਾਰ ਨੇ ਰਜਿਸਟ੍ਰੇਸ਼ਨ ਦੇ ਇੰਸਪੈਕਟਰ ਜਨਰਲ (IG Registration) ਅਤੇ ਸਮੂਹ ਡਿਪਟੀ ਕਮਿਸ਼ਨਰਾਂ ਨੂੰ ਜਾਇਦਾਦ ਦੀ ਰਜਿਸਟ੍ਰੇਸ਼ਨ ਦੇ ਦਸਤਾਵੇਜ਼ਾਂ ਵਿੱਚ ਇਨ੍ਹਾਂ ਨਵੇਂ ਸ਼ਬਦਾਂ ਨੂੰ ਪਹਿਲ ਦੇ ਆਧਾਰ 'ਤੇ ਲਾਗੂ ਕਰਨ ਦੇ ਹੁਕਮ ਦਿੱਤੇ ਹਨ। ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤੇ ਗਏ ਹਨ ਕਿ ਉਹ ਨਵੇਂ ਪੰਜਾਬੀ ਸ਼ਬਦਾਂ ਦੀ ਵਰਤੋਂ ਯਕੀਨੀ ਬਣਾਉਣ, ਤਾਂ ਜੋ ਲਿਖਤ ਨੂੰ ਪੜ੍ਹਨਾ ਆਸਾਨ ਹੋਵੇ ਅਤੇ ਖਰੀਦੋ-ਫਰੋਖਤ ਵੇਲੇ ਲੋਕਾਂ ਦੀ ਖੱਜਲ-ਖੁਆਰੀ ਘਟੇ।

ਬਦਲੇ ਗਏ ਮੁੱਖ ਸ਼ਬਦਾਂ ਦੀ ਸੂਚੀ:ਬਦਲੇ ਗਏ 35 ਸ਼ਬਦਾਂ ਵਿੱਚੋਂ ਮੁੱਖ ਹੇਠ ਲਿਖੇ ਅਨੁਸਾਰ ਹਨ:

ਅਰਾਜ਼ੀ (Arazi): ਜ਼ਮੀਨ

ਸਾਕਿਨ (Sakin): ਵਸਨੀਕ

ਹਿਬਾ (Hiba): ਤਰਮੀਮ (ਗਿਫ਼ਟ/ਉਪਹਾਰ)

ਦਾਨ (Daan): ਸੋਧ/ਦਰੁਸਤੀ

ਦਾਖ਼ਿਲ ਖ਼ਾਰਜ (Dakhil Kharij): ਇੰਤਕਾਲ (ਮਿਊਟੇਸ਼ਨ)

ਫੌਤ (Faut): ਮੌਤ (ਮਾਲਕ ਦੀ ਮੌਤ)

ਫਰਦ (Fard): ਨਕਲ ਜਮ੍ਹਾਬੰਦੀ

ਬੈਨਾਮਾ (Bainama): ਵਿਕਰੀ ਨਾਮਾ (ਸੇਲ ਡੀਡ)

ਮੁਸ਼ਤਰਕਾ (Mushtarka): ਸਾਂਝੀ

ਰੱਦ ਕਰਨਾ/ਖ਼ਾਰਜ ਕਰਨਾ: ਮਨਸੂਖ਼ ਕਰਨਾ

ਇਨ੍ਹਾਂ ਤੋਂ ਇਲਾਵਾ 'ਮੁੰਤਕੀ' ਦੀ ਥਾਂ 'ਤਬਦੀਲ', 'ਉਜ਼ਰ' ਦੀ ਥਾਂ 'ਇਤਰਾਜ਼' ਅਤੇ 'ਹਸਬ ਜ਼ਾਬਤਾ' ਦੀ ਥਾਂ 'ਕਾਨੂੰਨ ਅਨੁਸਾਰ' ਵਰਗੇ ਸ਼ਬਦ ਸ਼ਾਮਲ ਕੀਤੇ ਗਏ ਹਨ।

ਸੂਬਾ ਸਰਕਾਰ ਦਾ ਮੰਨਣਾ ਹੈ ਕਿ ਇਸ ਸ਼ਬਦਾਵਲੀ ਦੇ ਸਰਲੀਕਰਨ ਨਾਲ ਜ਼ਮੀਨੀ ਰਿਕਾਰਡ ਅਤੇ ਰਜਿਸਟ੍ਰੇਸ਼ਨ ਪ੍ਰਕਿਰਿਆ ਵਧੇਰੇ ਪਾਰਦਰਸ਼ੀ ਅਤੇ ਸੁਖਾਲੀ ਹੋ ਜਾਵੇਗੀ। ਆਉਂਦੇ ਦਿਨਾਂ ਵਿੱਚ ਇਹ ਨਵੀਂ ਸ਼ਬਦਾਵਲੀ ਪੰਜਾਬ ਦੇ ਸਮੂਹ ਰਜਿਸਟ੍ਰੇਸ਼ਨ ਦਫ਼ਤਰਾਂ ਵਿੱਚ ਪੂਰੀ ਤਰ੍ਹਾਂ ਲਾਗੂ ਕਰ ਦਿੱਤੀ ਜਾਵੇਗੀ।