PU Elections 2026: ਨਾਅਰੇਬਾਜ਼ੀ ਅਤੇ ਭੀੜ ਇਕੱਠੀ ਹੋਣ ਤੋਂ ਬਾਅਦ DAV ਕਾਲਜ ਦਾ ਬਾਹਰਲਾ ਖੇਤਰ ਖ਼ਾਲੀ ਕਰਵਾਇਆ
ਆਈ-ਕਾਰਡ ਦਿਖਾ ਕੇ ਵਿਦਿਆਰਥੀ ਪਾ ਰਹੇ ਵੋਟ; 8 ਕਾਲਜਾਂ ਵਿੱਚ 39,386 ਵੋਟਰ
ਚੰਡੀਗੜ੍ਹ ਵਿੱਚ ਪੰਜਾਬ ਯੂਨੀਵਰਸਿਟੀ ਨਾਲ ਸਬੰਧਤ ਕਾਲਜਾਂ 'ਚ ਵਿਦਿਆਰਥੀ ਕੌਂਸਲ ਚੋਣਾਂ ਲਈ ਵੋਟਿੰਗ ਜਾਰੀ ਹੈ। ਅੱਜ ਸਵੇਰ ਤੋਂ ਹੀ ਵਿਦਿਆਰਥੀ ਆਈ-ਕਾਰਡ ਦਿਖਾ ਕੇ ਆਪਣੇ ਵੋਟਿੰਗ ਬੂਥਾਂ ਵਿੱਚ ਦਾਖ਼ਲ ਹੋ ਰਹੇ ਹਨ। ਇਸ ਦੌਰਾਨ ਨਾਅਰੇਬਾਜ਼ੀ ਅਤੇ ਭੀੜ ਇਕੱਠੀ ਹੋਣ ਤੋਂ ਬਾਅਦ ਡੀ ਏ ਵੀ ਕਾਲਜ, ਸੈਕਟਰ-10 ਦਾ ਬਾਹਰਲਾ ਖੇਤਰ ਖ਼ਾਲੀ ਕਰਵਾਇਆ ਗਿਆ ਹੈ।
ਦਰਅਸਲ ਡੀ ਏ ਵੀ ਕਾਲਜ ਵਿੱਚ ਦੁਪਹਿਰ ਬਾਰਾਂ ਵਜੇ ਤੋਂ ਪਹਿਲਾਂ ਵੱਡੀ ਗਿਣਤੀ ਵਿੱਚ ਵਿਦਿਆਰਥੀ ਇਕੱਠੇ ਹੋ ਗਏ ਅਤੇ ਕਈ ਵਿਦਿਆਰਥੀਆਂ ਨੇ ਇੱਕ ਦੂਜੇ ਖ਼ਿਲਾਫ਼ ਨਾਅਰੇਬਾਜ਼ੀ ਸ਼ੁਰੂ ਕਰ ਦਿੱਤੀ। ਇਸ ਦੌਰਾਨ ਪੁਲੀਸ ਨੇ ਵਿਦਿਆਰਥੀਆਂ ਨੂੰ ਅਜਿਹਾ ਕਰਨ ਤੋਂ ਰੋਕਿਆ ਪਰ ਵਿਦਿਆਰਥੀ ਨਾ ਮੰਨੇ, ਜਿਸ ਤੋਂ ਬਾਅਦ ਪੁਲੀਸ ਨੇ ਵਿਦਿਆਰਥੀਆਂ ਨੂੰ ਧੱਕੇ ਮਾਰ ਕੇ ਕਾਲਜ ਦੇ ਗੇਟ ਅੱਗਿਓਂ ਕੱਢਿਆ ਅਤੇ ਉਨ੍ਹਾਂ ਨੂੰ ਬੈਰੀਕੇਡਿੰਗ ਤੋਂ ਬਾਹਰ ਜਾਣ ਦੀ ਚਿਤਾਵਨੀ ਦਿੱਤੀ। ਇਸ ਤੋਂ ਬਾਅਦ ਪੁਲੀਸ ਨੇ ਡੀ ਏ ਵੀ ਕਾਲਜ ਦੇ ਗੇਟ ਸਾਹਮਣੇ ਜਾਂਦੀ ਸੜਕ ਨੂੰ ਖ਼ਾਲੀ ਕਰਵਾ ਲਿਆ ਹੈ।
ਐੱਸ ਡੀ ਕਾਲਜ ਦੀ ਮਾਰਕੀਟ ਨੇੜੇ ਪੁਲੀਸ ਨੇ ਵਿਦਿਆਰਥੀ ਭਜਾਏ
ਐੱਸ ਡੀ ਕਾਲਜ ਸੈਕਟਰ-32 ਵਿੱਚ ਅੱਜ ਦੁਪਹਿਰ ਇੱਕ ਵਿਦਿਆਰਥੀ ਯੂਨੀਅਨ ਦੇ ਆਗੂ ਤੇ ਵਿਦਿਆਰਥੀ ਕਈ ਗੱਡੀਆਂ ਵਿੱਚ ਕਾਲਜ ਵੱਲ ਵਧੇ ਪਰ ਪੁਲੀਸ ਨੇ ਕਾਲਜ ਤੋਂ ਕੁਝ ਦੂਰ ਬੈਰੀਕੇਡਿੰਗ ਕੀਤੀ ਹੋਈ ਸੀ। ਇਨ੍ਹਾਂ ਵਿਦਿਆਰਥੀਆਂ ਦੀ ਪੁਲੀਸ ਨਾਲ ਬਹਿਸ ਹੋਈ ਪਰ ਪੁਲੀਸ ਨੇ ਸਖ਼ਤੀ ਕਰ ਕੇ ਇਨ੍ਹਾਂ ਵਿਦਿਆਰਥੀਆਂ ਨੂੰ ਉੱਥੋਂ ਭਜਾ ਦਿੱਤਾ ਹੈ।
8 ਕਾਲਜਾਂ ਵਿੱਚ 39,386 ਵੋਟਰ
ਸ਼ਹਿਰ ਦੇ 8 ਕਾਲਜਾਂ ਵਿੱਚ ਕੁੱਲ 39,386 ਵਿਦਿਆਰਥੀ ਵੋਟ ਪਾਉਣ ਦੇ ਯੋਗ ਹਨ। ਇਨ੍ਹਾਂ ਕਾਲਜਾਂ ਵਿੱਚ ਵੱਖ-ਵੱਖ ਅਹੁਦਿਆਂ ਲਈ ਵਿਦਿਆਰਥੀ ਜਥੇਬੰਦੀਆਂ ਦੇ ਪੈਨਲਾਂ ਅਤੇ ਆਜ਼ਾਦ ਉਮੀਦਵਾਰਾਂ ਵਿਚਾਲੇ ਮੁਕਾਬਲਾ ਹੈ।
ਡੀ ਏ ਵੀ ਕਾਲਜ ਸੈਕਟਰ-10 ਵਿੱਚ ਕੁੱਲ 7,521 ਵੋਟਰ ਹਨ, ਜਿਨ੍ਹਾਂ ਵਿੱਚ 4,570 ਲੜਕੇ ਅਤੇ 2,951 ਲੜਕੀਆਂ ਸ਼ਾਮਲ ਹਨ। ਇੱਥੇ ਪ੍ਰਧਾਨ, ਵਾਈਸ ਪ੍ਰਧਾਨ, ਜਨਰਲ ਸਕੱਤਰ ਅਤੇ ਜੁਆਇੰਟ ਸਕੱਤਰ ਸਮੇਤ ਵੱਖ-ਵੱਖ ਅਹੁਦਿਆਂ ਲਈ ਮੁਕਾਬਲਾ ਹੈ।
ਪੀ ਜੀ ਸਰਕਾਰੀ ਕਾਲਜ ਸੈਕਟਰ-11 ਵਿੱਚ ਕੁੱਲ 5,389 ਵੋਟਰ ਹਨ। ਇਨ੍ਹਾਂ ਵਿੱਚ 2,592 ਲੜਕੇ ਅਤੇ 2,797 ਲੜਕੀਆਂ ਹਨ। ਕਾਲਜ ਵਿੱਚ ਵੱਖ-ਵੱਖ ਪੈਨਲਾਂ ਦੇ ਉਮੀਦਵਾਰਾਂ ਵਿਚਾਲੇ ਮੁਕਾਬਲਾ ਹੋ ਰਿਹਾ ਹੈ।
ਸੈਕਟਰ-32 ਤੇ 26 ਵਿੱਚ ਵੀ ਮੁਕਾਬਲਾ; ਤਿੰਨ ਕਾਲਜਾਂ ਵਿੱਚ ਨਹੀਂ ਹੋ ਰਹੀ ਵੋਟਿੰਗ
ਜੀ ਜੀ ਡੀ ਐੱਸ ਡੀ (GGDSD) ਕਾਲਜ ਸੈਕਟਰ-32 ਵਿੱਚ ਸਭ ਤੋਂ ਵੱਧ 10,513 ਵੋਟਰ ਹਨ। ਇਨ੍ਹਾਂ ਵਿੱਚ 6,046 ਲੜਕੇ ਅਤੇ 4,467 ਲੜਕੀਆਂ ਹਨ। ਇੱਥੇ ਵੱਖ-ਵੱਖ ਗਠਜੋੜਾਂ ਦੇ ਪੈਨਲਾਂ ਵਿਚਾਲੇ ਮੁਕਾਬਲਾ ਹੈ ਅਤੇ ਪ੍ਰਧਾਨ ਦੇ ਅਹੁਦੇ ਲਈ ਆਜ਼ਾਦ ਉਮੀਦਵਾਰ ਵੀ ਮੈਦਾਨ ਵਿੱਚ ਹੈ।
ਗੁਰੂ ਗੋਬਿੰਦ ਸਿੰਘ ਕਾਲਜ ਸੈਕਟਰ-26 ਵਿੱਚ ਕੁੱਲ 5,147 ਵੋਟਰ ਹਨ, ਜਿਨ੍ਹਾਂ ਵਿੱਚ 4,052 ਲੜਕੇ ਅਤੇ 1,095 ਲੜਕੀਆਂ ਹਨ। ਇੱਥੇ ਮੁੱਖ ਮੁਕਾਬਲਾ ਦੋ ਪੈਨਲਾਂ ਵਿਚਾਲੇ ਹੈ ਅਤੇ ਪ੍ਰਧਾਨ ਦੇ ਅਹੁਦੇ ਲਈ ਆਜ਼ਾਦ ਉਮੀਦਵਾਰ ਵੀ ਚੋਣ ਲੜ ਰਿਹਾ ਹੈ।
ਪੀ ਜੀ ਸਰਕਾਰੀ ਕਾਲਜ ਫਾਰ ਗਰਲਜ਼ ਸੈਕਟਰ-11 ਵਿੱਚ ਵੀ ਵੱਖ-ਵੱਖ ਅਹੁਦਿਆਂ ਲਈ ਮੁਕਾਬਲਾ ਹੈ। ਉੱਥੇ ਹੀ ਦੇਵ ਸਮਾਜ ਕਾਲਜ ਸੈਕਟਰ-45 ਵਿੱਚ ਸਿਰਫ਼ ਵਾਈਸ ਪ੍ਰਧਾਨ ਅਤੇ ਜੁਆਇੰਟ ਸਕੱਤਰ ਦੇ ਅਹੁਦਿਆਂ ਲਈ ਚੋਣ ਹੋ ਰਹੀ ਹੈ।
ਇਸ ਤੋਂ ਇਲਾਵਾ ਪੀ ਜੀ ਸਰਕਾਰੀ ਕਾਲਜ ਸੈਕਟਰ-46 ਵਿੱਚ ਸਿਰਫ਼ ਸਕੱਤਰ ਦੇ ਅਹੁਦੇ ਲਈ ਵੋਟਿੰਗ ਹੋ ਰਹੀ ਹੈ। ਦੂਜੇ ਪਾਸੇ ਐੱਮ ਸੀ ਐੱਮ ਡੀ ਏ ਵੀ (MCM DAV) ਕਾਲਜ ਸੈਕਟਰ-36, ਗੁਰੂ ਗੋਬਿੰਦ ਸਿੰਘ ਕਾਲਜ ਫਾਰ ਵੂਮੈਨ ਸੈਕਟਰ-26 ਅਤੇ ਸਰਕਾਰੀ ਕਾਲਜ ਆਫ਼ ਕਾਮਰਸ ਐਂਡ ਬਿਜ਼ਨਸ ਐਡਮਿਨਿਸਟ੍ਰੇਸ਼ਨ ਸੈਕਟਰ-50 ਵਿੱਚ ਉਮੀਦਵਾਰ ਬਿਨਾਂ ਮੁਕਾਬਲੇ ਚੁਣੇ ਗਏ ਹਨ, ਇਸ ਲਈ ਇਨ੍ਹਾਂ ਕਾਲਜਾਂ ਵਿੱਚ ਵੋਟਿੰਗ ਨਹੀਂ ਹੋ ਰਹੀ।
