Nepal Flood Relief: ਰਾਜਪਾਲ ਵੱਲੋਂ ਭੇਜੇ ਗਏ ਰਾਹਤ ਸਮੱਗਰੀ ਦੇ ਟਰੱਕ, ‘ਪਾਸਿੰਗ ਦੇ ਚੱਕਰ’ ਕਾਰਨ ਚੰਡੀਗੜ੍ਹ ’ਚ ਹੀ ਫਸੇ
ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨੇ ਦਿਖਾਈ ਸੀ ਹਰੀ ਝੰਡੀ; ਯੂ.ਪੀ. ਦੇ ਨਿਯਮਾਂ ਅਤੇ RTO ਦੀ ਗੈਰ-ਹਾਜ਼ਰੀ ਕਾਰਨ ਰੁਕੀ ਖੇਪ
ਨੇਪਾਲ ਵਿੱਚ ਆਈ ਭਿਆਨਕ ਤਬਾਹੀ ਤੋਂ ਬਾਅਦ ਪੀੜਤਾਂ ਦੀ ਮਦਦ ਲਈ ਪੰਜਾਬ ਰੈੱਡ ਕਰਾਸ ਵੱਲੋਂ ਭੇਜੀ ਗਈ ਰਾਹਤ ਸਮੱਗਰੀ ਦੇ ਤਿੰਨ ਟਰੱਕ ਪ੍ਰਸ਼ਾਸਨਿਕ ਰੁਕਾਵਟਾਂ ਕਾਰਨ ਅਜੇ ਤੱਕ ਰਵਾਨਾ ਨਹੀਂ ਹੋ ਸਕੇ ਹਨ। ਮੰਗਲਵਾਰ ਨੂੰ ਪੰਜਾਬ ਦੇ ਰਾਜਪਾਲ ਅਤੇ ਪੰਜਾਬ ਰੈੱਡ ਕਰਾਸ ਦੇ ਪ੍ਰਧਾਨ ਗੁਲਾਬ ਚੰਦ ਕਟਾਰੀਆ ਵੱਲੋਂ ਪੰਜਾਬ ਰਾਜ ਭਵਨ ਤੋਂ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤੇ ਗਏ ਇਹ ਟਰੱਕ ਫਿਲਹਾਲ ਚੰਡੀਗੜ੍ਹ ਦੇ ਮਨੀਮਾਜਰਾ ਇਲਾਕੇ ’ਚ ਹੀ ਖੜ੍ਹੇ ਹਨ। ਟਰੱਕਾਂ ਦੇ ਅੱਗੇ ਨਾ ਵਧ ਸਕਣ ਦਾ ਮੁੱਖ ਕਾਰਨ ਇੱਕ ਟਰੱਕ ਦੀ ਪਾਸਿੰਗ (ਵਾਹਨ ਦੀ ਯੋਗਤਾ ਪ੍ਰਮਾਣ ਪੱਤਰ) ਨਾ ਹੋਣਾ ਦੱਸਿਆ ਜਾ ਰਹਾ ਹੈ। ਰਾਹਤ ਸਮੱਗਰੀ ਨਾਲ ਲੱਦੇ ਟਰੱਕ ਦੇ ਚਾਲਕ ਸੁਭਾਸ਼ ਨੇ ਦੱਸਿਆ ਕਿ ਉਸ ਦੇ ਵਾਹਨ ਦੀ ਪਾਸਿੰਗ ਨਾ ਹੋਣ ਕਰਕੇ ਉਹ ਅੱਗੇ ਜਾਣ ਤੋਂ ਅਸਮਰੱਥ ਹੈ। ਉਸ ਨੇ ਕਿਹਾ ਕਿ ਉੱਤਰ ਪ੍ਰਦੇਸ਼ ਵਿੱਚ ਵਾਹਨਾਂ ਦੀ ਜਾਂਚ ਦੇ ਨਿਯਮ ਬਹੁਤ ਸਖ਼ਤ ਹਨ ਅਤੇ ਬਿਨਾਂ ਪਾਸਿੰਗ ਤੋਂ ਚੱਲਣ ’ਤੇ ਭਾਰੀ ਚਲਾਨ ਹੋ ਸਕਦਾ ਹੈ।
ਚਾਲਕ ਮੁਤਾਬਕ ਚੰਡੀਗੜ੍ਹ ਵਿੱਚ ਆਰ.ਟੀ.ਓ. ਅਧਿਕਾਰੀ 20 ਤਾਰੀਖ ਤੋਂ ਗੈਰ-ਹਾਜ਼ਰ ਹਨ, ਜਿਸ ਕਾਰਨ ਪਾਸਿੰਗ ਦਾ ਕੰਮ ਲਮਕਿਆ ਹੋਇਆ ਹੈ। ਉਨ੍ਹਾਂ ਦੱਸਿਆ ਕਿ ਦੋ ਹੋਰ ਟਰੱਕ ਵੀ ਉਸ ਦੀ ਗੱਡੀ ਦੀ ਪਾਸਿੰਗ ਹੋਣ ਦਾ ਇੰਤਜ਼ਾਰ ਕਰ ਰਹੇ ਹਨ ਤਾਂ ਜੋ ਤਿੰਨੋਂ ਵਾਹਨ ਇਕੱਠੇ ਨੇਪਾਲ ਲਈ ਰਵਾਨਾ ਹੋ ਸਕਣ। ਇਸ ਪਹਿਲੀ ਖੇਪ ਵਿੱਚ 10 ਲੱਖ ਰੁਪਏ ਤੋਂ ਵੱਧ ਦੀ ਕੀਮਤ ਦੇ ਤਿਆਰ ਭੋਜਨ, ਰਾਸ਼ਨ, ਕੱਪੜੇ ਅਤੇ ਹੋਰ ਜਰੂਰੀ ਵਸਤੂਆਂ ਸ਼ਾਮਲ ਹਨ।
ਜ਼ਿਕਰਯੋਗ ਹੈ ਕਿ ਟਰੱਕਾਂ ਨੂੰ ਰਵਾਨਾ ਕਰਨ ਵੇਲੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨੇ ਨੇਪਾਲ ਨਾਲ ਹਮਦਰਦੀ ਪ੍ਰਗਟਾਉਂਦਿਆਂ ਕਿਹਾ ਸੀ ਕਿ ਪੰਜਾਬ ਦੇ ਲੋਕ ਇਸ ਔਖੀ ਘੜੀ ਵਿੱਚ ਨੇਪਾਲ ਦੇ ਨਾਲ ਖੜ੍ਹੇ ਹਨ। ਉਨ੍ਹਾਂ ਦੱਸਿਆ ਸੀ ਕਿ ਪੰਜਾਬ ਰੈੱਡ ਕਰਾਸ ਵੱਲੋਂ ਨੇਪਾਲ ਲਈ ਕੁੱਲ 80 ਲੱਖ ਤੋਂ 1 ਕਰੋੜ ਰੁਪਏ ਤੱਕ ਦੀ ਰਾਹਤ ਸਮੱਗਰੀ ਪੜਾਅਵਾਰ ਤਰੀਕੇ ਨਾਲ ਭੇਜਣ ਦੀ ਯੋਜਨਾ ਬਣਾਈ ਗਈ ਹੈ। ਪਰ ਪ੍ਰਸ਼ਾਸਨਿਕ ਲਾਪਰਵਾਹੀ ਕਾਰਨ ਪਹਿਲੀ ਹੀ ਖੇਪ ਰਸਤੇ ’ਚ ਅਟਕ ਗਈ ਹੈ।
