NEET-UG TOP 10 TOPPERS: ਜਾਣੋਂ ਕੌਣ ਹਨ ਪਹਿਲੇ 10 ਸਥਾਨ ਹਾਸਲ ਕਰਨ ਵਾਲੇ ਹੋਣਹਾਰ ਵਿਦਿਆਰਥੀ
ਨੈਸ਼ਨਲ ਟੈਸਟਿੰਗ ਏਜੰਸੀ (NTA) ਵੱਲੋਂ ਨੀਟ ਯੂਜੀ ਦੇ ਨਤੀਜੇ ਐਲਾਨੇ; ਦੇਸ਼ ਭਰ ਵਿੱਚੋਂ 11.21 ਲੱਖ ਤੋਂ ਵੱਧ ਪ੍ਰੀਖਿਆਰਥੀ ਹੋਏ ਸਫਲ, ਕੁੜੀਆਂ ਨੇ ਫਿਰ ਮਾਰੀ ਬਾਜੀ
NEET-UG TOP 10 TOPPERS: ਨੈਸ਼ਨਲ ਟੈਸਟਿੰਗ ਏਜੰਸੀ (NTA) ਵੱਲੋਂ ਅੱਜ ਦੇਸ਼ ਦੀ ਸਭ ਤੋਂ ਵੱਕਾਰੀ ਮੈਡੀਕਲ ਪ੍ਰਵੇਸ਼ ਪ੍ਰੀਖਿਆ 'ਨੀਟ ਯੂਜੀ 2026' (NEET UG 2026) ਦੇ ਨਤੀਜੇ ਐਲਾਨ ਦਿੱਤੇ ਗਏ ਹਨ। ਇਸ ਵਾਰ ਦੇ ਨਤੀਜਿਆਂ ਵਿੱਚ ਉੱਤਰੀ ਭਾਰਤ ਦਾ ਦਬਦਬਾ ਦੇਖਣ ਨੂੰ ਮਿਲਿਆ ਹੈ। ਪੰਜਾਬ ਦੇ ਆਰੀਅਨ ਗੁਪਤਾ ਅਤੇ ਹਰਿਆਣਾ ਦੇ ਪਾਂਸ਼ੁਲ ਬਾਂਸਲ ਨੇ 720 ਵਿੱਚੋਂ 715 ਅੰਕ ਪ੍ਰਾਪਤ ਕਰਕੇ ਸਾਂਝੇ ਤੌਰ 'ਤੇ ਆਲ ਇੰਡੀਆ ਰੈਂਕ (AIR) 1 ਹਾਸਲ ਕਰਦਿਆਂ ਸੂਬਿਆਂ ਦਾ ਨਾਂ ਪੂਰੇ ਦੇਸ਼ ਵਿੱਚ ਰੌਸ਼ਨ ਕੀਤਾ ਹੈ।
ਦੇਸ਼ ਦੇ ਟੌਪ 10 (Top 10) ਹੋਣਹਾਰਾਂ ਦੀ ਪੂਰੀ ਸੂਚੀ:
| ਏ.ਆਈ.ਆਰ. ਰੈਂਕ (AIR) | ਉਮੀਦਵਾਰ ਦਾ ਨਾਮ | ਪਰਸੈਂਟਾਈਲ (Percentile) % | ਰਾਜ (State) |
| 1 | ਆਰੀਅਨ ਗੁਪਤਾ | 99.9999 | ਪੰਜਾਬ |
| 2 | ਪਾਂਸ਼ੁਲ ਬਾਂਸਲ | 99.9999 | ਹਰਿਆਣਾ |
| 3 | ਉਪਲਕਸ਼ਯ ਗੋਇਲ | 99.99985 | ਰਾਜਸਥਾਨ |
| 4 | ਆਯੁਸ਼ ਭਲੋਟੀਆ | 99.99965 | ਬਿਹਾਰ |
| 5 | ਕੁਡਾਲੇ ਸ਼੍ਰਾਵਣੀ ਕ੍ਰਿਸ਼ਨਾ | 99.99965 | ਮਹਾਰਾਸ਼ਟਰ |
| 6 | ਰੀਆ ਰੰਜਨ | 99.99965 | ਬਿਹਾਰ |
| 7 | ਆਰੀਅਨ ਦੂਬੇ | 99.99965 | ਉੱਤਰ ਪ੍ਰਦੇਸ਼ |
| 8 | ਗੀਤਾਂਸ਼ ਸਰੀਨ | 99.99915 | ਪੰਜਾਬ |
| 9 | ਗੌਰਵ ਸਿੰਘ ਮੋਹਨੀਸ਼ | 99.99915 | ਰਾਜਸਥਾਨ |
| 10 | ਮਾਰੂਤੀ ਭੋਸਲੇ | 99.99915 | ਮਹਾਰਾਸ਼ਟਰ |
ਬਠਿੰਡਾ ਦੇ ਕ੍ਰਿਸ਼ ਗੁਪਤਾ ਨੇ ਦੇਸ਼ ਭਰ ਨੇ ਵੀ ਹਾਸਲ ਕੀਤਾ 15ਵਾਂ ਰੈਂਕ
ਨੀਟ-ਯੂਜੀ 2026 ਦੇ ਨਤੀਜਿਆਂ ਵਿੱਚ ਬਠਿੰਡਾ ਦੇ ਹੋਣਹਾਰ ਵਿਦਿਆਰਥੀ ਕ੍ਰਿਸ਼ ਗੁਪਤਾ ਨੇ ਦੇਸ਼ ਦੇ ਸਰਵੋਤਮ ਵਿਦਿਆਰਥੀਆਂ ਵਿੱਚ ਆਪਣੀ ਥਾਂ ਬਣਾਉਂਦਿਆਂ ਆਲ ਇੰਡੀਆ ਰੈਂਕ 15 ਹਾਸਲ ਕੀਤਾ ਹੈ। 720 ਵਿੱਚੋਂ 705 ਅੰਕ ਪ੍ਰਾਪਤ ਕਰਨ ਵਾਲੇ ਕ੍ਰਿਸ਼ ਨੇ ਜਨਰਲ ਵਰਗ ਵਿੱਚ ਪੰਜਾਬ ਵਿੱਚ ਤੀਜਾ ਸਥਾਨ ਵੀ ਆਪਣੇ ਨਾਮ ਕੀਤਾ ਹੈ। ਕਾਰੋਬਾਰੀ ਪਿਤਾ ਅਮਿਤ ਗਰਗ ਅਤੇ ਮਾਤਾ ਰੀਨਾ ਰਾਣੀ ਦੇ ਪੁੱਤਰ ਕ੍ਰਿਸ਼ ਨੇ ਆਪਣੀ ਇਸ ਕਾਮਯਾਬੀ ਦਾ ਸਿਹਰਾ ਆਪਣੇ ਮਾਤਾ-ਪਿਤਾ ਨੂੰ ਦਿੱਤਾ ਹੈ ਅਤੇ ਕਿਹਾ ਕਿ ਉਸ ਦਾ ਸੁਪਨਾ ਇੱਕ ਕਾਬਲ ਡਾਕਟਰ ਬਣ ਕੇ ਸਮਾਜ ਦੀ ਸੇਵਾ ਕਰਨਾ ਹੈ। -ਮਨੋਜ ਟ੍ਰਿਬਿਊਨ
20 ਲੱਖ ਵਿਦਿਆਰਥੀਆਂ ਨੇ ਦਿੱਤੀ ਸੀ ਪ੍ਰੀਖਿਆ
ਇਸ ਸਾਲ ਦੀ ਪ੍ਰੀਖਿਆ ਵਿੱਚ ਦੇਸ਼ ਭਰ ਵਿੱਚੋਂ ਲਗਭਗ 20 ਲੱਖ ਉਮੀਦਵਾਰਾਂ ਨੇ ਹਿੱਸਾ ਲਿਆ ਸੀ, ਜਿਨ੍ਹਾਂ ਵਿੱਚੋਂ 11.21 ਲੱਖ ਪ੍ਰੀਖਿਆਰਥੀਆਂ ਨੇ MBBS, BDS, AYUSH ਅਤੇ ਹੋਰ ਅੰਡਰਗ੍ਰੈਜੂਏਟ ਮੈਡੀਕਲ ਕੋਰਸਾਂ ਵਿੱਚ ਦਾਖਲੇ ਲਈ ਕੁਆਲੀਫਾਈ ਕੀਤਾ ਹੈ। ਐਨ.ਟੀ.ਏ. (NTA) ਵੱਲੋਂ ਸਾਂਝੀ ਕੀਤੀ ਗਈ ਜਾਣਕਾਰੀ ਅਨੁਸਾਰ ਇਸ ਵਾਰ ਮੁਕਾਬਲਾ ਕਾਫੀ ਸਖ਼ਤ ਰਿਹਾ, ਜਿਸ ਵਿੱਚ 138 ਉਮੀਦਵਾਰਾਂ ਨੇ 690 ਤੋਂ ਵੱਧ ਅੰਕ ਹਾਸਲ ਕੀਤੇ, ਜਦੋਂ ਕਿ 19 ਹੋਣਹਾਰ ਵਿਦਿਆਰਥੀਆਂ ਨੇ 700 ਅੰਕਾਂ ਦੀ ਹੱਦ ਨੂੰ ਪਾਰ ਕੀਤਾ। ਇਸ ਤੋਂ ਇਲਾਵਾ, ਕੁਆਲੀਫਾਈ ਕਰਨ ਵਾਲੇ ਕੁੱਲ ਉਮੀਦਵਾਰਾਂ ਵਿੱਚੋਂ 58% ਤੋਂ ਵੱਧ ਔਰਤਾਂ (ਕੁੜੀਆਂ) ਹਨ, ਜੋ ਮੈਡੀਕਲ ਖੇਤਰ ਵਿੱਚ ਉਨ੍ਹਾਂ ਦੀ ਮਜ਼ਬੂਤ ਭਾਗੀਦਾਰੀ ਅਤੇ ਸ਼ਾਨਦਾਰ ਪ੍ਰਦਰਸ਼ਨ ਨੂੰ ਦਰਸਾਉਂਦੀਆਂ ਹਨ।
ਸ਼੍ਰੇਣੀਵਾਲ ਅੰਕੜਿਆਂ ’ਤੇ ਇੱਕ ਝਾਤ
ਜੇਕਰ ਸ਼੍ਰੇਣੀਵਾਰ (Category-wise) ਅੰਕੜਿਆਂ ਦੀ ਗੱਲ ਕਰੀਏ ਤਾਂ ਇਸ ਵਾਰ ਕੁੱਲ 11,21,185 ਉਮੀਦਵਾਰ ਸਫਲ ਰਹੇ ਹਨ। ਇਨ੍ਹਾਂ ਵਿੱਚੋਂ ਸਭ ਤੋਂ ਵੱਧ 5.12 ਲੱਖ ਉਮੀਦਵਾਰ ਓ.ਬੀ.ਸੀ.-ਐਨ.ਸੀ.ਐਲ. (OBC-NCL) ਸ਼੍ਰੇਣੀ ਨਾਲ ਸਬੰਧਤ ਹਨ। ਇਸ ਤੋਂ ਬਾਅਦ ਜਨਰਲ ਸ਼੍ਰੇਣੀ ਦੇ 2.91 ਲੱਖ, ਐਸ.ਸੀ. (SC) ਸ਼੍ਰੇਣੀ ਦੇ 1.59 ਲੱਖ, ਜਨਰਲ-ਈ.ਡਬਲਯੂ.ਐਸ. (Gen-EWS) ਦੇ 95,026, ਐਸ.ਟੀ. (ST) ਸ਼੍ਰੇਣੀ ਦੇ 63,716 ਅਤੇ ਪੀ.ਡਬਲਯੂ.ਬੀ.ਡੀ. (PwBD) ਸ਼੍ਰੇਣੀ ਦੇ 3,666 ਉਮੀਦਵਾਰਾਂ ਨੇ ਪ੍ਰੀਖਿਆ ਪਾਸ ਕੀਤੀ ਹੈ। ਵੱਖ-ਵੱਖ ਸ਼੍ਰੇਣੀਆਂ ਲਈ ਕੁਆਲੀਫਾਇੰਗ ਕੱਟ-ਆਫ ਵੀ ਵੱਖੋ-ਵੱਖਰੀ ਰਹੀ, ਜਿਸ ਵਿੱਚ ਜਨਰਲ ਸ਼੍ਰੇਣੀ ਦੀ ਕੱਟ-ਆਫ 715 ਤੋਂ 213 ਅੰਕਾਂ ਦੇ ਵਿਚਕਾਰ ਦਰਜ ਕੀਤੀ ਗਈ ਹੈ।
