Chandigarh ਦੇ ਸੈਕਟਰ 22 ’ਚ ਬਾਂਦਰਾਂ ਦਾ ਆਤੰਕ; ਮਹਿਲਾ ਨੂੰ ਕੱਟਿਆ, ਬੱਚਿਆਂ-ਬਜ਼ੁਰਗਾਂ ਦਾ ਘਰੋਂ ਨਿਕਲਣਾ

Chandigarh News: ਚੰਡੀਗੜ੍ਹ ਦੇ ਸੈਕਟਰ-22 ਵਿੱਚ ਇਨ੍ਹੀਂ ਦਿਨੀਂ ਲੋਕ ਬਾਂਦਰਾਂ ਦੇ ਆਤੰਕ ਤੋਂ ਪਰੇਸ਼ਾਨ ਹਨ। ਸਥਾਨਕ ਲੋਕਾਂ ਮੁਤਾਬਕ ਇਲਾਕੇ ਵਿੱਚ ਬਾਂਦਰਾਂ ਦੇ ਝੁੰਡ ਲਗਾਤਾਰ ਘੁੰਮ ਰਹੇ ਹਨ ਅਤੇ ਹੁਣ ਤੱਕ ਚਾਰ ਲੋਕਾਂ ਨੂੰ ਕੱਟ ਚੁੱਕੇ ਹਨ। ਬਾਂਦਰਾਂ ਦੇ ਹਮਲਿਆਂ ਕਾਰਨ ਖਾਸ ਕਰਕੇ ਬੱਚਿਆਂ ਨੂੰ ਘਰੋਂ ਬਾਹਰ ਭੇਜਣ ਵਿੱਚ ਲੋਕ ਡਰ ਰਹੇ ਹਨ।

ਜ਼ਿਕਰਯੋਗ ਹੈ ਕਿ ਦੋ ਦਿਨ ਪਹਿਲਾਂ 8 ਸਤੰਬਰ ਨੂੰ ਸੈਕਟਰ-22 ਬੀ ਵਿੱਚ ਰਹਿਣ ਵਾਲੀ ਸਿਮਰਨਜੋਤ ਕੌਰ ’ਤੇ ਬਾਂਦਰਾਂ ਨੇ ਹਮਲਾ ਕਰ ਦਿੱਤਾ। ਬਾਂਦਰ ਦੇ ਕੱਟਣ ਨਾਲ ਉਨ੍ਹਾਂ ਦੀ ਲੱਤ ’ਤੇ ਤਿੰਨ ਥਾਂ ਜ਼ਖ਼ਮ ਹੋ ਗਏ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਇਲਾਜ ਲਈ ਟੀਕੇ ਲਗਵਾਉਣ ਪਏ।

ਸਥਾਨਕ ਲੋਕ ਬਾਂਦਰਾਂ ਨੂੰ ਘਰਾਂ ਅਤੇ ਛੱਤਾਂ ਤੋਂ ਦੂਰ ਰੱਖਣ ਲਈ ਤਰ੍ਹਾਂ-ਤਰ੍ਹਾਂ ਦੇ ਉਪਾਅ ਕਰ ਰਹੇ ਹਨ। ਕਈ ਲੋਕਾਂ ਨੇ ਆਪਣੀਆਂ ਛੱਤਾਂ ਉੱਤੇ ਲੰਗੂਰ ਦੀਆਂ ਤਸਵੀਰਾਂ ਲਗਾ ਰੱਖੀਆਂ ਹਨ, ਤਾਂ ਜੋ ਬੰਦਰ ਉਨ੍ਹਾਂ ਨੂੰ ਦੇਖ ਕੇ ਉੱਥੋਂ ਭੱਜ ਜਾਣ। ਹਾਲਾਂਕਿ, ਲੋਕਾਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਉਪਾਵਾਂ ਨਾਲ ਸਥਾਈ ਹੱਲ ਨਹੀਂ ਮਿਲ ਰਿਹਾ ਅਤੇ ਬਾਂਦਰਾਂ ਦੇ ਝੁੰਡ ਫਿਰ ਇਲਾਕੇ ਵਿੱਚ ਪਹੁੰਚ ਜਾਂਦੇ ਹਨ। ਲੋਕਾਂ ਨੇ ਨਗਰ ਨਿਗਮ ਤੋਂ ਜਲਦੀ ਕਾਰਵਾਈ ਕਰਕੇ ਬਾਂਦਰਾਂ ਦੇ ਆਤੰਕ ਤੋਂ ਛੁਟਕਾਰਾ ਦਿਵਾਉਣ ਦੀ ਮੰਗ ਕੀਤੀ ਹੈ।