Mohali Sirhind highway: ਮੁਹਾਲੀ-ਸਰਹਿੰਦ ਕੌਮੀ ਮਾਰਗ ਦੀ ਉਸਾਰੀ ਮੁਕੰਮਲ

ਜਾਣਕਾਰੀ ਅਨੁਸਾਰ ਦੋ ਫੇਜ਼ਾਂ ’ਚ ਉਸਰਨ ਵਾਲਾ ਇਹ ਮਾਰਗ ਮੁਹਾਲੀ ਤੋਂ ਸ਼ਹਿਣਾ (ਬਰਨਾਲਾ) ਤੱਕ ਜਾਣਾ ਹੈ ਜਿਸ ਨਾਲ ਮਾਨਸਾ ਤੇ ਬਠਿੰਡਾ ਖੇਤਰਾਂ ਦਾ ਸਿੱਧਾ ਸੰਪਰਕ ਮੁਹਾਲੀ ਨਾਲ ਜੁੜੇਗਾ। ਪਹਿਲੇ ਫੇਜ਼ ਅਧੀਨ ਮੁਹਾਲੀ-ਸਰਹਿੰਦ ਛੇ ਮਾਰਗੀ ਸੜਕ ਦਾ ਕੰਮ ਮੁਕੰਮਲ ਹੋ ‌ਗਿਆ ਹੈ। ਇਹ ਮਾਰਗ ਸਰਹਿੰਦ ਤੋਂ ਰਾਜਪੁਰਾ-ਅੰਬਾਲਾ ਨੂੰ ਜਾ ਰਹੇ ਕੌਮੀ ਮਾਰਗ ਨਾਲ ਜੁੜਦਾ ਹੈ।

ਇਸ ਮਾਰਗ ਦਾ ਨਿਰਮਾਣ ਤਿੰਨ ਵਰ੍ਹੇ ਪਹਿਲਾਂ ਆਰੰਭ ਹੋਇਆ ਸੀ ਅਤੇ ਵੀ ਸੀ ਐੱਲ ਕੰਸਟਰੱਕਸ਼ਨ ਕੰਪਨੀ ਵੱਲੋਂ ਉਸਾਰੀ ਮੁਕੰਮਲ ਕੀਤੀ ਜਾ ਚੁੱਕੀ ਹੈ। ਕੰਪਨੀ ਦੇ ਮੈਨੇਜਰ ਨਾਗਾ ਅਰਜੁਨ ਨੇ ਦੱਸਿਆ ਕਿ ਸੜਕ ਦੀ ਟੈਸਟਿੰਗ ਹੋ ਚੁੱਕੀ ਹੈ। ਲਾਈਟਾਂ ਲਈ ਇੱਕ-ਦੋ ਦਿਨਾਂ ’ਚ ਬਿਜਲੀ ਕੁਨੈਕਸ਼ਨ ਵੀ ਮਿਲ ਜਾਵੇਗਾ। ਸੜਕ ’ਤੇ ਮੱਛਲੀ ਕਲਾਂ ਨੇੜੇ ਟੌਲ ਪਲਾਜ਼ਾ ਸਥਾਪਤ ਕੀਤਾ ਗਿਆ ਹੈ ਜਦੋਂ ਕਿ ਸਰਵਿਸ ਰੋਡਾਂ ’ਤੇ ਵੀ ਦੋ ਥਾਵਾਂ ਉਪਰ ਟੌਲ ਲਗਾਏ ਗਏ ਹਨ ਜੋ ਕੋਰੀਡੋਰ ਤੋਂ ਉਤਰਨ ਵਾਲੇ ਵਾਹਨਾਂ ਲਈ ਹੋਣਗੇ।

ਇਸ ਮਾਰਗ ਉੱਤੇ ਚਾਰ ਵੱਡੇ ਪੁਲ, ਦੋ ਫਲਾਈਓਵਰ, 18 ਅੰਡਰ ਪਾਸ, ਰੇਲਵੇ ਲਾਈਨਾਂ ’ਤੇ ਦੋ ਪੁਲ ਬਣਾਉਣ ਤੋਂ ਇਲਾਵਾ 23 ਕਿਲੋਮੀਟਰ ਦੇ ਕਰੀਬ ਸਰਵਿਸ/ਸਲਿੱਪ ਰੋਡ ਵੀ ਬਣਾਈ ਗਈ ਹੈ। ਮੁਹਾਲੀ ਤੋਂ ਇਲਾਵਾ ਝੰਜੇੜੀ, ਹੰਸਾਲੀ ਸਾਹਿਬ, ਦੌਲਤਪੁਰ ਆਦਿ ਤੋਂ ਵੀ ਇਸ ਮਾਰਗ ’ਤੇ ਚੜ੍ਹਿਆ-ਉਤਰਿਆ ਜਾ ਸਕੇਗਾ।

ਮੁਹਾਲੀ ਦੇ ਅੰਦਰੂਨੀ ਹਿੱਸੇ ਦਾ ਕੰਮ ਸ਼ੁਰੂ ਨਹੀਂ ਹੋਇਆ

ਕੌਮੀ ਮਾਰਗ ਨੇ ਮੁਹਾਲੀ ਦੇ ਸੈਕਟਰ 106-107 ਨੂੰ ਹੋ ਕੇ ਅੰਦਰੂਨੀ ਸੈਕਟਰਾਂ ਨਾਲ ਜੁੜਨਾ ਹੈ। ਗਮਾਡਾ ਵੱਲੋਂ ਕੁੱਝ ਮਹੀਨੇ ਪਹਿਲਾਂ ਸਬੰਧਤ ਮਾਰਗ ਨਾਲ ਜੁੜਨ ਵਾਲੀ ਡੇਢ-ਦੋ ਕਿਲੋਮੀਟਰ ਦੇ ਕਰੀਬ ਬਣਨ ਵਾਲੀ ਸੜਕ ਲਈ ਭਾਗੋਮਾਜਰਾ ਅਤੇ ਮਾਣਕਮਾਜਰਾ ਦੀ ਜ਼ਮੀਨ ਐਕੁਆਇਰ ਕਰ ਲਈ ਸੀ ਪਰ ਹਾਲੇ ਤੱਕ ਸੜਕ ਦੀ ਉਸਾਰੀ ਆਰੰਭ ਨਹੀਂ ਹੋਈ ਹੈ।

ਪੰਜਾਬੀ ਸ਼ਬਦ ਜੋੜਾਂ ਦੀਆਂ ਗ਼ਲਤੀਆਂ

ਮਾਰਗ ’ਚ ਸਰਹਿੰਦ ਨੇੜੇ ਜਾ ਕੇ ਲਾਏ ਸਾਈਨ ਬੋਰਡਾਂ ਵਿਚ ਪੰਜਾਬੀ ਸ਼ਬਦਾਵਲੀ ਦੀਆਂ ਗ਼ਲਤੀਆਂ ਮੌਜੂਦ ਹਨ। ਸੜਕ ਉਪਰ ਤਿੰਨ ਥਾਵਾਂ ’ਤੇ ਲਗਾਏ ਗਏ ਬੋਰਡਾਂ ਉੱਤੇ ਪੰਜਾਬੀ ’ਚ ਅੰਬਾਲਾ ਦੀ ਅਮਬਾਲਾ ਲਿਖਿਆ ਹੋਇਆ ਹੈ। ਕਿਸਾਨ ਆਗੂ ਬਲਜਿੰਦਰ ਸਿੰਘ ਭਾਗੋਮਾਜਰਾ ਨੇ ਬੋਰਡਾਂ ਉੱਤੇ ਪੰਜਾਬੀ ਨਾਵਾਂ ’ਚ ਗ਼ਲਤੀਆਂ ਤੁਰੰਤ ਠੀਕ ਕਰਨ ਦੀ ਮੰਗ ਕੀਤੀ ਹੈ।