ਮੋਹਾਲੀ: ਗੋਦਾਮ ਵਿੱਚ ਲੱਗੀ ਭਿਆਨਕ ਅੱਗ: ਡੇਢ ਕਰੋੜ ਦਾ ਸਾਮਾਨ ਸੜ ਕੇ ਸੁਆਹ !

ਮੋਹਾਲੀ ਦੇ ਇੰਡਸਟਰੀਅਲ ਏਰੀਆ ਫੇਜ਼-8ਬੀ ਵਿੱਚ ਇੱਕ ਗੋਦਾਮ ਨੂੰ ਅੱਗ ਲੱਗ ਗਈ। ਇਹ ਅੱਗ ਸਾਬਣ, ਸਰਫ਼ ਅਤੇ ਬਿਸਕੁਟਾਂ ਦਾ ਸਟਾਕ ਰੱਖਣ ਵਾਲੇ ਗੋਦਾਮ ਵਿੱਚ ਲੱਗੀ, ਜਿਸ ਵਿੱਚ ਡੇਢ ਕਰੋੜ ਰੁਪਏ ਦਾ ਸਾਮਾਨ ਸੜ ਕੇ ਸੁਆਹ ਹੋ ਗਿਆ। ਅੱਗ ਬੁਝਾਉਣ ਲਈ ਕਰੀਬ 30 ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਮੌਕੇ ’ਤੇ ਪਹੁੰਚੀਆਂ ਅਤੇ ਘੰਟਿਆਂ ਦੀ ਮੁਸ਼ੱਕਤ ਤੋਂ ਬਾਅਦ ਅੱਗ ’ਤੇ ਕਾਬੂ ਪਾਇਆ ਗਿਆ। ਹਾਲਾਂਕਿ, ਗੋਦਾਮ ਵਿੱਚੋਂ ਅਜੇ ਵੀ ਧੂੰਆਂ ਉੱਠ ਰਿਹਾ ਹੈ।

ਜਾਣਕਾਰੀ ਮੁਤਾਬਕ ਸ਼ੁੱਕਰਵਾਰ ਸ਼ਾਮ 7 ਵਜੇ ਤੋਂ ਬਾਅਦ ਗੋਦਾਮ ਵਿੱਚ ਅੱਗ ਲੱਗੀ ਸੀ। ਜਿਸ ਦੀ ਸੂਚਨਾ ਮਿਲਣ ’ਤੇ ਫਾਇਰ ਬ੍ਰਿਗੇਡ ਦੀ ਟੀਮ ਰਾਤ ਕਰੀਬ 2 ਵਜੇ ਅੱਗ ਬੁਝਾ ਕੇ ਵਾਪਸ ਚਲੀ ਗਈ। ਪਰ ਅੱਜ ਸਵੇਰੇ 5 ਵਜੇ ਗੋਦਾਮ ਵਿੱਚ ਅੱਗ ਫਿਰ ਭੜਕ ਗਈ। ਦੁਬਾਰਾ ਫਾਇਰ ਬ੍ਰਿਗੇਡ ਨੂੰ ਸੂਚਿਤ ਕੀਤਾ ਗਿਆ, ਜਿਸ ਤੋਂ ਬਾਅਦ ਕਈ ਗੱਡੀਆਂ ਫਿਰ ਤੋਂ ਅੱਗ ’ਤੇ ਕਾਬੂ ਪਾਉਣ ਲਈ ਪਹੁੰਚੀਆਂ।

ਫਾਇਰ ਟੀਮ ਦੀ ਸ਼ੁਰੂਆਤੀ ਜਾਂਚ ਵਿੱਚ ਪਤਾ ਲੱਗਾ ਕਿ ਗੋਦਾਮ ਦੇ ਅੰਦਰ ਪਏ ਗੱਤੇ ਵਿੱਚ ਅੱਗ ਸੁਲਗਦੀ ਰਹੀ, ਜਿਸ ਕਾਰਨ ਰਾਤ ਨੂੰ ਬੁਝਾਉਣ ਤੋਂ ਬਾਅਦ ਵੀ ਅੱਗ ਦੁਬਾਰਾ ਭੜਕ ਉੱਠੀ। ਲਗਾਤਾਰ ਧੂੰਆਂ ਉੱਠਣ ਦਾ ਕਾਰਨ ਵੀ ਇਹੀ ਸੀ। ਅੰਦਰ ਰੱਖਿਆ ਸਾਰਾ ਸਾਮਾਨ ਸੜ ਕੇ ਪੂਰੀ ਤਰ੍ਹਾਂ ਨਸ਼ਟ ਹੋ ਚੁੱਕਾ ਹੈ। ਗੋਦਾਮ ਦੇ ਬਾਹਰ ਅਜੇ ਵੀ ਧੂੰਆਂ ਉੱਠ ਰਿਹਾ ਹੈ, ਜਿਸ ਨੂੰ ਖਤਮ ਹੋਣ ਵਿੱਚ ਕੁਝ ਸਮਾਂ ਲੱਗੇਗਾ।