ਸਰਬਜੀਤ ਸਿੰਘ ਭੱਟੀ
ਲਾਲੜੂ, 27 ਅਕਤੂਬਰ
ਸਰਕਾਰੀ ਸੀਨੀਅਰ ਸੈਕੰਡਰੀ ਸਮਾਰਟ ਸਕੂਲ ਲਾਲੜੂ ਅੰਬਾਲਾ-ਚੰਡੀਗੜ੍ਹ ਮੁੱਖ ਮਾਰਗ ’ਤੇ ਸਥਿਤ ਹੋਣ ਕਾਰਨ ਹਜ਼ਾਰਾਂ ਬੱਚੇ ਹਰ ਰੋਜ਼ ਜਾਨ ਤਲੀ ’ਤੇ ਰੱਖ ਕੇ ਛੇ ਮਾਰਗੀ ਮੁੱਖ ਮਾਰਗ ਪਾਰ ਕਰ ਕੇ ਪੜ੍ਹਨ ਲਈ ਆਉਂਦੇ ਹਨ। ਇਲਾਕਾ ਵਾਸੀਆਂ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਕਿ ਸਕੂਲ ਦੇ ਸਾਹਮਣੇ ਬੱਚਿਆਂ ਦੇ ਆਉਣ-ਜਾਣ ਲਈ ਅੰਡਰ ਜਾਂ ਓਵਰਬ੍ਰਿਜ ਬਣਾਇਆ ਜਾਵੇ।
ਜਾਣਕਾਰੀ ਮੁਤਾਬਿਕ ਉਕਤ ਸਕੂਲ ਵਿੱਚ ਲਗਭਗ 2000 ਬੱਚੇ ਹਰ ਰੋਜ਼ ਪੜ੍ਹਨ ਲਈ ਛੇ ਮਾਰਗੀ ਸੜਕ ਨੂੰ ਪਾਰ ਕਰ ਕੇ ਜਾਂਦੇ ਹਨ। ਮੁੱਖ ਮਾਰਗ ਦੀ ਤੇਜ਼ ਰਫ਼ਤਾਰ ਤੇ ਟਰੈਫਿਕ ਕਾਰਨ ਹਰ ਵੇਲੇ ਖ਼ਤਰਾ ਬਣਿਆ ਰਹਿੰਦਾ ਹੈ। ਹਰਿਆਣਾ ਰੋਡਵੇਜ਼ ਦੀਆਂ ਤੇਜ਼ ਰਫ਼ਤਾਰ ਬੱਸਾਂ ਕਾਰਨ ਪਹਿਲਾਂ ਵੀ ਸੜਕ ਪਾਰ ਕਰਦੇ ਸਮੇਂ ਕਈ ਹਾਦਸੇ ਵਾਪਰ ਚੁੱਕੇ ਹਨ, ਪਰ ਸਰਕਾਰ ਅਤੇ ਪ੍ਰਸ਼ਾਸਨ ਕੋਈ ਸਬਕ ਨਹੀਂ ਲੈ ਰਿਹਾ। ਇਲਾਕਾ ਵਾਸੀ ਮਜਬੂਰੀਵੱਸ ਆਪਣੇ ਬੱਚਿਆ ਨੂੰ ਹਰ ਰੋਜ਼ ਖਤਰੇ ਵਿੱਚ ਪਾ ਕੇ ਸਕੂਲ ਭੇਜ ਰਹੇ ਹਨ। ਸਮਾਜ ਸੇਵੀ ਆਗੂ ਗੁਰਨਾਮ ਸਿੰਘ ਮਹਿਰਾ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਕਿ ਸਰਕਾਰੀ ਸਕੂਲ ਦੇ ਸਾਹਮਣੇ ਅੰਡਰਬ੍ਰਿਜ ਜਾਂ ਲੋਹੇ ਦੀਆਂ ਪੌੜੀਆਂ ਵਾਲਾ ਪੁਲ ਬਣਾਇਆ ਜਾਵੇ। ਉਨ੍ਹਾਂ ਕਿਹਾ ਕਿ ਸਕੂਲ ਤੋਂ ਕਾਫੀ ਦੂਰ ਆਈਟੀਆਈ ਚੌਕ ਅਤੇ ਮੁੱਖ ਬਾਜ਼ਾਰ ਨੇੜੇ ਸੜਕ ਪਾਰ ਕਰਨ ਲਈ ਲਾਂਘਾ ਬਣਿਆ ਹੈ, ਜੋ ਦੂਰ ਹੋਣ ਕਾਰਨ ਬੱਚਿਆਂ ਦੀ ਪਹੁੰਚ ਤੋਂ ਪਰੇ ਹੈ।