Kotak Mahindra Bank Scam: ਡਿਪਟੀ ਵੀਪੀ ਨੇ ਖਰੀਦੀ ਸੀ BMW; ਫਰਾਡ ਸਾਹਮਣੇ ਆਉਣ ਤੋਂ ਪਹਿਲਾਂ ਵੇਚੀਆਂ ਲਗਜ਼ਰੀ ਗੱਡੀਆਂ: ED

ਪੰਚਕੂਲਾ ਦੀ ਇੱਕ ਵਿਸ਼ੇਸ਼ ਅਦਾਲਤ ਵਿੱਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ED) ਨੇ ਵੱਡਾ ਖੁਲਾਸਾ ਕੀਤਾ ਹੈ। ED ਮੁਤਾਬਕ 150 ਕਰੋੜ ਰੁਪਏ ਦੇ ਕੋਟਕ ਮਹਿੰਦਰਾ ਬੈਂਕ ਘੁਟਾਲੇ ਦੇ ਮੁੱਖ ਮੁਲਜ਼ਮ ਅਤੇ ਬੈਂਕ ਦੇ ਡਿਪਟੀ ਵਾਈਸ ਪ੍ਰੈਜ਼ੀਡੈਂਟ ਪੁਸ਼ਪਿੰਦਰ ਸਿੰਘ ਨੇ ਨਗਰ ਨਿਗਮ (MC) ਪੰਚਕੂਲਾ ਦੇ ਖਾਤਿਆਂ ਵਿੱਚੋਂ ਕਰੋੜਾਂ ਰੁਪਏ ਚੋਰੀ (Siphon) ਕੀਤੇ ਸਨ। ਇਸ ਪੈਸੇ ਨਾਲ ਉਸ ਨੇ ਇੱਕ BMW 7 ਸੀਰੀਜ਼ ਗੱਡੀ, ਮਹਿੰਦਰਾ ਥਾਰ, ਮਹਿੰਦਰਾ ਸਕਾਰਪੀਓ-ਐੱਨ ਅਤੇ ਇੱਕ ਮੋਟਰਸਾਈਕਲ ਖਰੀਦਿਆ ਅਤੇ ਨਾਲ ਹੀ ਕਈ ਜਾਇਦਾਦਾਂ (Immovable properties) ਵਿੱਚ ਵੱਡਾ ਨਿਵੇਸ਼ ਕੀਤਾ। ਏਜੰਸੀ ਨੇ ਦੱਸਿਆ ਕਿ ਮਾਰਚ 2026 ਵਿੱਚ ਘੁਟਾਲਾ ਸਾਹਮਣੇ ਆਉਣ ਤੋਂ ਠੀਕ ਪਹਿਲਾਂ ਇਹ ਸਾਰੀਆਂ ਗੱਡੀਆਂ ਅਤੇ ਜਾਇਦਾਦਾਂ ਵੇਚ ਦਿੱਤੀਆਂ ਗਈਆਂ ਸਨ।

ਹਰਿਆਣਾ ਦੇ ਸਟੇਟ ਵਿਜੀਲੈਂਸ ਐਂਡ ਐਂਟੀ-ਕਰਪਸ਼ਨ ਬਿਊਰੋ (SV&ACB) ਨੇ 24 ਮਾਰਚ 2026 ਨੂੰ ਇਸ ਮਾਮਲੇ ਵਿੱਚ FIR ਦਰਜ ਕੀਤੀ ਸੀ, ਜਿਸ ਦੇ ਆਧਾਰ 'ਤੇ ED ਹੁਣ ਜਾਂਚ ਕਰ ਰਹੀ ਹੈ। ਜਦੋਂ ਇਹ ਘੁਟਾਲਾ ਹੋਇਆ, ਪੁਸ਼ਪਿੰਦਰ ਸਿੰਘ ਪੰਚਕੂਲਾ ਬ੍ਰਾਂਚ ਦਾ ਮੈਨੇਜਰ ਸੀ।

ED ਦੀ ਜਾਂਚ ਵਿੱਚ ਹੋਏ ਖੁਲਾਸੇED ਨੇ ਅਦਾਲਤ ਨੂੰ ਦੱਸਿਆ ਕਿ ਪੰਚਕੂਲਾ ਨਗਰ ਨਿਗਮ ਦੇ ਦੋ ਬੈਂਕ ਖਾਤੇ ਫਰਜ਼ੀ ਦਸਤਾਵੇਜ਼ਾਂ ਦੇ ਸਹਾਰੇ ਖੋਲ੍ਹੇ ਅਤੇ ਚਲਾਏ ਜਾ ਰਹੇ ਸੀ। ਇਹਨਾਂ ਖਾਤਿਆਂ ਵਿੱਚੋਂ ਕਰੋੜਾਂ ਰੁਪਏ ਦੂਜੇ ਸਾਥੀ ਮੁਲਜ਼ਮਾਂ ਦੇ ਖਾਤਿਆਂ ਵਿੱਚ ਟਰਾਂਸਫਰ ਕੀਤੇ ਗਏ:

ਰਜਤ ਡਾਹਰਾ: 88.17 ਕਰੋੜ ਰੁਪਏ

ਸਵਾਤੀ ਤੋਮਰ: 31.58 ਕਰੋੜ ਰੁਪਏ

ਕਪਿਲ ਕੁਮਾਰ: 2.36 ਕਰੋੜ ਰੁਪਏ

ਵਿਨੋਦ ਕੁਮਾਰ: 1.41 ਕਰੋੜ ਰੁਪਏ

ਸਹਿ-ਮੁਲਜ਼ਮ ਕਪਿਲ ਕੁਮਾਰ ਅਤੇ ਸਵਾਤੀ ਤੋਮਰ ਨੇ ED ਨੂੰ ਦੱਸਿਆ ਕਿ ਰਜਤ ਡਾਹਰਾ ਨੇ ਉਹਨਾਂ ਨੂੰ ਚੰਗੀ ਨੌਕਰੀ ਅਤੇ ਕੰਮ ਦਾ ਝਾਂਸਾ ਦੇ ਕੇ ਬੈਂਕ ਖਾਤੇ ਖੁਲ੍ਹਵਾਏ ਸਨ। ਪੁਸ਼ਪਿੰਦਰ ਸਿੰਘ ਅਤੇ ਉਸ ਦੀ ਪਤਨੀ ਪ੍ਰੀਤੀ ਠਾਕੁਰ ਦੇ ਪ੍ਰਭਾਵ ਹੇਠ, ਉਹਨਾਂ ਤੋਂ 10-12 ਖਾਲੀ ਚੈੱਕਾਂ 'ਤੇ ਦਸਤਖਤ, ਏਟੀਐਮ ਕਾਰਡ ਅਤੇ ਸਿਮ ਕਾਰਡ ਲੈ ਕੇ ਰਜਤ ਡਾਹਰਾ ਨੂੰ ਸੌਂਪ ਦਿੱਤੇ ਗਏ ਸਨ। ਇਹਨਾਂ ਖਾਤਿਆਂ ਦੇ ਸਾਰੇ ਲੈਣ-ਦੇਣ ਰਜਤ ਡਾਹਰਾ ਹੀ ਕਰ ਰਿਹਾ ਸੀ।

ਰਜਤ ਡਾਹਰਾ ਦੀ ਭੂਮਿਕਾ

ED ਮੁਤਾਬਕ ਪੁਸ਼ਪਿੰਦਰ ਸਿੰਘ ਨੇ 2020 ਵਿੱਚ ਰਜਤ ਡਾਹਰਾ ਨੂੰ ਬੈਂਕ ਖਾਤੇ ਦੇ ਵੇਰਵੇ ਦੇਣ ਲਈ ਕਿਹਾ ਸੀ ਤਾਂ ਜੋ ਫਰਜ਼ੀ ਐਂਟਰੀਆਂ (Accommodation entries) ਰਾਹੀਂ ਪੈਸਾ ਘੁਮਾਇਆ ਜਾ ਸਕੇ ਅਤੇ ਬਾਅਦ ਵਿੱਚ ਉਹ ਪੈਸਾ ਪੁਸ਼ਪਿੰਦਰ ਅਤੇ ਉਸ ਦੀ ਪਤਨੀ ਦੇ ਖਾਤਿਆਂ ਵਿੱਚ ਵਾਪਸ ਆ ਸਕੇ। ਪੁਸ਼ਪਿੰਦਰ ਵਟਸਐਪ (WhatsApp) ਰਾਹੀਂ ਰਜਤ ਨੂੰ ਪੈਸੇ ਟਰਾਂਸਫਰ ਕਰਨ ਦੀਆਂ ਹਦਾਇਤਾਂ ਦਿੰਦਾ ਸੀ। ਰਜਤ ਨੇ ਦੱਸਿਆ ਕਿ ਪੁਸ਼ਪਿੰਦਰ ਨੇ ਉਸ ਦੇ ਨਾਮ 'ਤੇ ਕਈ ਲਗਜ਼ਰੀ ਗੱਡੀਆਂ ਖਰੀਦੀਆਂ ਸਨ ਜਿਨ੍ਹਾਂ ਦੀ ਵਰਤੋਂ ਪੁਸ਼ਪਿੰਦਰ ਅਤੇ ਉਸ ਦੀ ਪਤਨੀ ਕਰਦੇ ਸਨ। ਮਾਰਚ 2026 ਵਿੱਚ ਪੁਸ਼ਪਿੰਦਰ ਨੇ ਰਜਤ ਦੇ ਮੋਬਾਈਲ ਫੋਨ ਵੀ ਨਸ਼ਟ ਕਰ ਦਿੱਤੇ ਅਤੇ ਗੱਡੀਆਂ ਵੇਚ ਕੇ ਸਾਰਾ ਪੈਸਾ ਖੁਦ ਰੱਖ ਲਿਆ। ਇਸ ਤੋਂ ਇਲਾਵਾ ਰਜਤ ਨੇ ਮਾਰਚ 2026 ਵਿੱਚ ਪੁਸ਼ਪਿੰਦਰ ਨੂੰ 1 ਕਰੋੜ ਰੁਪਏ ਨਕਦ ਵੀ ਦਿੱਤੇ ਸਨ।

ਨਗਰ ਨਿਗਮ ਦੇ ਸਾਬਕਾ ਅਕਾਊਂਟਸ ਅਫ਼ਸਰ ਵਿਕਾਸ ਕੌਸ਼ਿਕ ਨੇ ਦੱਸਿਆ ਕਿ ਬੈਂਕ ਅਤੇ ਨਗਰ ਨਿਗਮ ਵਿਚਾਲੇ ਸਾਰੀ ਗੱਲਬਾਤ ਪੁਸ਼ਪਿੰਦਰ ਸਿੰਘ ਅਤੇ ਰਿਲੇਸ਼ਨਸ਼ਿਪ ਮੈਨੇਜਰ ਦਿਲੀਪ ਕੁਮਾਰ ਰਾਘਵ ਹੀ ਸੰਭਾਲਦੇ ਸਨ। ਕੌਸ਼ਿਕ ਮੁਤਾਬਕ ਪੁਸ਼ਪਿੰਦਰ ਨੇ ਉਸ ਨੂੰ ਇਸ ਘੁਟਾਲੇ ਵਿੱਚ ਮਦਦ ਕਰਨ ਲਈ ਪੈਸਿਆਂ ਦਾ ਲਾਲਚ ਵੀ ਦਿੱਤਾ ਸੀ।

ਬੈਂਕ ਮੈਨੇਜਰ ਦੇ ਅਹੁਦੇ ਦੀ ਦੁਰਵਰਤੋਂਪੁਸ਼ਪਿੰਦਰ ਸਿੰਘ ਨੇ ਖੁਦ ਕਬੂਲਿਆ ਹੈ ਕਿ ਉਸ ਨੇ 2020 ਤੋਂ 2023 ਦਰਮਿਆਨ ਰਜਤ ਡਾਹਰਾ ਅਤੇ ਸਵਾਤੀ ਤੋਮਰ ਤੋਂ 33 ਕਰੋੜ ਰੁਪਏ 'ਲੋਨ' ਵਜੋਂ ਲਏ ਸਨ, ਜਿਸ ਦੀ ਵਰਤੋਂ ਉਸਨੇ ਲਗਜ਼ਰੀ ਗੱਡੀਆਂ ਅਤੇ ਜਾਇਦਾਦਾਂ ਖਰੀਦਣ ਲਈ ਕੀਤੀ।

ਮੁੱਢਲੀ ਜਾਂਚ ਤੋਂ ਪਤਾ ਲੱਗਦਾ ਹੈ ਕਿ ਪੁਸ਼ਪਿੰਦਰ ਸਿੰਘ ਨੇ ਬੈਂਕ ਮੈਨੇਜਰ ਅਤੇ ਡਿਪਟੀ ਵੀਪੀ ਦੇ ਅਹੁਦੇ ਦੀ ਦੁਰਵਰਤੋਂ ਕਰਕੇ ਨਗਰ ਨਿਗਮ ਪੰਚਕੂਲਾ ਦੇ ਨਾਮ 'ਤੇ ਗੈਰ-ਕਾਨੂੰਨੀ ਖਾਤੇ ਖੋਲ੍ਹੇ। ਨਿਗਮ ਦੇ ਅਸਲੀ ਖਾਤਿਆਂ ਵਿੱਚੋਂ ਪੈਸਾ ਆਪਣੇ ਸਾਥੀਆਂ ਦੇ ਖਾਤਿਆਂ ਵਿੱਚ ਪਾਇਆ, ਜਿਨ੍ਹਾਂ ਦਾ ਕੰਟਰੋਲ ਅਸਿੱਧੇ ਤੌਰ 'ਤੇ ਉਸ ਦੇ ਆਪਣੇ ਹੱਥ ਵਿੱਚ ਸੀ।

ਅਦਾਲਤ ਦਾ ਫੈਸਲਾ: ਪੁਸ਼ਪਿੰਦਰ ਸਿੰਘ ਦੇ ਵਕੀਲ ਦੀਪਾਂਸ਼ੂ ਬਾਂਸਲ ਨੇ 1 ਜੂਨ ਨੂੰ ਅਦਾਲਤ ਵਿੱਚ ਦਲੀਲ ਦਿੱਤੀ ਕਿ PMLA ਦੀ ਧਾਰਾ 19 ਦੇ ਨਿਯਮਾਂ ਦੀ ਪਾਲਣਾ ਨਹੀਂ ਕੀਤੀ ਗਈ ਅਤੇ ਪੁਸ਼ਪਿੰਦਰ ਨੂੰ ਤੁਰੰਤ ਰਿਹਾਅ ਕੀਤਾ ਜਾਵੇ। ਹਾਲਾਂਕਿ, ਵਿਸ਼ੇਸ਼ ਅਦਾਲਤ ਨੇ ਦੋਵਾਂ ਪੱਖਾਂ ਦੀਆਂ ਦਲੀਲਾਂ ਸੁਣਨ ਤੋਂ ਬਾਅਦ, ਘੁਟਾਲੇ ਦੇ ਅਸਲ ਲਾਭਪਾਤਰੀਆਂ (Beneficiaries) ਅਤੇ ਪੈਸੇ ਦੇ ਸਹੀ ਮੁੱਲ ਦਾ ਪਤਾ ਲਗਾਉਣ ਲਈ ਪੁਸ਼ਪਿੰਦਰ ਸਿੰਘ ਨੂੰ 9 ਜੂਨ ਤੱਕ ED ਦੀ ਹਿਰਾਸਤ (Remand) ਵਿੱਚ ਭੇਜ ਦਿੱਤਾ ਹੈ।