ਟ੍ਰਿਬਿਊਨ ਨਿਊਜ਼ ਸਰਵਿਸ
ਚੰਡੀਗੜ੍ਹ, 15 ਸਤੰਬਰ
ਜੇਈਈ ਮੇਨਜ਼ 2021 ਦੇ ਨਤੀਜਿਆਂ ਦਾ ਐਲਾਨ ਦੇਰ ਰਾਤ ਕੀਤਾ ਹੈ। ਦੇਸ਼ ਦੇ 44 ਵਿਦਿਆਰਥੀਆਂ ਨੇ 100 ਪਰਸੈਂਟਾਈਲ ਅੰਕ ਹਾਸਿਲ ਕੀਤਾ ਹੈ। ਇਸ ’ਚ ਚੰਡੀਗੜ੍ਹ ’ਚ ਪੜ੍ਹਾਈ ਕਰ ਰਹੇ ਗੁਰਅੰਮ੍ਰਿਤ ਸਿੰਘ ਤੇ ਪੁਲਕਿਤ ਗੋਇਲ ਨੇ 100 ਪਰਸੈਂਟਾਈਲ ਨਾਲ ਆਲ ਇੰਡੀਆ ਵਿੱਚ ਪਹਿਲਾ ਰੈਂਕ ਹਾਸਿਲ ਕੀਤਾ ਹੈ। ਪ੍ਰਥਮ ਗਰਗ ਨੇ ਆਲ ਇੰਡੀਆ ਵਿੱਚ 8ਵਾਂ ਰੈਂਕ ਹਾਸਿਲ ਕੀਤਾ ਹੈ। ਗੁਰਅੰਮ੍ਰਿਤ ਮੁਹਾਲੀ ਦੇ ਸੈਕਟਰ 74 ’ਚ ਪਰਿਵਾਰ ਸਣੇ ਰਹਿੰਦੇ ਹਨ। ਉਸ ਦੇ ਪਿਤਾ ਗੁਰਦਰਸ਼ਨ ਸਿੰਘ ਬਿਜਨਸਮੈਨ ਹਨ ਤੇ ਮਾਂ ਘਰ ਦਾ ਕੰਮਕਾਜ ਸਾਂਭਦੀ ਹੈ। ਜਦੋਂਕਿ ਛੋਟਾ ਭਰਾ 10ਵੀਂ ਦੀ ਪੜ੍ਹਾਈ ਕ ਰਿਹਾ ਹੈ। ਜਿਨ੍ਹਾਂ ਦੇ ਬਾਰਵੀਂ ਦੀ ਪ੍ਰੀਖਿਆ ’ਚ ਨਾਨ ਮੈਡੀਕਲ ’ਚ 99.2 ਫ਼ੀਸਦ ਤੇ ਦਸਵੀਂ ’ਚ 97 ਫ਼ੀਸਦ ਅੰਕ ਹਾਸਿਲ ਕੀਤੇ ਸਨ। ਉਨ੍ਹਾਂ ਕਿਹਾ ਕਿ ਉਹ ਬਾਰਵੀਂ ਦੀ ਪੜ੍ਹਾਈ ਦੇ ਨਾਲ-ਨਾਲ ਰੋਜ਼ਾਨਾਂ 7-8 ਘੰਟੇ ਜੇਈਈ ਮੈਨਜ਼ ਦੀ ਤਿਆਰੀ ਕਰਦੇ ਸਨ। ਉਹ 3 ਅਕਤੂਬਰ ਨੂੰ ਹੋਣ ਵਾਲੀ ਜੇਈਈ ਐਡਵਾਂਸ ਦੀ ਪ੍ਰੀਖਿਆ ਦੀ ਤਿਆਰੀ ’ਚ ਜੁੱਟ ਗਏ ਹਨ। ਇਸੇ ਤਰ੍ਹਾਂ ਐਲਨ ਚੰਡੀਗੜ੍ਹ ਦੇ ਵਿਦਿਆਰਥੀ ਦਾਨਿਸ਼ ਝਾਂਜੀ ਨੇ 33 ਵਾਂ ਰੈਂਕ ਤੇ ਕਨਵ ਸਿੰਗਲਾ ਨੇ 42 ਵਾਂ ਰੈਂਕ ਹਾਸਿਲ ਕੀਤਾ। ਸਿਧਾਰਥ ਗੁਪਤਾ 60 ਵਾਂ ਰੈਂਕ, ਭਾਵਜ ਸਿੰਗਲਾ ਨੇ 98ਵਾਂ ਰੈਂਕ ਤੇ ਤਲਿਨ ਗੁਪਤਾ ਨੇ 100 ਵਾਂ ਰੈਂਕ ਹਾਸਿਲ ਕੀਤਾ।
ਐਲਨ ਦੇ ਟ੍ਰਾਈਸਿਟੀ ਸੈਂਟਰ ਹੈੱਡ ਸਦਾਨੰਦ ਵਾਣੀ ਨੇ ਟਿੱਚੇ ਨੂੰ ਹਾਸਿਲ ਕਰਨ ਲਈ ਵਿਦਿਆਰਥੀਆਂ ਤੇ ਫੈਕਲਟੀ ਦੀ ਕਰੜੀ ਮਿਹਨਤ ਤੇ ਸਮਰਪਣ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਨੇ ਵਿਦਿਆਰਥੀਆਂ ਤੇ ਫੈਕੇਲਿਟੀ ਟੀਮ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ। ਕਰੋਨਾ ਮਹਾਮਾਰੀ ਕਰਕੇ ਪ੍ਰੀਖਿਆ ਵਾਰ-ਵਾਰ ਅੱਗੇ ਪਾਈ ਗਈ ਸੀ, ਪਰ ਵਿਦਿਆਰਥੀਆਂ ਤੇ ਅਧਿਆਪਕਾਂ ਦੋਨਾਂ ਨੇ ਆਪਣੀ ਪੜ੍ਹਾਈ ਨੂੰ ਲਗਾਤਾਰ ਜਾਰੀ ਰੱਖਿਆ ਤੇ ਪ੍ਰੀਖਿਆ ਦੇ ਪ੍ਰਤੀ ਦ੍ਰਿੜਤਾ ਨੇ ਇਸ ਜਬਰਦਸਤ ਨਤੀਜੇ ਨੂੰ ਜਨਮ ਦਿੱਤਾ। ਦੱਸਣਯੋਗ ਹੈ ਕਿ ਬੀ.ਈ./ਬੀ.ਟੈੱਕ ਦੇ ਲਈ ਜੇਈਈ ਮੈਨਜ਼ ਪ੍ਰੀਖਿਆ ਨੂੰ ਐਨਟੀਏ ਦੁਆਰਾ ਫਰਵਰੀ, ਮਾਰਚ, ਜੁਲਾਈ, ਅਗਸਤ/ਸਤੰਬਰ ’ਚ ਕ੍ਰਮਵਾਰ 4 ਸ਼ੈਸ਼ਨਾਂ ’ਚ ਕੀਤਾ ਸੀ। ਜਿਸ ’ਚ 9,39,008 ਉਮੀਦਵਾਰਾਂ ਨੇ ਬੀ.ਈ./ਬੀ.ਟੈੱਕ. ਕੋਰਸਾਂ ਵਿੱਚ ਦਾਖਲੇ ਦੇ ਲਈ ਪ੍ਰੀਖਿਆ ਦਿੱਤੀ ਸੀ।