ਸੁਖਵਿੰਦਰ ਪਾਲ ਸੋਢੀ
ਚੰਡੀਗੜ੍ਹ, 13 ਜੁਲਾਈ
ਸੈਂਟਰਲ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ (ਸੀਬੀਐਸਈ) ਵਲੋਂ ਅੱਜ ਬਾਰ੍ਹਵੀਂ ਦੇ ਨਤੀਜੇ ਐਲਾਨ ਦਿੱਤੇ ਗਏ ਜਿਸ ਵਿਚ ਟ੍ਰਾਈਸਿਟੀ ਵਿਚ ਲੜਕੀਆਂ ਨੇ ਬਾਜ਼ੀ ਮਾਰ ਲਈ ਹੈ। ਕਾਮਰਸ ਵਿੱਚ ਭਵਨ ਵਿਦਿਆਲਿਆ ਸਕੂਲ ਸੈਕਟਰ-27 ਦੀ ਓਸ਼ਿਲ ਬਾਂਸਲ ਨੇ 99.4 ਫੀਸਦੀ ਅੰਕ ਹਾਸਲ ਕਰਕੇ ਟਰਾਈਸਿਟੀ ਵਿਚ ਟੌਪ ਕੀਤਾ। ਮੈਡੀਕਲ ਵਿਚ ਵੀ ਭਵਨ ਵਿਦਿਆਲਿਆ ਦੀ ਸ਼ਰੁਤੀ ਗੋਇਲ ਨੇ 98.6 ਫੀਸਦੀ ਅੰਕ ਹਾਸਲ ਕਰਕੇ ਟੌਪ ਕੀਤਾ। ਨਾਨ ਮੈਡੀਕਲ ਵਿਚ ਸਟੈਪਿੰਗ ਸਟੋਨ ਸਕੂਲ ਸੈਕਟਰ-37 ਦੇ ਅਨਿਰੁਧ ਗਰਗ ਨੇ 98.8 ਫੀਸਦੀ ਅੰਕ ਹਾਸਲ ਕਰ ਕੇ ਮੋਹਰੀ ਸਥਾਨ ਹਾਸਲ ਕੀਤਾ। ਭਵਨ ਵਿਦਿਆਲਿਆ ਸਕੂਲ ਦੇ ਆਰੀਅਨ ਲਹਿਰੀ ਦੇ ਕਾਮਰਸ ਵਿਚ 99.2 ਫੀਸਦੀ ਅੰਕ ਆਏ। ਇਸੇ ਸਕੂਲ ਦੇ ਆਰੀਅਨ ਮਹਾਜਨ ਨੇ ਹਿਊਮੈਨਟੀਜ਼ ਵਿਚ 98.8 ਫੀਸਦੀ ਅੰਕ ਹਾਸਲ ਕੀਤੇ। ਡੀਏਵੀ ਸਕੂਲ ਸੈਕਟਰ-15 ਦੇ ਵਿਧੀ ਗੋਇਲ ਨੇ ਕਾਮਰਸ ਵਿਚ 98.2 ਫੀਸਦੀ ਅੰਕ ਹਾਸਲ ਕਰਕੇ ਮਾਅਰਕਾ ਮਾਰਿਆ। ਕਾਮਰਸ ਦੀ ਟਰਾਈਸਿਟੀ ਦੀ ਟੌਪਰ ਓਸ਼ਿਲ ਨੇ ਦੱਸਿਆ ਕਿ ਇੰਡੀਅਨ ਇਕਨਾਮਿਕਸ ਸਰਵਿਸ ਤੋਂ ਪੜ੍ਹਨ ਦੀ ਚਾਹਵਾਨ ਹੈ।
ਕੈਂਸਰ ਕਾਰਨ ਵੀ ਹਿੰਮਤ ਨਹੀਂ ਹਾਰੀ
ਸੇਕਰਡ ਹਾਰਟ ਸਕੂਲ ਸੈਕਟਰ-26 ਦੀ ਸਰਿਸ਼ਟੀ ਮਹਿਤਾਨੀ ਦੇ ਮੈਡੀਕਲ ਸਟਰੀਮ ਵਿਚ 97.6 ਫੀਸਦੀ ਨੰਬਰ ਆਏ ਹਨ। ਉਸ ਨੇ ਆਪਣੇ ਸਕੂਲ ਵਿਚ ਵੀ ਟੌਪ ਕੀਤਾ ਹੈ। ਉਸ ਦੇ ਇਲਾਜ ਦੌਰਾਨ ਸਾਲ 2016 ਵਿਚ ਕੈਂਸਰ ਹੋਣ ਬਾਰੇ ਪਤਾ ਲੱਗਾ ਪਰ ਉਸ ਨੇ ਦਸਵੀਂ ਦੀ ਪ੍ਰੀਖਿਆ ਦਿੱਤੀ ਤੇ ਉਸ ਵੇਲੇ ਵੀ ਟੌਪ ਕੀਤਾ। ਸਰਿਸ਼ਟੀ ਨੇ ਕੈਂਸਰ ਕਾਰਨ ਕਦੀ ਵੀ ਆਪਣੀ ਪੜ੍ਹਾਈ ਨਾਲ ਸਮਝੌਤਾ ਨਹੀਂ ਕੀਤਾ। ਉਸ ਦੇ ਪਿਤਾ ਹੁੱਡਾ ਵਿਚ ਚੀਫ ਟਾਊਨ ਪਲਾਨਰ ਹਨ ਤੇ ਮਾਂ ਪਹਿਲਾਂ ਲੈਕਚਰਾਰ ਸੀ ਪਰ ਉਹ ਹੁਣ ਆਪਣੀ ਲੜਕੀ ਦਾ ਖਿਆਲ ਰੱਖਦੀ ਹੈ ਤੇ ਘਰੇਲੂ ਸੁਆਣੀ ਹੈ। ਇਸ ਸਕੂਲ ਦੀ ਅਧਿਆਪਕਾ ਨੇ ਦੱਸਿਆ ਕਿ ਸਰਿਸ਼ਟੀ ਕੈਂਸਰ ਕਾਰਨ ਰੋਜ਼ਾਨਾ ਸਕੂਲ ਨਹੀਂ ਆਉਂਦੀ ਤੇ ਬਾਕੀ ਬੱਚਿਆਂ ਨਾਲੋਂ ਪਹਿਲਾਂ ਛੁੱਟੀ ਕਰ ਲੈਂਦੀ ਹੈ। ਸਰਿਸ਼ਟੀ ਨੇ ਦੱਸਿਆ ਕਿ ਉਹ ਰੋਜ਼ਾਨਾ ਪੰਜ ਤੋਂ ਛੇ ਘੰਟੇ ਪੜ੍ਹਦੀ ਰਹੀ ਹੈ ਤੇ ਉਹ ਬੈਡਮਿੰਟਨ ੇਖੇਡ ਕੇ ਤੇ ਪੁਸਤਕਾਂ ਪੜ੍ਹ ਕੇ ਤਣਾਅ ਦੂਰ ਕਰਦੀ ਰਹੀ ਹੈ ਤੇ ਉਸ ਦਾ ਸੁਪਨਾ ਏਮਜ਼ ਜਾਂ ਚੰਡੀਗੜ੍ਹ ਤੋਂ ਐਮਬੀਬੀਐਸ ਕਰਨ ਦਾ ਹੈ। ਉਸ ਦੇ ਪਿਤਾ ਨੇ ਦੱਸਿਆ ਕਿ ਸਰਿਸ਼ਟੀ ਦਾ ਰੈਗੂਲਰ ਚੈਕਅੱਪ ਪੀਜੀਆਈ ਤੋਂ ਚਲਦਾ ਹੈ।
ਸਰਕਾਰੀ ਸਕੂਲਾਂ ਦਾ ਨਤੀਜਾ 9.81 ਫੀਸਦੀ ਸੁਧਰਿਆ
ਚੰਡੀਗੜ੍ਹ ਦੇ ਸਰਕਾਰੀ ਸਕੂਲਾਂ ਦਾ ਨਤੀਜਾ ਪਿਛਲੇ ਸਾਲ ਨਾਲੋਂ 9.81 ਫੀਸਦੀ ਸੁਧਰਿਆ ਹੈ। ਇਥੋਂ ਦੇ 9601 ਵਿਦਿਆਰਥੀਆਂ ਨੇ ਪ੍ਰੀਖਿਆ ਦਿੱਤੀ ਤੇ ਪਾਸ ਪ੍ਰਤੀਸ਼ਤਤਾ 91.57 ਫੀਸਦੀ ਰਹੀ। ਇਥੋਂ ਦੇ 40 ਸਕੂਲਾਂ ਵਿਚੋਂ 24 ਸਕੂਲਾਂ ਦੇ 765 ਵਿਦਿਆਰਥੀਆਂ ਦੇ 90 ਫੀਸਦੀ ਤੋਂ ਉਤੇ ਅੰਕ ਆਏ। ਡਾਇਰੈਕਟਰ ਰੁਬਿੰਦਰਜੀਤ ਸਿੰਘ ਬਰਾੜ ਨੇ ਦੱਸਿਆ ਕਿ ਸਰਕਾਰੀ ਸਕੂਲ ਮਨੀਮਾਜਰਾ ਹਾਊਸਿੰਗ ਕੰਪਲੈਕਸ ਦੀ ਕਰਿਤੀ ਮਹਾਜਨ ਦੇ ਨਾਨ ਮੈਡੀਕਲ ਵਿਚ 98.4 ਫੀਸਦੀ, ਇਸੀ ਸਕੂਲ ਦੇ ਮੁਸਕਾਨ ਚੁੱਘ ਦੇ ਮੈਡੀਕਲ ਵਿਚ 97.4 ਫੀਸਦੀ, ਸੈਕਟਰ-16 ਦੇ ਮੋਹਿਤ ਹੁੱਡਾ ਦੇ ਕਾਮਰਸ ਵਿਚ 97.4 ਫੀਸਦੀ, ਇਸ ਸਕੂਲ ਦੀ ਸ਼ਰੇਆ ਸ਼ਰਮਾ ਦੇ ਹਿਊਮੈਨੀਟੀਜ਼ ਵਿਚ 97.8 ਫੀਸਦੀ, ਸੈਕਟਰ-16 ਦੀ ਅਨੁਸ਼ਕਾ ਦੇ 97.8 ਫੀਸਦੀ, ਸਰਕਾਰੀ ਸਕੂਲ ਸੈਕਟਰ-37 ਬੀ ਦੇ ਸਾਰਤਿਕ ਦੇ 97.8 ਫੀਸਦੀ ਅੰਕ ਆਏ ਹਨ। ਵੋਕੇਸ਼ਨਲ ਵਿਚ ਸੈਕਟਰ-18 ਦੀ ਯਸ਼ਵੀ ਦੇ 96.2 ਤੇ ਮਨੀਮਾਜਰਾ ਹਾਊਸਿੰਗ ਕੰਪਲੈਕਸ ਦੀ ਹਰਪ੍ਰੀਤ ਕੌਰ ਦੇ 96.2 ਫੀਸਦੀ ਅੰਕ ਆਏ ਹਨ।