ਆਪ ਲੋਗੋਂ ਕੀ ਤਬੀਅਤ ਕੈਸੀ ਹੈ?: ਸਿਹਤ ਦੀਆਂ ਖ਼ਬਰਾਂ ਫੈਲਾਉਣ ਵਾਲਿਆਂ ਨੂੰ Salman Khan ਨੇ ਪੁੱਛਿਆ ਖ਼ਾਸ ਹਾਲ-ਚਾਲ

ਸੋਸ਼ਲ ਮੀਡੀਆ 'ਤੇ ਆਪਣੀ ਸਿਹਤ ਨੂੰ ਲੈ ਕੇ ਚੱਲ ਰਹੀਆਂ ਚਿੰਤਾਵਾਂ ਤੋਂ ਬਾਅਦ, ਬਾਲੀਵੁੱਡ ਦੇ ਸੁਪਰਸਟਾਰ ਸਲਮਾਨ ਖ਼ਾਨ ਨੇ ਆਖ਼ਰਕਾਰ ਜਵਾਬ ਦਿੱਤਾ ਹੈ — ਪਰ ਆਪਣੇ ਖ਼ਾਸ 'ਸਲਮਾਨੀ' ਅੰਦਾਜ਼ ਵਿੱਚ। ਕੋਈ ਰਸਮੀ ਸਪੱਸ਼ਟੀਕਰਨ ਦੇਣ ਦੀ ਬਜਾਏ, ਉਨ੍ਹਾਂ ਨੇ ਇੰਸਟਾਗ੍ਰਾਮ 'ਤੇ ਆਪਣੀਆਂ ਨਵੀਂਆਂ ਸਟਾਈਲਿਸ਼ ਤਸਵੀਰਾਂ ਨਾਲ ਇੱਕ ਜ਼ਬਰਦਸਤ ਕੈਪਸ਼ਨ ਲਿਖਿਆ: "ਆਪ ਲੋਗੋਂ ਕੀ ਤਬੀਅਤ ਕੈਸੀ ਹੈ?" । ਇਸ ਪੋਸਟ ਤੋਂ ਬਾਅਦ ਪ੍ਰਸ਼ੰਸਕ ਮੰਨ ਰਹੇ ਹਨ ਕਿ ਇਹ ਸਲਮਾਨ ਦਾ ਅਟਕਲਾਂ ਲਗਾਉਣ ਵਾਲਿਆਂ ਨੂੰ ਮਜ਼ਾਕੀਆ ਤਰੀਕੇ ਨਾਲ ਜਵਾਬ ਦੇਣ ਦਾ ਤਰੀਕਾ ਸੀ।

ਵਾਇਰਲ ਵੀਡੀਓਜ਼ ਤੋਂ ਸ਼ੁਰੂ ਹੋਈਆਂ ਸਨ ਅਫ਼ਵਾਹਾਂ

ਇਸ ਪੋਸਟ ਦਾ ਸਮਾਂ ਕਾਫ਼ੀ ਦਿਲਚਸਪ ਹੈ। ਕੁਝ ਦਿਨ ਪਹਿਲਾਂ ਸਲਮਾਨ ਇੱਕ ਜਨਤਕ ਸਮਾਗਮ ਵਿੱਚ ਸ਼ਾਮਲ ਹੋਏ ਸਨ, ਜਿੱਥੇ ਉਨ੍ਹਾਂ ਦੀਆਂ ਵੀਡੀਓਜ਼ ਅਤੇ ਤਸਵੀਰਾਂ ਤੇਜ਼ੀ ਨਾਲ ਵਾਇਰਲ ਹੋਈਆਂ। ਪ੍ਰਸ਼ੰਸਕਾਂ ਨੇ ਸੋਸ਼ਲ ਮੀਡੀਆ 'ਤੇ ਚਰਚਾ ਸ਼ੁਰੂ ਕਰ ਦਿੱਤੀ ਕਿ ਅਦਾਕਾਰ ਕਾਫ਼ੀ ਪਤਲੇ, ਥੱਕੇ ਹੋਏ ਅਤੇ ਸੁਸਤ ਦਿਖਾਈ ਦੇ ਰਹੇ ਸਨ, ਜਿਸ ਨਾਲ ਉਨ੍ਹਾਂ ਦੀ ਸਿਹਤ ਬਾਰੇ ਅਫ਼ਵਾਹਾਂ ਅਤੇ ਸ਼ੁਭਕਾਮਨਾਵਾਂ ਦਾ ਦੌਰ ਸ਼ੁਰੂ ਹੋ ਗਿਆ ਸੀ।

ਹੁਣ, ਇਸ ਇੱਕ ਰਮਜ਼ਦਾਰ (Cryptic) ਕੈਪਸ਼ਨ ਨਾਲ, ਸਲਮਾਨ ਨੇ ਇਸ ਪੂਰੀ ਚਰਚਾ ਦਾ ਰੁੱਖ ਹੀ ਮੋੜ ਦਿੱਤਾ ਹੈ।

ਤਸਵੀਰਾਂ 'ਤੇ ਪ੍ਰਸ਼ੰਸਕਾਂ ਅਤੇ ਸਿਤਾਰਿਆਂ ਦੀਆਂ ਪ੍ਰਤੀਕਿਰਿਆਵਾਂ

ਨਵੀਂਆਂ ਤਸਵੀਰਾਂ ਵਿੱਚ ਸੁਪਰਸਟਾਰ ਕਾਫ਼ੀ ਸ਼ਾਂਤ ਅਤੇ ਆਤਮ-ਵਿਸ਼ਵਾਸ ਨਾਲ ਭਰੇ ਨਜ਼ਰ ਆ ਰਹੇ ਹਨ, ਜੋ ਸਧਾਰਨ ਕੱਪੜਿਆਂ ਅਤੇ ਸਟਾਈਲਿਸ਼ ਹੈਟ ਵਿੱਚ ਪੋਜ਼ ਦੇ ਰਹੇ ਹਨ। ਉਨ੍ਹਾਂ ਦੇ ਕਮੈਂਟ ਸੈਕਸ਼ਨ ਵਿੱਚ ਪ੍ਰਸ਼ੰਸਕਾਂ ਨੇ ਉਨ੍ਹਾਂ ਦੀ ਹਾਸਰਸ ਬੁੱਧੀ (Sense of humour) ਦੀ ਤਾਰੀਫ਼ ਕੀਤੀ। ਅਦਾਕਾਰਾ ਮਾਹੀ ਵਿਜ ਨੇ ਵੀ ਹੱਸਣ ਵਾਲੇ ਈਮੋਜੀ ਨਾਲ ਕਮੈਂਟ ਕੀਤਾ: "toooo goooodddddd"

ਆਉਣ ਵਾਲੀ ਫ਼ਿਲਮ 'ਮਾਤ੍ਰਭੂਮੀ' ਦਾ ਇੰਤਜ਼ਾਰ

ਇਸ ਦੌਰਾਨ, ਸਲਮਾਨ ਆਪਣੇ ਕੰਮ ਦੇ ਫਰੰਟ 'ਤੇ ਵੀ ਪ੍ਰਸ਼ੰਸਕਾਂ ਵਿੱਚ ਉਤਸ਼ਾਹ ਬਣਾਏ ਹੋਏ ਹਨ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਉਨ੍ਹਾਂ ਨੇ ਕੁਦਰਤ ਦੇ ਵਿਚਕਾਰ ਆਪਣੀ ਫਿੱਟ ਬੌਡੀ (Ripped physique) ਦੀ ਇੱਕ ਸ਼ਾਨਦਾਰ ਤਸਵੀਰ ਸ਼ੇਅਰ ਕਰਕੇ ਆਪਣੀ ਆਉਣ ਵਾਲੀ ਫ਼ਿਲਮ ਮਾਤ੍ਰਭੂਮੀ: ਮੇਅ ਵਾਰ ਰੈਸਟ ਇਨ ਪੀਸ (Maatrubhumi: May War Rest In Peace) ਦੀ ਝਲਕ ਦਿੱਤੀ ਸੀ, ਜਿਸ ਦਾ ਕੈਪਸ਼ਨ ਸਿਰਫ਼ "MAATRUBHUMI" ਸੀ।

'ਸਲਮਾਨ ਖ਼ਾਨ ਫ਼ਿਲਮਜ਼' ਦੇ ਬੈਨਰ ਹੇਠ ਬਣ ਰਹੀ ਅਤੇ ਅਪੂਰਵ ਲਖੀਆ ਵੱਲੋਂ ਨਿਰਦੇਸ਼ਿਤ ਇਸ ਫ਼ਿਲਮ ਵਿੱਚ ਚਿੱਤਰਾਂਗਦਾ ਸਿੰਘ ਵੀ ਮੁੱਖ ਭੂਮਿਕਾ ਵਿੱਚ ਹਨ। ਹਾਲਾਂਕਿ ਇਹ ਫ਼ਿਲਮ ਪਹਿਲਾਂ ਅਪਰੈਲ ਵਿੱਚ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਣੀ ਸੀ, ਪਰ ਇਸ ਦੀ ਰਿਲੀਜ਼ ਅੱਗੇ ਪਾ ਦਿੱਤੀ ਗਈ ਸੀ ਅਤੇ ਪ੍ਰਸ਼ੰਸਕ ਹਾਲੇ ਵੀ ਨਵੀਂ ਰਿਲੀਜ਼ ਡੇਟ ਦੇ ਐਲਾਨ ਦੀ ਉਡੀਕ ਕਰ ਰਹੇ ਹਨ।