Holidays in May: ਮਈ ਮਹੀਨੇ ’ਚ ਛੁੱਟੀਆਂ ਦਾ ‘ਸੋਕਾ’; ਨਾ ਗਰਮੀ ਤੋਂ ਰਾਹਤ ਨਾ ਕੰਮ ਤੋਂ
Holidays in May: ਕੋਈ Long Weekend ਨਹੀਂ; ਜਾਏਂ ਤੋਂ ਜਾਏਂ ਕਹਾਂ....
Holidays in May: ਜੇਕਰ ਤੁਸੀਂ ਇਸ ਭਿਆਨਕ ਗਰਮੀ ਵਿੱਚ ਕਿਤੇ ਪਹਾੜਾਂ ਜਾਂ ਠੰਢੀਆਂ ਥਾਵਾਂ ’ਤੇ ਘੁੰਮਣ ਜਾਣ ਦੀ ਵਿਉਂਤਬੰਦੀ ਕਰ ਰਹੇ ਹੋ, ਤਾਂ ਇਹ ਖ਼ਬਰ ਤੁਹਾਡੇ ਮਨਸੂਬਿਆਂ ’ਤੇ ਪਾਣੀ ਫੇਰ ਸਕਦੀ ਹੈ। ਮਈ ਦੇ ਇਸ ਤਪਦੇ ਮਹੀਨੇ ਵਿੱਚ ਹੁਣ ਸਰਕਾਰੀ ਛੁੱਟੀਆਂ ਦਾ ਲਗਭਗ ‘ਸੋਕਾ’ ਹੀ ਰਹਿਣ ਵਾਲਾ ਹੈ। ਪੂਰੇ ਮਹੀਨੇ ਦੇ ਕੈਲੰਡਰ ਵਿੱਚ ਹੁਣ ਸਿਰਫ਼ ਇੱਕ ਹੀ ਸਰਕਾਰੀ ਛੁੱਟੀ ਬਾਕੀ ਬਚੀ ਹੈ।
ਦੱਸਣਯੋਗ ਹੈ ਕਿ 1 ਮਈ ਨੂੰ ‘ਮਈ ਦਿਵਸ’ (ਲੇਬਰ ਡੇਅ) ਦੀ ਛੁੱਟੀ ਪਹਿਲਾਂ ਹੀ ਲੰਘ ਚੁੱਕੀ ਹੈ। ਇਸ ਤੋਂ ਬਾਅਦ ਹੁਣ ਮਹੀਨੇ ਦੇ ਅੱਧ ਵਿੱਚ ਕੋਈ ਵੀ ਗਜ਼ਟਿਡ ਛੁੱਟੀ ਨਹੀਂ ਹੈ। ਜਿਹੜੇ ਮੁਲਾਜ਼ਮ ਜਾਂ ਸੈਲਾਨੀ ਲੰਬੇ ਵੀਕਐਂਡ (Long Weekend) ਦੀ ਉਡੀਕ ਕਰ ਰਹੇ ਸਨ, ਉਨ੍ਹਾਂ ਨੂੰ ਹੁਣ ਨਿਰਾਸ਼ਾ ਹੱਥ ਲੱਗ ਸਕਦੀ ਹੈ। ਹੁਣ ਅਗਲੀ ਅਤੇ ਆਖ਼ਰੀ ਸਰਕਾਰੀ ਛੁੱਟੀ 27 ਮਈ (ਬੁੱਧਵਾਰ) ਨੂੰ ‘ਈਦ-ਉਲ-ਜ਼ੁਹਾ’ ਦੇ ਮੌਕੇ ’ਤੇ ਹੋਵੇਗੀ। ਇਸ ਤੋਂ ਇਲਾਵਾ ਮਹੀਨੇ ਦੇ ਬਾਕੀ ਦਿਨਾਂ ਵਿੱਚ ਸਿਰਫ਼ ਐਤਵਾਰ ਜਾਂ ਦੂਜੇ ਸ਼ਨੀਵਾਰ (ਬੈਂਕਾਂ ਲਈ) ਦੀਆਂ ਛੁੱਟੀਆਂ ਹੀ ਸਹਾਰਾ ਬਣਨਗੀਆਂ।
Holidays in May: ਘੁੰਮਣ ਦੇ ਪਲਾਨ ਹੋ ਸਕਦੇ ਨੇ ਚੌਪਟ
ਮਈ ਦੇ ਅਖ਼ੀਰ ਵਿੱਚ ਆਉਣ ਵਾਲੀ ਇਹ ਛੁੱਟੀ ਵੀ ਹਫ਼ਤੇ ਦੇ ਵਿਚਕਾਰ ਯਾਨੀ ਬੁੱਧਵਾਰ ਨੂੰ ਪੈ ਰਹੀ ਹੈ, ਜਿਸ ਕਾਰਨ ਲਗਾਤਾਰ 3-4 ਦਿਨਾਂ ਦਾ ਕੋਈ ਲੰਬਾ ਬ੍ਰੇਕ ਮਿਲਣਾ ਮੁਸ਼ਕਿਲ ਜਾਪ ਰਿਹਾ ਹੈ। ਅਜਿਹੇ ਵਿੱਚ ਜੇਕਰ ਤੁਸੀਂ ਕਿਸੇ ਲੰਬੇ ਟੂਰ ਦਾ ਪਲਾਨ ਬਣਾਇਆ ਸੀ, ਤਾਂ ਉਸ ਨੂੰ ਬਦਲਣਾ ਪੈ ਸਕਦਾ ਹੈ ਕਿਉਂਕਿ ਦਫ਼ਤਰਾਂ ਤੋਂ ਵਾਧੂ ਛੁੱਟੀਆਂ ਮਿਲਣਾ ਹਮੇਸ਼ਾ ਚੁਣੌਤੀਪੂਰਨ ਹੁੰਦਾ ਹੈ। ਫਿਲਹਾਲ, ਗਰਮੀ ਦੀਆਂ ਛੁੱਟੀਆਂ ਤੱਕ ਲੋਕਾਂ ਨੂੰ ਇੱਕ-ਇੱਕ ਛੁੱਟੀ ਦੇ ਸਹਾਰੇ ਹੀ ਗੁਜ਼ਾਰਾ ਕਰਨਾ ਪਵੇਗਾ।
Holidays in May: ਬੈਂਕਾਂ ਦਾ ਸ਼ਡਿਊਲ
ਬੈਂਕਾਂ ਦੇ ਕੰਮਕਾਜ ਲਈ ਵੀ ਇਹ ਮਹੀਨਾ ਰੁਝੇਵੇਂ ਭਰਿਆ ਰਹੇਗਾ। ਬੈਂਕਾਂ ਵਿੱਚ 27 ਮਈ ਦੀ ਛੁੱਟੀ ਤੋਂ ਇਲਾਵਾ, ਦੂਜੇ ਅਤੇ ਚੌਥੇ ਸ਼ਨੀਵਾਰ (9 ਮਈ ਅਤੇ 23 ਮਈ) ਨੂੰ ਛੁੱਟੀ ਰਹੇਗੀ। ਇਸ ਤੋਂ ਇਲਾਵਾ ਪੰਜ ਐਤਵਾਰ (3, 10, 17, 24 ਅਤੇ 31 ਮਈ) ਨੂੰ ਬੈਂਕ ਬੰਦ ਰਹਿਣਗੇ। ਖਪਤਕਾਰਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਆਪਣੇ ਸੂਬੇ ਦੇ ਖੇਤਰੀ ਤਿਉਹਾਰਾਂ ਅਨੁਸਾਰ ਬੈਂਕਾਂ ਦੀ ਸੂਚੀ ਜ਼ਰੂਰ ਚੈੱਕ ਕਰ ਲੈਣ, ਕਿਉਂਕਿ ਬੈਂਕਾਂ ਦੀਆਂ ਛੁੱਟੀਆਂ ਸੂਬੇ ਦੇ ਹਿਸਾਬ ਨਾਲ ਵੱਖ-ਵੱਖ ਹੋ ਸਕਦੀਆਂ ਹਨ।
Holidays in May: ਗਜ਼ਟਿਡ ਬਨਾਮ ਰਿਸਟ੍ਰਿਕਟਿਡ ਛੁੱਟੀ
ਅਧਿਕਾਰੀਆਂ ਅਨੁਸਾਰ, ‘ਗਜ਼ਟਿਡ’ ਛੁੱਟੀ ਪੂਰੇ ਦੇਸ਼ ਵਿੱਚ ਲਾਜ਼ਮੀ ਹੁੰਦੀ ਹੈ ਅਤੇ ਸਾਰੇ ਜਨਤਕ ਦਫ਼ਤਰ ਬੰਦ ਰਹਿੰਦੇ ਹਨ। ਇਸ ਦੇ ਉਲਟ, ‘ਰਿਸਟ੍ਰਿਕਟਿਡ’ (ਪ੍ਰਤੀਬੰਧਿਤ) ਛੁੱਟੀ ਵਿਕਲਪਿਕ ਹੁੰਦੀ ਹੈ, ਜਿਸ ਨੂੰ ਮੁਲਾਜ਼ਮ ਆਪਣੀ ਮਰਜ਼ੀ ਅਨੁਸਾਰ ਲੈ ਸਕਦੇ ਹਨ, ਪਰ ਇਸ ਦਿਨ ਦਫ਼ਤਰੀ ਕੰਮਕਾਜ ਆਮ ਵਾਂਗ ਜਾਰੀ ਰਹਿੰਦਾ ਹੈ। ਅਜਿਹੇ ਵਿੱਚ, ਬੱਚਿਆਂ ਦੀਆਂ ਗਰਮੀਆਂ ਦੀਆਂ ਛੁੱਟੀਆਂ ਤੋਂ ਬਿਨਾਂ, ਮਈ ਦਾ ਮਹੀਨਾ ਮੁਲਾਜ਼ਮਾਂ ਲਈ ਕੋਈ ਵੱਡੀ ਰਾਹਤ ਲੈ ਕੇ ਨਹੀਂ ਆ ਰਿਹਾ।
