ਗੁਜਰਾਲ ਚੰਡੀਗੜ੍ਹ ਬਾਰ ਐਸੋਸੀਏਸ਼ਨ ਦੇ ਪ੍ਰਧਾਨ ਬਣੇ

ਚੰਡੀਗੜ੍ਹ ਦੇ ਸੈਕਟਰ 43 ਸਥਿਤ ਜ਼ਿਲ੍ਹਾ ਅਦਾਲਤੀ ਕੰਪਲੈਕਸ ਵਿੱਚ ਲੰਘੇ ਦਿਨ ਜ਼ਿਲ੍ਹਾ ਬਾਰ ਐਸੋਸੀਏਸ਼ਨ ਚੰਡੀਗੜ੍ਹ ਦੀਆਂ ਚੋਣਾਂ ਦੌਰਾਨ ਏ ਐੱਸ ਗੁਜਰਾਲ ਜੇਤੂ ਰਹੇ ਹਨ, ਜਦੋਂ ਕਿ ਅਭੈ ਜੋਸ਼ੀ ਮੀਤ ਪ੍ਰਧਾਨ ਅਤੇ ਤੇਜਵਿੰਦਰ ਸਿੰਘ ਗਿੱਲ ਸਕੱਤਰ ਚੁਣੇ ਗਏ। ਪ੍ਰਧਾਨਗੀ ਦੇ ਅਹੁਦੇ ਲਈ ਏ ਐੱਸ ਗੁਜਰਾਲ ਨੇ 661 ਵੋਟਾਂ ਹਾਸਲ ਕਰਕੇ ਆਪਣੇ ਵਿਰੋਧੀ ਰਵਿੰਦਰ ਸਿੰਘ ਬੱਸੀ (ਜੌਲੀ) ਨੂੰ 197 ਵੋਟਾਂ ਦੇ ਫਰਕ ਨਾਲ ਹਰਾ ਦਿੱਤਾ ਹੈ। ਇਸ ਵਾਰ ਪ੍ਰਧਾਨਗੀ ਦੀ ਚੋਣ ਲਈ ਚਾਰ ਉਮੀਦਵਾਰ ਚੋਣ ਮੈਦਾਨ ਵਿੱਚ ਨਿੱਤਰੇ ਹੋਏ ਸਨ, ਜਿਸ ’ਚ ਰਵਿੰਦਰ ਸਿੰਘ ਬੱਸੀ (ਜੌਲੀ) ਨੂੰ 464, ਗਗਨ ਅਗਰਵਾਲ ਨੂੰ 450 ਅਤੇ ਸੁਨੀਲ ਨਾਰੰਗ ਨੂੰ 327 ਵੋਟਾਂ ਪਈਆਂ। ਇਸੇ ਤਰ੍ਹਾਂ ਮੀਤ ਪ੍ਰਧਾਨ ਦੀ ਚੋਣ ਵਿੱਚ ਅਭੈ ਜੋਸ਼ੀ ਜੇਤੂ ਰਹੇ ਹਨ, ਜਿਨ੍ਹਾਂ ਨੇ ਆਪਣੇ ਵਿਰੋਧੀ ਧਰਮਿੰਦਰ ਸਿੰਘ ਨੂੰ 270 ਵੋਟਾਂ ਦੇ ਫਰਕ ਨਾਲ ਹਰਾ ਦਿੱਤਾ। ਅਭੈ ਜੋਸ਼ੀ ਨੂੰ 1071 ਅਤੇ ਧਰਮਿੰਦਰ ਸਿੰਘ ਨੂੰ 801 ਵੋਟਾਂ ਪਈਆਂ।

ਸਕੱਤਰ ਦੀ ਚੋਣ ਵਿੱਚ ਤੇਜਵਿੰਦਰ ਸਿੰਘ ਗਿੱਲ ਨੇ ਨਰੇਸ਼ ਕੁਮਾਰ ਨੂੰ 414 ਵੋਟਾਂ ਦੇ ਫਰਕ ਨਾਲ ਹਰਾ ਦਿੱਤਾ। ਸ੍ਰੀ ਗਿੱਲ ਨੂੰ 1147 ਅਤੇ ਨਰੇਸ਼ ਕੁਮਾਰ ਨੂੰ 783 ਵੋਟਾਂ ਪਈਆਂ। ਸੰਯੁਕਤ ਸਕੱਤਰ ਦੀ ਚੋਣ ਵਿੱਚ ਪੁਸ਼ਪਿੰਦਰ ਸਿੰਘ 324 ਵੋਟਾਂ ਦੇ ਫਰਕ ਨਾਲ ਜੇਤੂ ਰਹੇ ਹਨ। ਪੁਸ਼ਪਿੰਦਰ ਸਿੰਘ ਨੂੰ 836 ਵੋਟਾਂ, ਸੁਨੀਲ ਕੁਮਾਰ ਪਾਂਡੇ ਨੂੰ 512 ਅਤੇ ਸੁਰਭੀ ਯਾਦਵ ਨੂੰ 485 ਵੋਟਾਂ ਪਈਆਂ।

ਇਸੇ ਤਰ੍ਹਾਂ ਖ਼ਜ਼ਾਨਚੀ ਦੀ ਚੋਣ ਵਿੱਚ ਪ੍ਰਤੀਕ ਗਰਗ ਨੇ ਆਪਣੇ ਵਿਰੋਧੀ ਪੁਨੀਤ ਛਾਬੜਾ ਨੂੰ 176 ਵੋਟਾਂ ਦੇ ਫਰਕ ਨਾਲ ਹਰਾ ਦਿੱਤਾ। ਇਸ ਮੌਕੇ ਪ੍ਰਤੀਕ ਗਰਗ ਨੂੰ 1043 ਵੋਟਾਂ ਤੇ ਪੁਨੀਤ ਛਾਬੜਾ ਨੂੰ 867 ਵੋਟਾਂ ਪਈਆਂ। ਚੋਣ ਦੌਰਾਨ ਕੁੱਲ 2263 ਵੋਟਰਾਂ ਵਿੱਚੋਂ 1945 ਵੋਟਰਾਂ ਨੇ ਵੋਟ ਪਾਈ।

ਲੱਕੀ ਨੇ ਗੁਜਰਾਲ ਤੇ ਜੋਸ਼ੀ ਨੂੰ ਵਧਾਈ ਦਿੱਤੀ

ਜ਼ਿਲ੍ਹਾ ਬਾਰ ਐਸੋਸੀਏਸ਼ਨ ਚੰਡੀਗੜ੍ਹ ਦੇ ਨਵੇਂ ਚੁਣੇ ਗਏ ਪ੍ਰਧਾਨ ਏ ਐੱਸ ਗੁਜਰਾਲ ਅਤੇ ਮੀਤ ਪ੍ਰਧਾਨ ਅਭੈ ਜੋਸ਼ੀ ਜਿੱਤ ਤੋਂ ਬਾਅਦ ਆਪਣੇ ਸਮਰਥਕਾਂ ਨਾਲ ਸੈਕਟਰ 35 ਸਥਿਤ ਕਾਂਗਰਸ ਭਵਨ ਵਿੱਚ ਪਹੁੰਚੇ। ਚੰਡੀਗੜ੍ਹ ਕਾਂਗਰਸ ਦੇ ਪ੍ਰਧਾਨ ਐੱਚ ਐੱਸ ਲੱਕੀ ਨੇ ਸ੍ਰੀ ਗੁਜਰਾਲ ਤੇ ਜੋਸ਼ੀ ਨੂੰ ਵਧਾਈ ਦਿੱਤੀ ਗਈ। ਇਸ ਮੌਕੇ ਜ਼ਿਲ੍ਹਾ ਬਾਰ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਐੱਨ ਕੇ ਨੰਦਾ, ਕਾਂਗਰਸ ਦੀ ਸੀਨੀਅਰ ਆਗੂ ਐਡਵੋਕੇਟ ਨੰਦਿਤਾ ਹੁੱਡਾ, ਜ਼ਿਲ੍ਹਾ ਬਾਰ ਐਸੋਸੀਏਸ਼ਨ ਦੇ ਸਾਬਕਾ ਮੀਤ ਪ੍ਰਧਾਨ ਸੰਦੀਪ ਗੁੱਜਰ ਸਮੇਤ ਕਾਂਗਰਸੀ ਆਗੂ ਤੇ ਵਕੀਲ ਮੌਜੂਦ ਰਹੇ।