ਕੀ ਪੀ ਯੂ ਤੋਂ ਸ਼ੁਰੂ ਹੋਈਆਂ ਬਦਲਾਅ ਦੀਆਂ ਹਵਾਵਾਂ?: ABVP ਦੀ ਜਿੱਤ ’ਤੇ ਭਾਜਪਾ ਆਗੂ ਬੀ.ਐੱਲ. ਸੰਤੋਸ਼ ਵੱਲੋਂ SOI ਦੇ ਸਹਿਯੋਗ ਦੀ ਸ਼ਲਾਘਾ
PU student elections: ਅਕਾਲੀ ਦਲ ਦੇ ਵਿਦਿਆਰਥੀ ਵਿੰਗ (SOI) ਵੱਲੋਂ ਏ.ਬੀ.ਵੀ.ਪੀ. ਉਮੀਦਵਾਰ ਨੂੰ ਦਿੱਤੇ ਗਏ ਸਮਰਥਨ ਨੇ ਇਸ ਗੱਠਜੋੜ ਨੂੰ ਚੋਣਾਂ ਵਿੱਚ ਵੱਡਾ ਲਾਭ ਪਹੁੰਚਾਇਆ
ਕੇਂਦਰ ਦੀ ਸੱਤਾਧਾਰੀ ਪਾਰਟੀ ਭਾਜਪਾ ਨੇ ਸ਼੍ਰੋਮਣੀ ਅਕਾਲੀ ਦਲ ਦੇ ਵਿਦਿਆਰਥੀ ਵਿੰਗ ਦੇ ਸਹਿਯੋਗ ਨਾਲ ਪੰਜਾਬ ਯੂਨੀਵਰਸਿਟੀ ਵਿਦਿਆਰਥੀ ਯੂਨੀਅਨ (PUSU) ਦੀਆਂ ਚੋਣਾਂ ਵਿੱਚ ਏ.ਬੀ.ਵੀ.ਪੀ. (ABVP) ਉਮੀਦਵਾਰ ਦੀ ਜਿੱਤ ਦਾ ਖੁੱਲ੍ਹ ਕੇ ਸਵਾਗਤ ਕੀਤਾ ਹੈ। ਭਾਜਪਾ ਦੇ ਕੌਮੀ ਜਨਰਲ ਸਕੱਤਰ (ਸੰਗਠਨ) ਬੀ.ਐੱਲ. ਸੰਤੋਸ਼ ਨੇ ਪੀ.ਯੂ.ਐੱਸ.ਯੂ. ਪ੍ਰਧਾਨ ਬਣੇ ਅੰਕਿਤ ਬਿਧਾਨ ਦੀ ਇਸ ਲਗਾਤਾਰ ਦੂਜੀ ਸ਼ਾਨਦਾਰ ਜਿੱਤ ਦੀ ਪ੍ਰਸ਼ੰਸਾ ਕੀਤੀ ਹੈ।
ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' ਉੱਤੇ ਆਪਣੀ ਪੋਸਟ ਵਿੱਚ ਉਨ੍ਹਾਂ ਖ਼ਾਸ ਤੌਰ 'ਤੇ ਜ਼ਿਕਰ ਕੀਤਾ ਕਿ ਚੋਣਾਂ ਦੇ ਆਖਰੀ 48 ਘੰਟਿਆਂ ਵਿੱਚ ਅਕਾਲੀ ਦਲ ਦੇ ਵਿਦਿਆਰਥੀ ਵਿੰਗ (SOI) ਵੱਲੋਂ ਏ.ਬੀ.ਵੀ.ਪੀ. ਉਮੀਦਵਾਰ ਨੂੰ ਦਿੱਤੇ ਗਏ ਸਮਰਥਨ ਨੇ ਇਸ ਗੱਠਜੋੜ ਨੂੰ ਚੋਣਾਂ ਵਿੱਚ ਵੱਡਾ ਲਾਭ ਪਹੁੰਚਾਇਆ ਹੈ।
ਸੰਤੋਸ਼ ਨੇ ਐਕਸ (X) 'ਤੇ ਇੱਕ ਪੋਸਟ ਵਿੱਚ ਕਿਹਾ, “ਅੰਕਿਤ ਬਿਧਾਨ ਨੇ ਪੰਜਾਬ ਯੂਨੀਵਰਸਿਟੀ ਵਿਦਿਆਰਥੀ ਯੂਨੀਅਨ ਦੇ ਪ੍ਰਧਾਨ ਦੀਆਂ ਚੋਣਾਂ ਯਕੀਨੀ ਤੌਰ 'ਤੇ ਜਿੱਤ ਲਈਆਂ ਹਨ। ਲਗਾਤਾਰ ਦੂਜੀ ਵਾਰ। ਐੱਸ.ਓ.ਆਈ. (SOI) ਨੇ ਵੀ ਪਿਛਲੇ 48 ਘੰਟਿਆਂ ਵਿੱਚ ਏ.ਬੀ.ਵੀ.ਪੀ. ਉਮੀਦਵਾਰ ਦਾ ਸਮਰਥਨ ਕੀਤਾ ਸੀ।”
ਜਿਸ ਨਾਲ ਉਨ੍ਹਾਂ ਆਰ ਐੱਸ ਐੱਸ ਅਤੇ ਅਕਾਲੀ ਦਲ ਦੇ ਵਿਦਿਆਰਥੀ ਵਿੰਗ ਦੇ ਗੱਠਜੋੜ ਨੂੰ ਚੋਣਾਂ ਵਿੱਚ ਮਿਲੇ ਲਾਭ ਨੂੰ ਸਵੀਕਾਰ ਕੀਤਾ।
ਸੰਤੋਸ਼ ਦੇ ਟਵੀਟ ਨੇ ਇਸ ਘਟਨਾਕ੍ਰਮ ਨੂੰ ਮਹੱਤਵਪੂਰਨ ਬਣਾ ਦਿੱਤਾ ਹੈ। ਭਾਜਪਾ ਦੇ ਹਿੱਸਿਆਂ ਨੇ ਪੀ ਯੂ ਐੱਸ ਯੂ ਚੋਣਾਂ ਵਿੱਚ ਭਾਜਪਾ-ਅਕਾਲੀ ਗਠਜੋੜ ਨੂੰ 2027 ਦੀਆਂ ਪੰਜਾਬ ਚੋਣਾਂ ਵਿੱਚ ਵੱਖ ਹੋਏ ਭਾਈਵਾਲਾਂ ਵਿਚਕਾਰ ਅਜਿਹੇ ਹੀ ਪ੍ਰੀ-ਪੋਲ ਗਠਜੋੜ ਦੇ ਸੰਭਾਵੀ ਪ੍ਰੀਕੁਅਲ (ਪੂਰਵ-ਝਲਕ) ਵਜੋਂ ਇਸ਼ਾਰਾ ਕੀਤਾ ਹੈ।
ABVPs Sri Ankit Bidhan wins the Punjab University Student Union President’s elections convincingly . Second time in a row . SOI also supported ABVP nominee in last 48 hours .
Congratulations to Sri Ankit Bidhan & @ABVPVoice for the stupendous victory .
— B L Santhosh (@blsanthosh) August 31, 2026
ਪੰਜਾਬ ਦੇ ਸਾਬਕਾ ਭਾਜਪਾ ਪ੍ਰਧਾਨ ਸੁਨੀਲ ਜਾਖੜ ਨੇ ਵੀ ਇਸ ਘਟਨਾਕ੍ਰਮ ਦੀ ਸ਼ਲਾਘਾ ਕੀਤੀ।
ਜਾਖੜ ਨੇ ਕਿਹਾ, “ਪੰਜਾਬ ਯੂਨੀਵਰਸਿਟੀ ਤੋਂ ਬਦਲਾਅ ਦੀਆਂ ਹਵਾਵਾਂ ਚੱਲਣ ਲੱਗੀਆਂ ਹਨ। ਲਗਾਤਾਰ ਦੂਜੀ ਵਾਰ ਏ ਬੀ ਵੀ ਪੀ ਨੇ ਵਿਦਿਆਰਥੀ ਚੋਣਾਂ ਵਿੱਚ ਜਿੱਤ ਹਾਸਲ ਕਰਕੇ ਇਤਿਹਾਸ ਰਚ ਦਿੱਤਾ ਹੈ। ਇਹ ਜਿੱਤ ਇੱਕ ਨਵੀਂ ਪੀੜ੍ਹੀ ਦੀ ਨਵੀਂ ਸੋਚ ਦਾ ਪ੍ਰਤੀਕ ਹੈ—ਜੋ ਵਿਕਸਤ ਭਾਰਤ ਦੇ ਸੁਪਨੇ ਨੂੰ ਸਾਕਾਰ ਕਰਨ ਦੇ ਸੰਕਲਪ ਨੂੰ ਪੂਰਾ ਕਰਨ ਲਈ ਆਪਣੇ ਆਪ ਨੂੰ ਸਮਰਪਿਤ ਕਰ ਰਹੀ ਹੈ।”
ਉਨ੍ਹਾਂ ਕਿਹਾ ਕਿ ਅਕਾਲੀ ਦਲ ਦੇ ਵਿਦਿਆਰਥੀ ਵਿੰਗ ਐੱਸ ਓ ਆਈ (SOI) ਨੇ ਇਸ ਜਿੱਤ ਵਿੱਚ ਯੋਗਦਾਨ ਪਾਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ।
