Derabassi illegal industrial colonies scam: ਡੇਰਾਬੱਸੀ ’ਚ ਨਾਜਾਇਜ਼ ਇੰਡਸਟਰੀ ਕਲੋਨੀਆਂ ਕੱਟਣ ਦਾ ਮਾਮਲਾ: ਕਲੋਨਾਈਜ਼ਰ ਦੋਹਰੇ ਢੰਗ ਨਾਲ ਲਾ ਰਹੇ ਨੇ ਸਰਕਾਰ ਨੂੰ ਚੂਨਾ

ਜਾਣਕਾਰੀ ਅਨੁਸਾਰ ਇਹ ਕਲੋਨਾਈਜ਼ਰ ਮਾਲ ਵਿਭਾਗ ਦੇ ਅਧਿਕਾਰੀਆਂ ਨਾਲ ਰਲ ਕੇ ਕਮਰਸ਼ੀਅਲ ਜ਼ਮੀਨ ਨੂੰ ਮੌਕੇ ਦੇ ਪਟਵਾਰੀ ਨਾਲ ਰਲ ਕੇ ਖੇਤੀਬਾੜੀ ਜ਼ਮੀਨ ਦਿਖਾ ਦਿੰਦੇ ਹਨ। ਇਸ ਰਿਪੋਰਟ ਦੇ ਆਧਾਰ ’ਤੇ ਤਹਿਸੀਲਦਾਰ ਵਪਾਰਕ ਜ਼ਮੀਨ ਦੀ ਖੇਤੀਬਾੜੀ ਜ਼ਮੀਨ ਦੇ ਹਿਸਾਬ ਨਾਲ ਰਜਿਸਟਰੀ ਕਰ ਦਿੰਦਾ ਹੈ। ਇਹ ਸਾਰਾ ਖੇਡ ਸਰਕਾਰ ਨੂੰ ਭਰੀ ਜਾਣ ਵਾਲੀ ਸਟੈਂਪ ਡਿਊਟੀ ਦੀ ਚੋਰੀ ਲਈ ਖੇਡਿਆ ਜਾਂਦਾ ਹੈ। ਨਿਯਮ ਮੁਤਾਬਕ ਖੇਤੀਬਾੜੀ ਜ਼ਮੀਨ ਦੀ ਸਟੈਂਪ ਡਿਊਟੀ ਵਪਾਰਕ ਜ਼ਮੀਨ ਦੇ ਮੁਕਾਬਲੇ ਕਾਫ਼ੀ ਘੱਟ ਹੁੰਦੀ ਹੈ।

ਜਾਣਕਾਰੀ ਅਨੁਸਾਰ ਇੱਥੋਂ ਦੀ ਬੇਹੜਾ ਸੜਕ ’ਤੇ ਦਸ ਏਕੜ ਵਿੱਚ ਸਥਿਤ ਬੰਦ ਕੈਮੀਕਲ ਫੈਕਟਰੀ ਵਿੱਚ ਕੱਟੀ ਨਾਜਾਇਜ਼ ਇੰਡਸਟਰੀ ਕਲੋਨੀ ਦੇ ਮਾਮਲੇ ਵਿੱਚ ਵੀ ਅਜਿਹਾ ਫਰਜ਼ੀਵਾੜਾ ਸਾਹਮਣੇ ਆਇਆ ਹੈ। ਕਲੋਨਾਈਜ਼ਰ ਵੱਲੋਂ ਪਹਿਲਾਂ ਫੈਕਟਰੀ ਵਾਲੀ ਵਪਾਰਕ ਜ਼ਮੀਨ ਨੂੰ ਖੇਤੀਬਾੜੀ ਦਿਖਾ ਕੇ ਲੱਖਾਂ ਰੁਪਏ ਸਟੈਂਪ ਡਿਊਟੀ ਚੋਰੀ ਕੀਤੀ ਗਈ। ‘ਪੰਜਾਬੀ ਟ੍ਰਿਬਿਊਨ’ ਕੋਲ ਇਸ ਸਬੰਧੀ ਸਾਰੇ ਦਸਤਾਵੇਜ਼ ਮੌਜੂਦ ਹਨ ਜਿਸ ਵਿੱਚ ਫੈਕਟਰੀ ਦੀ ਜ਼ਮੀਨ ਦੀ ਫ਼ਰਦ ਵਿੱਚ ਪਹਿਲਾਂ ਗ਼ੈਰ-ਮੁਮਕਿਨ ਫੈਕਟਰੀ ਦਰਜ ਹੈ ਪਰ ਬਾਅਦ ਵਿੱਚ ਰਜਿਸਟਰੀ ਕਰਵਾਉਣ ਵੇਲੇ ਇਸ ਨੂੰ ਪਟਵਾਰੀ ਦੀ ਰਿਪੋਰਟ ਦੇ ਆਧਾਰ ’ਤੇ ਖੇਤੀਬਾੜੀ ਦਿਖਾ ਕੇ ਲੱਖਾਂ ਰੁਪਏ ਘੱਟ ਸਟੈਂਪ ਡਿਊਟੀ ਭਰੀ ਗਈ। ਕਲੋਨਾਈਜ਼ਰ ਵੱਲੋਂ ਕੀਤਾ ਗਿਆ ਇਹ ਫਰਜ਼ੀਵਾੜਾ ਇੱਥੇ ਹੀ ਨਹੀਂ ਰੁਕਿਆ ਸਗੋਂ ਇਸ ਮਗਰੋਂ ਇਸ ’ਤੇ ਨਾਜਾਇਜ਼ ਇੰਡਸਟਰੀ ਕਲੋਨੀ ਕੱਟ ਦਿੱਤੀ ਗਈ ਜਦਕਿ ਨਿਯਮ ਮੁਤਾਬਕ ਖੇਤੀਬਾੜੀ ਜ਼ਮੀਨ ਵਿੱਚ ਕਲੋਨੀ ਨਹੀਂ ਕੱਟੀ ਜਾ ਸਕਦੀ।

ਜਾਣਕਾਰੀ ਅਨੁਸਾਰ ਡੇਰਾਬੱਸੀ ਖੇਤਰ ਵਿੱਚ ਇਹ ਖੇਡ ਗਮਾਡਾ ਅਤੇ ਮਾਲ ਵਿਭਾਗ ਦੇ ਅਧਿਕਾਰੀਆਂ ਨਾਲ ਰਲ ਕੇ ਲੰਮੇ ਸਮੇਂ ਤੋਂ ਖੇਡਿਆਂ ਜਾ ਰਿਹਾ ਹੈ। ਮਾਲ ਵਿਭਾਗ ਦੇ ਇੱਕ ਵੱਡੇ ਸੇਵਾਮੁਕਤ ਅਧਿਕਾਰੀ ਨੇ ਆਪਣਾ ਨਾਂ ਨਾ ਛਾਪਣ ਦੀ ਸ਼ਰਤ ਉੱਤੇ ਦੱਸਿਆ ਕਿ ਜੇਕਰ ਇਸ ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਕਰਵਾਈ ਜਾਵੇ ਤਾਂ ਇਸ ਮਾਮਲੇ ਵਿੱਚ ਘੱਟ ਤੋਂ ਘੱਟ 500 ਕਰੋੜ ਰੁਪਏ ਤੋਂ ਵੱਧ ਦਾ ਸਟੈਂਪ ਡਿਊਟੀ ਅਤੇ ਕਲੋਨੀਆਂ ਕੱਟਣ ਦੀ ਫੀਸ ਭਰਨ ਦਾ ਵੱਡਾ ਘੁਟਾਲਾ ਸਾਹਮਣੇ ਆਵੇਗਾ। ਜ਼ਿਕਰਯੋਗ ਹੈ ਕਿ ਡੇਰਾਬੱਸੀ ਵਿੱਚ ਇਸ ਤੋਂ ਪਹਿਲਾਂ ਵੀ ਤਹਿਸੀਲਾਂ ਵਿੱਚ ਜਾਅਲੀ ਐੱਨ ਓ ਸੀ ਲਾ ਕੇ ਰਜਿਸਟਰੀਆਂ ਕਰਵਾਉਣ ਦੇ ਵੱਡੇ ਘੁਟਾਲੇ ਦਾ ਪਰਦਾਫਾਸ਼ ਪੰਜਾਬੀ ਟ੍ਰਿਬਿਊਨ ਵੱਲੋਂ ਕੀਤਾ ਗਿਆ ਸੀ ਜਿਸਦੀ ਬਾਅਦ ਵਿੱਚ ਉੱਚ ਪੱਧਰੀ ਜਾਂਚ ਹੋਣ ਮਗਰੋਂ ਕਈਂ ਵੱਡੇ ਮਗਰਮੱਛ ਸਾਹਮਣੇ ਆਏ ਸਨ ਜਿਨ੍ਹਾਂ ਖ਼ਿਲਾਫ਼ ਅਪਰਾਧਿਕ ਕੇਸ ਦਰਜ ਹੋਣ ਤੋਂ ਇਲਾਵਾ ਵਿਭਾਗੀ ਕਾਰਵਾਈ ਕੀਤੀ ਗਈ ਸੀ।

ਜਾਂਚ ਕਰ ਕੇ ਢੁੱਕਵੀਂ ਕਾਰਵਾਈ ਕਰਾਂਗੇ: ਤਹਿਸੀਲਦਾਰ

ਤਹਿਸੀਲਦਾਰ ਬੀਰਕਰਨ ਸਿੰਘ ਨੇ ਕਿਹਾ ਕਿ ਜੇਕਰ ਕਿਸੇ ਵੱਲੋਂ ਗਲਤ ਰਿਪੋਰਟ ਲਗਾ ਕੇ ਰਜਿਸਟਰੀ ਕਰਵਾਈ ਗਈ ਹੈ ਤਾਂ ਇਸ ਦੀ ਜਾਂਚ ਕਰ ਕੇ ਬਣਦੀ ਕਾਰਵਾਈ ਕੀਤੀ ਜਾਵੇਗੀ ਅਤੇ ਅਜਿਹੀ ਨਾਜਾਇਜ਼ ਕਲੋਨੀਆਂ ਦੀਆਂ ਰਜਿਸਟਰੀਆਂ ਬੰਦ ਕੀਤੀ ਜਾਵੇਗੀ।

ਮਾਮਲੇ ਦੀ ਜਾਂਚ ਜਾਰੀ: ਜੇ ਈ

ਗਮਾਡਾ ਦੇ ਜੇ ਈ ਸ਼ੁਭਕਰਨ ਸਿੰਘ ਨੇ ਕਿਹਾ ਕਿ ਨਾਜਾਇਜ਼ ਕਲੋਨੀਆਂ ਕੱਟਣ ਵਾਲੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਜਿਹੜੀ ਵੀ ਖ਼ਬਰ ਪੰਜਾਬੀ ਟ੍ਰਿਬਿਊਨ ਵੱਲੋਂ ਹੁਣ ਤੱਕ ਪ੍ਰਕਾਸ਼ਿਤ ਕੀਤੀ ਗਈ ਹੈ ਉਸ ਦੀ ਜਾਂਚ ਕਰਨ ਤੋਂ ਇਲਾਵਾ ਸਬੰਧਤ ਕਲੋਨਾਈਜ਼ਰ ਨੂੰ ਨੋਟਿਸ ਕੱਢਿਆ ਗਿਆ ਹੈ।

ਉੱਚ ਪੱਧਰੀ ਜਾਂਚ ਹੋਵੇਗੀ: ਏ ਟੀ ਪੀ

ਗਮਾਡਾ ਦੇ ਏ ਟੀ ਪੀ ਗਗਨਦੀਪ ਸਿੰਘ ਨੇ ਕਿਹਾ ਕਿ ਮਾਮਲਾ ਧਿਆਨ ਵਿੱਚ ਆਉਣ ਮਗਰੋਂ ਇਸ ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਸਬੰਧੀ ਛੇਤੀ ਗਮਾਡਾ ਵਲੋਂ ਪੂਰੀ ਵਿਸਤਾਰ ਤੋਂ ਰਿਪੋਰਟ ਜਾਰੀ ਕਰ ਜਨਤਕ ਕੀਤੀ ਜਾਵੇਗੀ।