ਡੀ ਸੀ ਨੇ ਸਲੱਮ ਖੇਤਰਾਂ ਦੇ ਬੱਚਿਆਂ ਲਈ ਤਨਖਾਹ ਦਿੱਤੀ

ਡਿਪਟੀ ਕਮਿਸ਼ਨਰ ਅੰਬਾਲਾ ਅਤੇ ਜ਼ਿਲ੍ਹਾ ਬਾਲ ਕਲਿਆਣ ਪਰਿਸ਼ਦ ਦੇ ਪ੍ਰਧਾਨ ਅਜੈ ਸਿੰਘ ਤੋਮਰ ਨੇ ਸਲੱਮ ਖੇਤਰਾਂ ਵਿੱਚ ਰਹਿੰਦੇ ਬੱਚਿਆਂ ਦੀ ਭਲਾਈ ਲਈ ਆਪਣੀ ਇਕ ਮਹੀਨੇ ਦੀ ਤਨਖ਼ਾਹ ਦਾਨ ਕਰਨ ਦਾ ਐਲਾਨ ਕੀਤਾ। ਇਹ ਐਲਾਨ ਅੰਬਾਲਾ ਛਾਉਣੀ ਸਥਿਤ ਲਘੂ ਬਾਲ ਭਵਨ ਵਿੱਚ ਨਵੇਂ ਸਾਲ ਦੇ ਮੌਕੇ ਕਰਵਾਏ ਗਏ ‘ਹੈਪੀਨੈੱਸ-ਇਕ ਨਾਇਬ ਕਦਮ’ ਸਮਾਗਮ ਦੌਰਾਨ ਕੀਤਾ ਗਿਆ, ਜਿਸ ਵਿੱਚ ਸਲਮ ਖੇਤਰਾਂ ਦੇ ਬੱਚਿਆਂ ਨੂੰ ਖਾਸ ਤੌਰ ’ਤੇ ਸ਼ਾਮਲ ਕੀਤਾ ਗਿਆ ਸੀ। ਡੀ ਸੀ ਨੇ ਕਿਹਾ ਕਿ ਬੱਚਿਆਂ ਨੂੰ ਸਰਦੀ ਤੋਂ ਬਚਾਉਣ ਲਈ ਜੈਕੇਟਾਂ ਮੁਹੱਈਆ ਕਰਵਾਉਣ ਵਾਸਤੇ ਨਿੱਜੀ ਤੌਰ ’ਤੇ ਆਪਣੀ ਇਕ ਮਹੀਨੇ ਦੀ ਤਨਖ਼ਾਹ ਦਾਨ ਕਰਨ ਦਾ ਫ਼ੈਸਲਾ ਲਿਆ। ਡੀ ਸੀ ਦੇ ਐਲਾਨ ’ਤੇ ਜ਼ਿਲ੍ਹਾ ਬਾਲ ਕਲਿਆਣ ਅਧਿਕਾਰੀ ਵਿਸ਼ਵਾਸ ਮਲਿਕ ਨੇ ਸਾਰੇ ਬੱਚਿਆਂ ਦੇ ਨਾਪ ਲਏ ਅਤੇ 7 ਜਨਵਰੀ ਨੂੰ ਲੋਹੜੀ ਦਾ ਵਿਸ਼ੇਸ਼ ਸਮਾਗਮ ਕਰਵਾਇਆ ਗਿਆ। ਇਸ ਮੌਕੇ ਡਿਪਟੀ ਕਮਿਸ਼ਨਰ ਦੀ ਪਤਨੀ ਆਈ ਏ ਐੱਸ ਸੰਗੀਤਾ ਤੇਤਰਵਾਲ ਅਤੇ ਸ਼ਿਵਾਲਿਕ ਬੋਰਡ ਦੀ ਚੇਅਰਮੈਨ ਪੂਜਾ ਕੁਮਾਰੀ ਨੇ ਬੱਚਿਆਂ ਨਾਲ ਮਿਲ ਕੇ ਲੋਹੜੀ ਮਨਾਈ। ਸਮਾਗਮ ਦੌਰਾਨ ਬੱਚਿਆਂ ਨੂੰ ਜੈਕੇਟਾਂ ਵੰਡੀਆਂ ਗਈਆਂ ਅਤੇ ਮੂੰਗਫ਼ਲੀ, ਰਿਓੜੀਆਂ ਆਦਿ ਭੇਟ ਕਰਕੇ ਖੁਸ਼ੀ ਸਾਂਝੀ ਕੀਤੀ ਗਈ।