Chandigarh Sharjah Flight: ਚੰਡੀਗੜ੍ਹ-ਸ਼ਾਰਜਾਹ ਹਵਾਈ ਉਡਾਣ 26 ਅਕਤੂਬਰ ਤੋਂ ਹੋਵੇਗੀ ਸ਼ੁਰੂ
Chandigarh Airport Flights: ਸਾਢੇ ਚਾਰ ਘੰਟੇ ਦੀ ਉਡਾਣ ਦੀ ਕਿਰਾਇਆ ਲਗਪਗ 18 ਹਜ਼ਾਰ ਰੁਪਏ; ਤਿੰਨ ਸਾਲਾਂ ਦੇ ਵਕਫੇ ਬਾਅਦ ਮੁੜ ਸ਼ੁਰੂ ਹੋਈ ਉਡਾਣ; ਮੁਹਾਲੀ ਹਵਾਈ ਅੱਡੇ ਤੋਂ ਕੌਮਾਂਤਰੀ ਉਡਾਣਾਂ ਦੀ ਗਿਣਤੀ ਤਿੰਨ ਹੋਈ
Chandigarh Sharjah Flight: ਤਿੰਨ ਸਾਲਾਂ ਦੇ ਲੰਬੇ ਵਕਫ਼ੇ ਤੋਂ ਬਾਅਦ ਚੰਡੀਗੜ੍ਹ-ਸ਼ਾਰਜਾਹ ਫਲਾਈਟ ਇਸ ਸਾਲ 26 ਅਕਤੂਬਰ ਤੋਂ ਮੁੜ ਸ਼ੁਰੂ ਹੋਣ ਜਾ ਰਹੀ ਹੈ, ਜਿਸ ਨਾਲ ਤਿਉਹਾਰਾਂ ਦੇ ਸੀਜ਼ਨ ਤੋਂ ਪਹਿਲਾਂ ਟਰਾਈਸਿਟੀ ਦੇ ਲੋਕਾਂ ਵਿੱਚ ਖ਼ੁਸ਼ੀ ਦੀ ਲਹਿਰ ਹੈ। ਇਹ 4 ਘੰਟੇ 30 ਮਿੰਟ ਦੀ ਨਾਨ-ਸਟਾਪ ਉਡਾਣ ਹਫ਼ਤੇ ਵਿੱਚ ਚਾਰ ਦਿਨ (ਸੋਮਵਾਰ, ਮੰਗਲਵਾਰ, ਵੀਰਵਾਰ ਅਤੇ ਸ਼ਨਿਚਰਵਾਰ) ਚੱਲੇਗੀ ਅਤੇ ਇਸ ਦਾ ਕਿਰਾਇਆ ਲਗਪਗ 18,000 ਰੁਪਏ ਹੋਵੇਗਾ।
ਚੰਡੀਗੜ੍ਹ ਦੇ ਸ਼ਹੀਦ ਭਗਤ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ (IXC) ਤੋਂ ਇਸ ਫਲਾਈਟ ਦੇ ਰਵਾਨਾ ਹੋਣ ਦਾ ਸਮਾਂ ਦੁਪਹਿਰ 1:50 ਵਜੇ ਹੋਵੇਗਾ ਅਤੇ ਇਹ ਸ਼ਾਰਜਾਹ ਅੰਤਰਰਾਸ਼ਟਰੀ ਹਵਾਈ ਅੱਡੇ (SHJ) ਵਿਖੇ ਸ਼ਾਮ 4:50 ਵਜੇ ਪਹੁੰਚੇਗੀ। ਵਾਪਸੀ 'ਤੇ ਇਹ ਫਲਾਈਟ ਸ਼ਾਰਜਾਹ ਤੋਂ ਸ਼ਾਮ 5:50 ਵਜੇ ਚੱਲ ਕੇ 3 ਘੰਟੇ 45 ਮਿੰਟ ਦੇ ਸਫ਼ਰ ਬਾਅਦ ਰਾਤ 11:05 ਵਜੇ ਇੱਥੇ ਪਹੁੰਚੇਗੀ। ਹਾਲਾਂਕਿ, ਸ਼ਾਰਜਾਹ ਤੋਂ ਚੰਡੀਗੜ੍ਹ ਆਉਣ ਵਾਲੀ ਫਲਾਈਟ ਦਾ ਕਿਰਾਇਆ ਜਾਣ ਵਾਲੀ ਫਲਾਈਟ ਨਾਲੋਂ ਵੱਧ ਹੈ।
ਸ਼ਹੀਦ ਭਗਤ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਚੱਲਣ ਵਾਲੀਆਂ ਇਨ੍ਹਾਂ ਚੰਡੀਗੜ੍ਹ-ਸ਼ਾਰਜਾਹ ਉਡਾਣਾਂ ਨੂੰ 27 ਅਕਤੂਬਰ 2023 ਨੂੰ ਬੰਦ ਕਰ ਦਿੱਤਾ ਗਿਆ ਸੀ। ਉਦੋਂ ਹਫ਼ਤੇ ਵਿੱਚ ਤਿੰਨ ਵਾਰ ਚੱਲਣ ਵਾਲੀ ਇਸ 360 ਸੀਟਾਂ (180-180) ਵਾਲੀ ਫਲਾਈਟ ਦੀ ਭਾਰੀ ਮੰਗ ਸੀ, ਪਰ ਏਅਰਲਾਈਨ ਵੱਲੋਂ ਬਿਨਾਂ ਕੋਈ ਕਾਰਨ ਦੱਸਿਆਂ ਇਸ ਨੂੰ ਬੰਦ ਕਰ ਦਿੱਤਾ ਗਿਆ ਸੀ। ਇਸ ਵਾਰ, ਈਂਧਨ ਦੀਆਂ ਕੀਮਤਾਂ ਵਿੱਚ ਹੋਏ ਭਾਰੀ ਵਾਧੇ ਕਾਰਨ ਇਹ ਫਲਾਈਟ ਪਹਿਲਾਂ ਨਾਲੋਂ ਕਾਫ਼ੀ ਮਹਿੰਗੇ ਕਿਰਾਏ 'ਤੇ ਦੁਬਾਰਾ ਬਹਾਲ ਕੀਤੀ ਗਈ ਹੈ।
ਇਸ ਨਵੇਂ ਵਾਧੇ ਨਾਲ ਚੰਡੀਗੜ੍ਹ ਹਵਾਈ ਅੱਡੇ ਤੋਂ ਹੁਣ ਕੁੱਲ ਤਿੰਨ ਅੰਤਰਰਾਸ਼ਟਰੀ ਰੂਟ ਸੰਚਾਲਿਤ ਹੋਣਗੇ: ਦੁਬਈ (ਇੰਡੀਗੋ), ਅਬੂ ਧਾਬੀ (ਇੰਡੀਗੋ), ਅਤੇ ਹੁਣ ਸ਼ਾਰਜਾਹ (ਏਅਰ ਇੰਡੀਆ ਐਕਸਪ੍ਰੈਸ)।
ਚੰਡੀਗੜ੍ਹ ਹਵਾਈ ਅੱਡੇ ਨੂੰ ‘ਪੁਆਇੰਟ ਆਫ ਕਾਲ’ ਸੂਚੀ ’ਚ ਸ਼ਾਮਲ ਕਰਨ ਦੀ ਮੰਗ
