ਕਲਾਗ੍ਰਾਮ ’ਚ ਚੰਡੀਗੜ੍ਹ ਰਾਸ਼ਟਰੀ ਸ਼ਿਲਪ ਮੇਲਾ ਸ਼ੁਰੂ
ਮੁੱਖ ਸਕੱਤਰ ਐੱਚ ਪ੍ਰਸਾਦ ਨੇ ਮੇਲੇ ਦਾ ਰਸਮੀ ਉਦਘਾਟਨ ਕੀਤਾ
ਕਲਾਗ੍ਰਾਮ ਵਿੱਚ 15ਵੇਂ ਚੰਡੀਗੜ੍ਹ ਰਾਸ਼ਟਰੀ ਸ਼ਿਲਪ ਮੇਲਾ ਅੱਜ ਪੂਰੇ ਜੋਸ਼ ਅਤੇ ਉਤਸ਼ਾਹ ਨਾਲ ਸ਼ੁਰੂ ਹੋ ਗਿਆ। ਮੇਲੇ ਦਾ ਰਸਮੀ ਉਦਘਾਟਨ ਯੂ ਟੀ ਚੰਡੀਗੜ੍ਹ ਦੇ ਮੁੱਖ ਸਕੱਤਰ ਐੱਚ ਪ੍ਰਸਾਦ ਆਈ ਏ ਐੱਸ ਨੇ ਖ਼ੁਦ ਰਵਾਇਤੀ ਸਾਜ਼ ‘ਨਗਾਰਾ’ ਵਜਾ ਕੇ ਕੀਤਾ। ਇਸ ਮੌਕੇ ਵਿੱਤ ਸਕੱਤਰ ਦੀਪਰਵਾ ਲਾਕੜਾ, ਸਕੱਤਰ ਪ੍ਰਸੋਨਲ ਸਵਪਨਿਲ ਐੱਮ ਨਾਇਕ, ਡਿਪਟੀ ਕਮਿਸ਼ਨਰ ਨਿਸ਼ਾਂਤ ਕੁਮਾਰ ਯਾਦਵ, ਡਾਇਰੈਕਟਰ ਸੱਭਿਆਚਾਰ ਸੌਰਭ ਅਰੋੜਾ ਅਤੇ ਚੰਡੀਗੜ੍ਹ ਪ੍ਰਸ਼ਾਸਨ ਦੇ ਹੋਰ ਸੀਨੀਅਰ ਅਧਿਕਾਰੀ ਵੀ ਮੌਜੂਦ ਸਨ।
ਉੱਤਰੀ ਜ਼ੋਨ ਸੱਭਿਆਚਾਰਕ ਕੇਂਦਰ ਅਤੇ ਚੰਡੀਗੜ੍ਹ ਪ੍ਰਸ਼ਾਸਨ ਵੱਲੋਂ ਸਾਂਝੇ ਤੌਰ ’ਤੇ ਕਰਵਾਏ ਜਾ ਰਹੇ ਇਸ ਮੇਲੇ ਵਿੱਚ 22 ਰਾਜਾਂ ਦੇ 400 ਤੋਂ ਵੱਧ ਕਾਰੀਗਰਾਂ ਅਤੇ ਲੋਕ ਕਲਾਕਾਰਾਂ ਸ਼ਿਰਕਤ ਕਰ ਰਹੇ ਹਨ।
ਮੁੱਖ ਸਕੱਤਰ ਨੇ ਪੰਜਾਬ ਅਤੇ ਰਾਜਸਥਾਨ ਦੀਆਂ ਵਾਸਤੂ-ਕਲਾ ਪ੍ਰੇਰਨਾਵਾਂ ’ਤੇ ਅਧਾਰਿਤ ਸੁੰਦਰ ਸਜਾਵਟ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਸ਼ਹਿਰ ਵਾਸੀਆਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਪਰਿਵਾਰਾਂ ਅਤੇ ਦੋਸਤਾਂ ਨਾਲ ਮੇਲੇ ਵਿੱਚ ਆਉਣ ਅਤੇ ਸਥਾਨਕ ਕਾਰੀਗਰਾਂ ਵੱਲੋਂ ਬਣਾਏ ਗਏ ਦਸਤਕਾਰੀ ਉਤਪਾਦਾਂ ਨੂੰ ਉਤਸ਼ਾਹਿਤ ਕਰਨ ਵਿੱਚ ਭਾਈਵਾਲ ਬਣਨ। ਕਲਾਗ੍ਰਾਮ ਮੈਦਾਨ ਲਗਭਗ ਤਿੰਨ ਦਰਜਨ ਰਵਾਇਤੀ ਸੰਗੀਤਕ ਯੰਤਰਾਂ ਦੀਆਂ ਵਿਲੱਖਣ ਧੁਨਾਂ ਨਾਲ ਗੂੰਜ ਉੱਠਿਆ।
ਰਾਜਸਥਾਨ, ਕਸ਼ਮੀਰ, ਹਿਮਾਚਲ ਪ੍ਰਦੇਸ਼, ਉਤਰਾਖੰਡ ਅਤੇ ਛੱਤੀਸਗੜ੍ਹ ਸਮੇਤ ਵੱਖ-ਵੱਖ ਰਾਜਾਂ ਦੇ ਲੋਕ ਯੰਤਰਾਂ ਦੇ ਪ੍ਰਦਰਸ਼ਨ ਨੇ ਇੱਕ ਮਨਮੋਹਕ ਸੰਗੀਤਕ ਮਾਹੌਲ ਬਣਾਇਆ। ਪ੍ਰਸਿੱਧ ਕੋਰੀਓਗ੍ਰਾਫਰ ਸੁਸ਼ੀਲ ਸ਼ਰਮਾ ਵੱਲੋਂ ਨਿਰਦੇਸ਼ਿਤ ਵੱਖ-ਵੱਖ ਰਾਜਾਂ ਦੇ ਲਗਭਗ ਅੱਧਾ ਦਰਜਨ ਲੋਕ ਨਾਚਾਂ ਦੀ ਇੱਕ ਸੁੰਦਰ ਪੇਸ਼ਕਾਰੀ ਨੂੰ ਦਰਸ਼ਕਾਂ ਵੱਲੋਂ ਬਹੁਤ ਪ੍ਰਸ਼ੰਸਾ ਮਿਲੀ।
