Chandigarh MC Elections: ਚੋਣ ਕਮਿਸ਼ਨ ਨੇ ਵਾਰਡ ਰਾਖਵੇਂਕਰਨ ਦਾ ਕੀਤਾ ਐਲਾਨ
ਰਾਖਵੇਂਕਰਨ ਦੇ ਨਾਲ ਬਹੁਤ ਸਾਰੇ ਮੌਜੂਦਾ ਕੌਂਸਲਰਾਂ ਨੂੰ ਚੋਣ ਲੜਨ ਲਈ ਦੂਜੇ ਵਾਰਡਾਂ ਦੀ ਕਰਨੀ ਪਵੇਗੀ ਚੋਣ
ਰਾਜ ਚੋਣ ਕਮਿਸ਼ਨ ਨੇ ਅੱਜ ਸਾਲ ਦੇ ਅਖੀਰ ਵਿੱਚ ਹੋਣ ਵਾਲੀਆਂ ਨਗਰ ਨਿਗਮ ਦੀਆਂ ਚੋਣਾਂ ਲਈ ਵਾਰਡਾਂ ਦੇ ਰਾਖਵੇਂਕਰਨ ਦਾ ਐਲਾਨ ਕਰ ਦਿੱਤਾ ਹੈ।
ਇਹ ਵਾਰਡ ਰਾਜ ਚੋਣ ਕਮਿਸ਼ਨ ਵੱਲੋਂ ਯੂਟੀ ਗੈਸਟ ਹਾਊਸ ਵਿਖੇ ਰਾਜਨੀਤਿਕ ਪਾਰਟੀਆਂ ਦੇ ਨੁਮਾਇੰਦਿਆਂ ਦੀ ਮੌਜੂਦਗੀ ਵਿੱਚ ਕਰਵਾਏ ਗਏ ਡਰਾਅ ਰਾਹੀਂ ਰਾਖਵੇਂ ਕੀਤੇ ਗਏ ਸਨ।
2011 ਦੀ ਮਰਦਮਸ਼ੁਮਾਰੀ ਅਨੁਸਾਰ ਹਰੇਕ ਵਾਰਡ ਵਿੱਚ ਅਨੁਸੂਚਿਤ ਜਾਤੀਆਂ ਦੀ ਆਬਾਦੀ ਦੇ ਉੱਚ ਪ੍ਰਤੀਸ਼ਤ ਦੇ ਆਧਾਰ 'ਤੇ ਵਾਰਡ ਨੰਬਰ 1, 3, 4, 9, 15, 29 ਅਤੇ 32 ਅਨੁਸੂਚਿਤ ਜਾਤੀਆਂ (ਐੱਸ ਸੀ) ਲਈ ਰਾਖਵੇਂ ਰੱਖੇ ਗਏ ਹਨ। ਇਨ੍ਹਾਂ ਸੱਤ ਵਾਰਡਾਂ ਵਿੱਚੋਂ, ਤਿੰਨ - 29, 3 ਅਤੇ 32 - ਅਨੁਸੂਚਿਤ ਜਾਤੀਆਂ ਦੀਆਂ ਔਰਤਾਂ ਲਈ ਰਾਖਵੇਂ ਰੱਖੇ ਗਏ ਹਨ।
ਰੋਟੇਸ਼ਨ ਨੀਤੀ ਦੀ ਪਾਲਣਾ ਕਰਦਿਆਂ, 2021 ਦੀਆਂ ਨਿਗਮ ਚੋਣਾਂ ਦੌਰਾਨ ਐੱਸ ਸੀ ਉਮੀਦਵਾਰਾਂ ਲਈ ਰਾਖਵੇਂ ਰੱਖੇ ਗਏ ਸੱਤ ਵਾਰਡ ਇਸ ਸਾਲ ਬਾਹਰ ਰੱਖੇ ਗਏ ਹਨ। ਸਾਲ 2021 ਵਿੱਚ, ਚੋਣ ਵਾਰਡ ਨੰਬਰ 7, 16, 19, 24, 26, 28 ਅਤੇ 31 ਐੱਸ ਸੀ ਸ਼੍ਰੇਣੀ ਲਈ ਰਾਖਵੇਂ ਸਨ। ਇਸ ਤੋਂ ਇਲਾਵਾ ਕੁੱਲ 12 ਵਾਰਡ ਮਹਿਲਾ ਉਮੀਦਵਾਰਾਂ ਲਈ ਰਾਖਵੇਂ ਕੀਤੇ ਗਏ ਹਨ।
12 ਵਾਰਡਾਂ ਵਿੱਚੋਂ 9 ਵਾਰਡ 17, 21, 13, 25, 30, 2, 8, 11 ਅਤੇ 26 ਜਨਰਲ ਸ਼੍ਰੇਣੀ ਦੀਆਂ ਮਹਿਲਾਵਾਂ ਲਈ ਅਤੇ ਤਿੰਨ ਵਾਰਡ 29, 3 ਅਤੇ 32 ਐੱਸ ਸੀ ਮਹਿਲਾ ਸ਼੍ਰੇਣੀ ਲਈ ਰਾਖਵੇਂ ਹਨ।
ਜਿਹੜੇ ਵਾਰਡ 2021 ਦੀਆਂ ਚੋਣਾਂ ਵਿੱਚ ਮਹਿਲਾਵਾਂ ਲਈ ਰਾਖਵੇਂ ਸਨ, ਉਨ੍ਹਾਂ ਨੂੰ ਡਰਾਅ ਤੋਂ ਬਾਹਰ ਰੱਖਿਆ ਗਿਆ ਸੀ।
ਰਾਖਵੇਂਕਰਨ ਦੇ ਨਾਲ ਬਹੁਤ ਸਾਰੇ ਮੌਜੂਦਾ ਕੌਂਸਲਰਾਂ ਨੂੰ ਚੋਣ ਲੜਨ ਲਈ ਦੂਜੇ ਵਾਰਡਾਂ ਦੀ ਚੋਣ ਕਰਨੀ ਪਵੇਗੀ।
