Chandigah 3 SPs Transfer: ਕੇਂਦਰ ਸਰਕਾਰ ਵੱਲੋਂ AGMUT ਕਾਡਰ ਦੇ ਅਫ਼ਸਰਾਂ ਦੇ ਤਬਾਦਲੇ
ਚੰਡੀਗੜ੍ਹ ਅਫਸਰਾਂ ਦੇ ਤਬਾਦਲੇ ਦਿੱਲੀ ਅਤੇ ਜੰਮੂ-ਕਸ਼ਮੀਰ ਕਰ ਦਿੱਤੇ ਗਏ ਹਨ
ਚੰਡੀਗੜ੍ਹ ਪੁਲੀਸ ਦੇ ਸੀਨੀਅਰ ਅਧਿਕਾਰੀਆਂ ਵਿੱਚ ਵੱਡਾ ਫੇਰਬਦਲ ਦੇਖਣ ਨੂੰ ਮਿਲੇਗਾ। ਕੇਂਦਰ ਸਰਕਾਰ ਨੇ ਵੀਰਵਾਰ ਨੂੰ ਇੱਕ ਹੁਕਮ ਜਾਰੀ ਕਰਕੇ ਚੰਡੀਗੜ੍ਹ ਵਿੱਚ ਤਾਇਨਾਤ ਤਿੰਨ ਸੁਪਰਡੈਂਟ ਆਫ਼ ਪੁਲੀਸ (SPs) ਦਾ ਤਬਾਦਲਾ ਕਰ ਦਿੱਤਾ ਹੈ, ਜਦਕਿ ਉਨ੍ਹਾਂ ਦੀ ਜਗ੍ਹਾ ਦੋ ਨਵੇਂ ਆਈ.ਪੀ.ਐੱਸ. (IPS) ਅਫ਼ਸਰਾਂ ਨੂੰ ਚੰਡੀਗੜ੍ਹ ਤਾਇਨਾਤ ਕੀਤਾ ਹੈ। ਇਹ ਕਾਰਵਾਈ ਕੇਂਦਰ ਵੱਲੋਂ AGMUT ਕਾਡਰ ਦੇ ਅਫ਼ਸਰਾਂ ਦੇ ਕੀਤੇ ਗਏ ਵੱਡੇ ਫੇਰਬਦਲ ਦਾ ਹਿੱਸਾ ਹੈ।
ਗ੍ਰਹਿ ਮੰਤਰਾਲੇ (MHA) ਦੇ ਹੁਕਮਾਂ ਮੁਤਾਬਕ, ਚੰਡੀਗੜ੍ਹ ਤੋਂ ਬਦਲੇ ਗਏ ਅਫ਼ਸਰਾਂ ਵਿੱਚ 2015 ਬੈਚ ਦੇ ਆਈ.ਪੀ.ਐੱਸ. ਮਨਜੀਤ, 2015 ਬੈਚ ਦੀ ਗੀਤਾਂਜਲੀ ਖੰਡੇਲਵਾਲ ਅਤੇ 2021 ਬੈਚ ਦੀ ਕੇ. ਐੱਮ. ਪ੍ਰਿਯੰਕਾ ਸ਼ਾਮਲ ਹਨ। ਇਨ੍ਹਾਂ ਦੀ ਜਗ੍ਹਾ 'ਤੇ 2014 ਬੈਚ ਦੇ ਆਈ.ਪੀ.ਐੱਸ. ਰਾਜੇਸ਼ ਕੁਮਾਰ ਸ਼ਰਮਾ ਨੂੰ ਜੰਮੂ-ਕਸ਼ਮੀਰ ਤੋਂ ਅਤੇ 2018 ਬੈਚ ਦੇ ਆਈ.ਪੀ.ਐੱਸ. ਵਿਨੀਤ ਕੁਮਾਰ ਨੂੰ ਦਿੱਲੀ ਤੋਂ ਚੰਡੀਗੜ੍ਹ ਬਦਲਿਆ ਗਿਆ ਹੈ। ਤਿੰਨ ਅਫ਼ਸਰਾਂ ਦੇ ਜਾਣ ਅਤੇ ਸਿਰਫ਼ ਦੋ ਦੇ ਆਉਣ ਕਾਰਨ ਫਿਲਹਾਲ ਚੰਡੀਗੜ੍ਹ ਪੁਲੀਸ ਵਿੱਚ ਇੱਕ ਆਈ.ਪੀ.ਐੱਸ. ਅਫ਼ਸਰ ਦੀ ਕਮੀ ਹੋ ਗਈ ਹੈ।
ਕਿਹੜੇ ਅਫ਼ਸਰ ਕੋਲ ਕਿਹੜਾ ਵਿਭਾਗ ਸੀ:
ਆਈ.ਪੀ.ਐੱਸ. ਮਨਜੀਤ: ਇਹ ਚੰਡੀਗੜ੍ਹ ਵਿੱਚ ਹੈੱਡਕੁਆਰਟਰ, ਇਕਨਾਮਿਕ ਅਫ਼ੈਂਸ ਵਿੰਗ (EOW), ਕ੍ਰਾਈਮ ਅਤੇ ਕਮਿਊਨੀਕੇਸ਼ਨ ਵਿਭਾਗ ਦੇਖ ਰਹੇ ਸਨ, ਜਿਨ੍ਹਾਂ ਨੂੰ ਹੁਣ ਦਿੱਲੀ ਭੇਜ ਦਿੱਤਾ ਗਿਆ ਹੈ।
ਆਈ.ਪੀ.ਐੱਸ. ਗੀਤਾਂਜਲੀ ਖੰਡੇਲਵਾਲ: ਇਹ ਅਪਰੇਸ਼ਨਜ਼, ਸਾਈਬਰ ਕ੍ਰਾਈਮ ਅਤੇ ਵਿਜੀਲੈਂਸ ਵਿਭਾਗ ਦੀ ਇੰਚਾਰਜ ਸਨ, ਇਨ੍ਹਾਂ ਦਾ ਤਬਾਦਲਾ ਵੀ ਦਿੱਲੀ ਕੀਤਾ ਗਿਆ ਹੈ।
ਆਈ.ਪੀ.ਐੱਸ. ਕੇ. ਐੱਮ. ਪ੍ਰਿਯੰਕਾ: ਇਹ ਸਿਟੀ, ਵੂਮੈਨ ਐਂਡ ਚਾਈਲਡ ਸਪੋਰਟ ਹੈਲਪਲਾਈਨ ਅਤੇ ਇੰਟੈਲੀਜੈਂਸ ਵਿਭਾਗ ਦੀ ਜ਼ਿੰਮੇਵਾਰੀ ਸਾਂਭ ਰਹੇ ਸਨ, ਜਿਨ੍ਹਾਂ ਨੂੰ ਹੁਣ ਜੰਮੂ-ਕਸ਼ਮੀਰ ਭੇਜਿਆ ਗਿਆ ਹੈ।
ਇਹ ਤਬਾਦਲੇ AGMUT (ਅਰੁਣਾਚਲ ਪ੍ਰਦੇਸ਼-ਗੋਆ-ਮਿਜ਼ੋਰਮ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼) ਕਾਡਰ ਦੇ ਆਈ.ਏ.ਐੱਸ. (IAS) ਅਤੇ ਆਈ.ਪੀ.ਐੱਸ. (IPS) ਅਫ਼ਸਰਾਂ ਦੇ ਵੱਡੇ ਫੇਰਬਦਲ ਤਹਿਤ ਕੀਤੇ ਗਏ ਹਨ। ਗ੍ਰਹਿ ਮੰਤਰਾਲੇ ਨੇ ਵੀਰਵਾਰ ਨੂੰ ਇੱਕੋ ਵਾਰ 21 ਆਈ.ਏ.ਐੱਸ. ਅਤੇ 40 ਆਈ.ਪੀ.ਐੱਸ. ਅਫ਼ਸਰਾਂ ਦੇ ਤਬਾਦਲੇ ਕੀਤੇ ਹਨ। ਇਨ੍ਹਾਂ ਵਿੱਚ ਦਿੱਲੀ, ਚੰਡੀਗੜ੍ਹ, ਜੰਮੂ-ਕਸ਼ਮੀਰ, ਅਰੁਣਾਚਲ ਪ੍ਰਦੇਸ਼, ਗੋਆ, ਮਿਜ਼ੋਰਮ, ਪੁਡੂਚੇਰੀ, ਲਦਾਖ, ਲਕਸ਼ਦੀਪ, ਅੰਡੇਮਾਨ-ਨਿਕੋਬਾਰ ਅਤੇ ਦਾਦਰਾ ਤੇ ਨਗਰ ਹਵੇਲੀ ਸਮੇਤ ਕਈ ਖੇਤਰ ਸ਼ਾਮਲ ਹਨ। ਇਹ ਹੁਕਮ ਤੁਰੰਤ ਪ੍ਰਭਾਵ ਨਾਲ ਲਾਗੂ ਕਰ ਦਿੱਤੇ ਗਏ ਹਨ।
