Ashu Upneja: ਡੇਰਾਬੱਸੀ ਕੌਂਸਲ: ਆਸ਼ੂ ਦੂਜੀ ਵਾਰ ਪ੍ਰਧਾਨ ਬਣੀ

ਕੌਂਸਲ ਦਫਤਰ ਵਿੱਚ ਰਿਟਰਨਿੰਗ ਅਫ਼ਸਰ-ਕਮ-ਐੱਸ ਡੀ ਐੱਮ ਡੇਰਾਬੱਸੀ ਅਮਿਤ ਗੁਪਤਾ ਦੀ ਨਿਗਰਾਨੀ ਹੇਠ ਆਸ਼ੂ ਉਪਨੇਜਾ ਨੂੰ ਨਗਰ ਕੌਂਸਲ ਦੀ ਦੂਜੀ ਵਾਰ ਪ੍ਰਧਾਨ ਅਤੇ ਦਵਿੰਦਰ ਸੈਣੀ ਨੂੰ ਮੀਤ ਪ੍ਰਧਾਨ ਚੁਣਿਆ ਗਿਆ।

ਜਾਣਕਾਰੀ ਅਨੁਸਾਰ ਪ੍ਰਧਾਨ ਦੀ ਚੋਣ ਲਈ ਮੀਟਿੰਗ ਵਿੱਚ ਸੱਤਾ ਧਿਰ ਦੇ 12, ਤਿੰਨ ਅਕਾਲੀ ਦਲ, ਦੋ ਕਾਂਗਰਸ ਅਤੇ ਦੋ ਭਾਜਪਾ ਦੇ ਕੌਂਸਲਰ ਹਾਜ਼ਰ ਸਨ। ਵਾਰਡ ਨੰਬਰ 19 ਤੋਂ ਕੌਂਸਲਰ ਹਰਜੀਤ ਕੌਰ ਨੇ ਆਸ਼ੂ ਉਪਨੇਜਾ ਦਾ ਨਾਂਅ ਪੇਸ਼ ਕੀਤਾ, ਸੱਤਾਧਾਰੀ ਧਿਰ ਦੇ ਕੌਂਸਲਰਾਂ ਨੇ ਤਾਇਦ ਕੀਤਾ। ‘ਆਪ’ ਦੀ ਕੌਂਸਲਰ ਦਵਿੰਦਰ ਸੈਣੀ ਨੂੰ ਮੀਤ ਪ੍ਰਧਾਨ ਐਲਾਨਿਆ ਗਿਆ।

ਦੂਜੇ ਪਾਸੇ, ਵਿਰੋਧੀ ਧਿਰ ਦੇ ਕੌਂਸਲਰ ਭੁਪਿੰਦਰ ਸਿੰਘ ਸੈਣੀ, ਮੋਨਿਕਾ ਮੋਦਗਿਲ, ਰਾਧਿਕਾ ਭੱਲਾ, ਰਣਜੀਤ ਸਿੰਘ ਰੈਡੀ ਸਣੇ ਹੋਰਨਾਂ ਨੇ ਦੱਸਿਆ ਕਿ ਚੋਣ ਦੌਰਾਨ ਨਿਯਮਾਂ ਦੀ ਧੱਜੀਆਂ ਉੱਡਾਈਆਂ ਗਈਆਂ। ਵਾਰਡ ਨੰਬਰ 19 ਦੀ ਕੌਂਸਲਰ ਹਰਜੀਤ ਕੌਰ ਵੱਲੋਂ ਪ੍ਰਧਾਨ ਲਈ ਆਸ਼ੂ ਉਪਨੇਜਾ ਦਾ ਨਾਂਅ ਪੇਸ਼ ਕੀਤਾ ਪਰ ਕਿਸੇ ਵੀ ਸੱਤਾਧਾਰੀ ਧਿਰ ਵੱਲੋਂ ਤਾਇਦ ਨਹੀਂ ਕੀਤਾ। ਸੀਨੀਅਰ ਮੀਤ ਪ੍ਰਧਾਨ ਲਈ ਸੱਤਾਧਾਰੀ ਧਿਰ ਵੱਲੋਂ ਦਵਿੰਦਰ ਸਿੰਘ ਸੈਣੀ ਦਾ ਨਾਂਅ ਪੇਸ਼ ਕੀਤਾ ਜਦੋਂਕਿ ਵਿਰੋਧੀ ਧਿਰ ਵੱਲੋਂ ਰਾਧਿਕਾ ਭੱਲਾ ਦਾ ਨਾਂਅ ਪੇਸ਼ ਕੀਤਾ ਗਿਆ। ਸ੍ਰੀ ਸੈਣੀ ਨੂੰ 12 ਅਤੇ ਰਾਧਿਕਾ ਭੱਲਾ ਨੂੰ ਸੱਤ ਵੋਟਾਂ ਪਈਆਂ। ਨਗਰ ਕੌਂਸਲ ਦੇ ਕਾਨੂੰਨ ਮੁਤਾਬਕ ਸੀਨੀਅਰ ਮੀਤ ਪ੍ਰਧਾਨ ਦੀ ਚੋਣ ਹਾਰਨ ਵਾਲੀ ਰਾਧਿਕਾ ਭੱਲਾ ਨੂੰ ਮੀਤ ਪ੍ਰਧਾਨ ਬਣਾਉਣਾ ਚਾਹੀਦਾ ਹੈ ਪਰ ਰਿਟਰਨਿੰਗ ਅਫਸਰ ਨੇ ਅਜਿਹਾ ਨਹੀਂ ਕੀਤਾ। ਇਸ ਖ਼ਿਲਾਫ਼ ਉਹ ਅਦਾਲਤ ਦਾ ਦਰਵਾਜਾ ਖੜਕਾਉਣਗੇ।

ਰਿਟਰਨਿੰਗ ਅਫਸਰ ਅਮਿਤ ਗੁਪਤਾ ਨੇ ਕਿਹਾ ਕਿ ਡੇਰਾਬੱਸੀ ਨਗਰ ਕੌਂਸਲ ਦੇ ਨਿਯਮਾਂ ਮੁਤਾਬਕ ਪ੍ਰਧਾਨ ਅਤੇ ਮੀਤ ਪ੍ਰਧਾਨ ਦੇ ਦੋ ਹੀ ਅਹੁਦੇ ਹਨ।