ਸਰਬਜੀਤ ਸਿੰਘ ਭੱਟੀ
ਲਾਲੜੂ, 16 ਸਤੰਬਰ
ਅੰਬਾਲਾ-ਚੰਡੀਗੜ੍ਹ ਮੁੱਖ ਮਾਰਗ ’ਤੇ ਝਰਮਲ ਨਦੀ ਦੇ ਨੇੜੇ ਸੇਬਾਂ ਨਾਲ ਲੱਦੀ ਬਲੈਰੋ ਜੀਪ ਸੜਕ ਦੇ ਵਿਚਕਾਰ ਪਲਟ ਗਈ। ਜੀਪ ਵਿੱਚ ਸਵਾਰ ਤਿੰਨ ਵਿਅਕਤੀ ਵਾਲ ਵਾਲ ਬਚ ਗਏ। ਇਸ ਕਾਰਨ ਮੁੱਖ ਮਾਰਗ ਤੇ ਅੰਬਾਲੇ ਤੋਂ ਆਉਣ ਵਾਲੀ ਲਾਈਨ ਵਿੱਚ ਕੁੱਝ ਸਮੇਂ ਲਈ ਟਰੈਫਿਕ ਪ੍ਰਭਾਵਿਤ ਹੋਣ ਕਾਰਨ ਵਾਹਨਾਂ ਦੀਆਂ ਲੰਮੀਆਂ ਕਤਾਰਾਂ ਲੱਗ ਗਈਆਂ। ਪੁਲੀਸ ਨੇ ਮੌਕੇ ’ਤੇ ਪਹੁੰਚ ਕੇ ਜੀਪ ਨੂੰ ਪਾਸੇ ਕਰਕੇ ਟਰੈਫਿਕ ਨੂੰ ਚਾਲੂ ਕਰਵਾਇਆ। ਸੇਬਾਂ ਨਾਲ ਭਰੀ ਜੀਪ ਸ਼ਿਮਲਾ ਤੋਂ ਲਾਲੜੂ ਦੇ ਨਜ਼ਦੀਕ ਪਿੰਡ ਮਲਕਪੁਰ ਵਿਖੇ ਜਾ ਰਹੀ ਸੀ। ਅੱਜ ਦੁਪਹਿਰ 12 ਵਜੇ ਜਿਵੇਂ ਹੀ ਝਰਮਲ ਨਦੀ ਦੇ ਨੇੜੇ ਪੁੱਜੇ ਤਾਂ ਜੀਪ ਸੜਕ ਦੇ ਵਿਚਕਾਰ ਪਲਟ ਗਈ ਤੇ ਚਾਰੇ ਪਾਸੇ ਸੇਬਾਂ ਦੀਆਂ ਪੇਟੀਆਂ ਅਤੇ ਸੇਬ ਖਿੱਲਰ ਗਏ।